Oku Baroma 8:1-39
8 Bobola abali omu buguma na Kristo Yesu nta buhane bahaabwa.
2 Bulala erhegeko ly’eroho linahaana akalamo omu buguma na Kristu Yesu, lyabashwekwire omu rhegeko ly’echaha n’olufu.
3 Echintu Erhegeko lyaligambirwe kukola bulala lyalizambire eju y’omubiri, Mungu achikola omu kurhuma Omugala eyi agwerhe omubiri guli nka gw’abantu babanyabyaha omu kuntu akule echaha. Omu kujira ntyo aba eyi amahana echaha chiba omu mubiri,
4 omu kuntu rhukole ebintu bikwanene, bihemerwe n’amarhegeko, arhali omu kuchigendesa nk’oku omubiri gulonzeze si nk’oku eroho lilonzeze.
5 Bulala abanalama nk’oku omubiri gulonzeze banaseza obwenge bwabo oku bintu by’omubiri; aliko abanalama nk’oku eroho lilonzeze banaseza obwenge bwabo oku bintu by’eroho.
6 Okuseza obwenge oku bintu by’omubiri kunalerha olufu, aliko okuseza obwenge oku bintu by’eroho kunalerha akalamo n’omurhula;
7 bulala okuseza obwenge oku mubiri kunarhuma omuntu aba mwanzi wa Mungu, bulala omubiri gurhakenga amarhegeko ma Mungu, kweri gurhakamakenga.
8 Bobola abanalama nk’oku omubiri gulonzeze barhakasimisa Mungu.
9 Chiro akaba ntyo, murhalamire nk’oku omubiri gulonzeze si nk’oku eroho lilonzeze akaba kweri eroho lya Mungu libalimo. Aliko nk’omuntu arhaherhe eroho lya Kristu, oyola arhali wa Kristu.
10 Aliko akaba Kristu ali omu buguma nenyu, chiro akaba emibiri yenyu yafire eju y’echaha, eroho lichesibwa linahaana akalamo eju y’okunali.
11 Akaba eroho ly’olala wafulaga Yesu libalimo, olala wafulaga Kristu Yesu nj’afula emibiri yenyu yakafa kugerera eroho lyage libalimo.
12 Bobola bene-berhu, rhurhakwanene kuleka emibiri yerhu erhurhegeke rhujire ebintu elonzeze;
13 bulala nka mulamire nk’oku omubiri gulonzeze, kweri mwafa; aliko mukayemera eroho lyayirha ebijiro by’omubiri, mwalama.
14 Bulala boshi banayerekezwa n’eroho lya Mungu, kweri abola ba bagala ba Mungu.
15 Bulala murhahaabwaga eroho ly’obuja ly’okushuba kulerha obuba, si mwahaabirwe eroho ly’okurhuma mwaba bagala ba Mungu, na kugerera elyola roho rhuli rhwaderha ntya n’omulenge gunene: “Abba,* Darha!”
16 Eroho lya Mungu linayemeza bwinja-bwinja emirhima yerhu oku rhuli bana ba Mungu.
17 Bobola akaba rhuli bana ba Mungu, nji rhwahaabwa eby’alonzeze kurhuha. Nj’arhuha ebili kuguma n’ebi nj’aha Kristu. Akaba rhuli tayari kulibuka kuguma naye nji rhwakuuzwa haguma naye.
18 Imbwene oku amalibuko rhuli rhwahurana zene buli busha omu kumahuzanya n’oluhembo lwerhu lunene Mungu nj’ayerekana omu mango mayinjire.
19 Obulemi buli bwalindira n’enyorha nene amango bagala ba Mungu bayerekanwa.
20 Bulala obulemi bwahirirwe omu kalamo karhaherhe echikamalire, arhali oku bulonza bwabo bonyine s’oku bulonza b’olala wabuhiraga mw’eyola hali yi haba obulangalire
21 oku obulemi nabo nji bwakulwa omu buja b’omubiri gwakabola n’okugwarha obuhuru bukwirire bwenene buli nk’obw’abana ba Mungu.
22 Bulala rhumenyere oku kugera zene obulemi boshi buli bwagenderera kuganya n’okulibuka haguma.
23 Arhali ebyola byonyine, si chiro nerhu rhwe rhuherhe amatunda marhanzi, k’okuderha eroho, rhuli rhwaganya ahakagarhi kerhu oku rhunali rhwalindira oku nyorha amango rhwajirwa bagala n’okulikulwa kurhenga omu mibiri yerhu kugerera enchungu.
24 Bulala rhwachungulwaga eyi rhuherhe obola bulangalire omu bwenge; aliko obulangalire buli bwabonekana burhali bulangalire. Bulala amango omuntu ali abona echintu akashuba kulangalira oku achipata si?
25 Aliko nka rhulangalire echintu rhurhali rhwabona, rhunagenderera kuchilindira na nyorha nene n’omu kulembera.
26 Intyo kon’okola, eroho linayinja kurhurhabala amango rhuzambire; bulala echibazo rhujira, rhurhenji bichi rhukwanene kuhema omu masala merhu, aliko eroho linarhuhemera ebi rhurhagalire kuderha amango rhuli rhwababala.
27 Aliko olala onasuzuma emirhima ayinji bichi eroho liba lilonzeze kuderha, bulala linahemera abachesibwa ebipatene n’obulonza bwa Mungu.
28 Rhumenyere oku Mungu anajira amakasi mage moshi makole omu buguma oku nyungu ya balala banamuzigira, balala bahamagerwe omu kukulikiza omuhigo gwage;
29 bulala alibere amenyere embere w’echihe oku nj’achishogabo, arhola n’esimikiro oku nji baba kuguma n’Omugala, omu kuntu Omugala abe fula mu bene-babo.
30 Echindi, balala achishogaga embere w’echihe, b’abola b’anahamagere; na balala ahamagere b’anatangazize oku bali banyakunali. Buzinda balala atangazize oku bali banyakunali b’anahere obukuuze.
31 Bichi rhujage rhwaderha oku bilolere ebila bintu? Nka Mungu ali oku lunda lwerhu, inde wakarhulwisa akarhuhima?
32 Akaba arhachibuzaga chiro kuhaana Omugala, aliko amuhaana afe eju yerhu rhweshi, akaj’afunda kurhuha ebindi bintu byoshi oku bulonza omu kuyongera oku Mugala arhuhere?
33 Inde wakasidaka aba Mungu achishogere? Mungu yenyine yenabatangaza oku bali banyakunali.
34 Inde nji wabachira olubanja? Kristu Yesu yewafaga, olekere nantyo yewanafukire. Ali ewa kuboko kw’ekulyo kwa Mungu eyi ali arhuderhera.
35 Bichi byakarhuma Kristu aleka kurhuzigira? Amalibuko, omulago, okugeregezwa, enzara, obutambara, obuhanya, changwa engorho si?
36 Nka kulala Amandiko maderhere: “Okwenge rhuli rhwakukolera, bali bashiba barhuniga ezuba lyoshi; bali barhurhola nka ntama* zaja oku bago.”
37 Aliko mw’ebila bintu byoshi, rhuli rhwahimana loshi-loshi kugerera olala warhuzigiire.
38 Bulala nchizerere oku lube lufu, kabe kalamo, babe bamalayika, mabe marhegesi, bibe bintu bili zene, bibe bintu byachiyinja, ebe misi,
39 kube kulungeera, ebe nkumbo, changwa echindi chilemwa choshi-choshi, birhakarhucha oku buzigire Mungu arhuherheko buli na mu Waliha Kristu Yesu.
