SI Jehova bala maalam nga Manuggahom? Ang isa ka paagi agod masabat ini amo ang pagbinagbinag sang iya mga laygay. Epektibo bala ini? Mangin mas maayo kag mas malipayon bala ang aton kabuhi kon tumanon ini? Ginatos ka hulubaton ang ginsulat sang maalam nga si Hari Solomon. Parte ini sa halos tanan nga bahin sang kabuhi. Binagbinaga ang pila ka halimbawa.

Pagsalig sa Dios. Kinahanglan ang pagsalig agod maangkon ang maayo nga kaangtanan kay Jehova. Nagsulat si Solomon: “Salig sa GINOO sa bug-os mo nga tagiposoon, kag dili magsandig sa imo kaugalingon nga paghangup. Sa tanan mo nga dalanon kilalaha sia, kag magatuytuy sia sa imo mga banas.” (Hulubaton 3:5, 6) Ang pagsalig sa Dios paagi sa pag-usisa sa iya mga panuytoy kag pagtuman sa iya nagapahalipay sa aton. Kon himuon naton ini, mapahalipay naton ang Dios kag may isabat si Jehova sa panumbungon sang Iya kaaway nga si Satanas.—Hulubaton 27:11.

Maayo nga pagpakig-angot sa iban. Kinahanglan gid subong ang laygay sang Dios sa mga bana, asawa, kag kabataan. “Magkalipay sa asawa sang imo pagkapamatan-on,” ang laygay sang Dios sa bana, nga ginsugo niya nga mangin matutom sa iya asawa. (Hulubaton 5:18-20) Mabasa man sang mga asawa sa tulun-an sang Hulubaton ang matahom nga paglaragway sa isa ka maayo nga asawa, nga ginadayaw sang iya bana kag kabataan. (Hulubaton, kapitulo 31) Ginasugo man sini ang mga kabataan nga tumanon ang ila mga ginikanan. (Hulubaton 6:20) Ginapakita man sang tulun-an nga importante ang pag-abyanay, kay ang pagpain sang kaugalingon nagaresulta sa pagkamaiyaiyahon. (Hulubaton 18:1) Mahimo kita maimpluwensiahan sing malain ukon sing maayo sang aton mga abyan, gani kinahanglan naton pilion ang maayo nga mga abyan.—Hulubaton 13:20; 17:17.

Pag-atipan sa kaugalingon. May laygay man ang tulun-an sang Hulubaton parte sa pagpahubog, pagpakita sing positibo nga panimuot, pag-atubang sa malain nga batasan, kag pagkapisan. (Hulubaton 6:6; 14:30; 20:1) Nagpaandam ini nga ang pagsalig sa tawo imbes nga sa laygay sang Dios magaresulta sing kapahamakan. (Hulubaton 14:12) Nagapalig-on ini sa aton nga proteksionan ang aton kaugalingon, ang aton tagipusuon batok sa malain nga mga impluwensia. Nagapahanumdom ini sa aton nga “sa [tagipusuon] nagagowa ang mga ilig sang kabuhi.”—Hulubaton 4:23.

Nangin mas maayo ang kabuhi sang minilyon ka tawo sa bug-os nga kalibutan sang gintuman nila ini nga laygay. Gani madamo gid sing rason kon ngaa batunon si Jehova subong Manuggahom.

—Base sa tulun-an sang Hulubaton.