Oku Baroma 15:1-33
15 Rhwabo rhwe rhugwerhe emisi rhukwanene kuheka obuzamba bw’abarhagwerhe misi, si rhurhayinjaga rhwajira ebinarhusimisize.
2 Buli muguma werhu asimise omuturanyi* wage omu kujira ebinja y’amuyumbaka.
3 Bulala chiro na Kristu arhaliri ajira ebinamusimisize, si nka kulala Amandiko maderhere: “Ebidusi* bya balala boshi banakudukanga byantogereko.”
4 Bulala ebintu byoshi byayandikwaga mira, byayandikwaga yi birhuyigiriza omu kuntu kugerera okulembera kwerhu n’echirhulirizo chirhengere omu Mandiko, rhugwarhe obulangalire.
5 Mungu onahaana okulembera n’echirhulirizo abarhabale bagale kuwaza nk’oku Kristu agendaga awaza,
6 omu kuntu omu buguma, na mulenge muguma musingize Mungu Eshe wa Waliha Yesu Kristu.
7 Bobola mukaribisane nk’oku nenyu Kristu abakaribisaga yi Mungu ahaabwa obukuuze.
8 Bulala mbabwirire oku Kristu aliri mukozi wa balala bakatirwe* y’ayerekana oku Mungu ali w’okuli, omu kuntu ayemeze ebilagane Mungu ahaaga b’eshekuliza,
9 n’omu kuntu abantu bakuuze Mungu eju y’olukogo lwage. Nk’oku Amandiko maderhere: “Che chirhumire nakusingiza omu bantu b’amashanja, n’okuyimpa enyimpo z’okusingiza ezino lyawe.”
10 Kandi maderhere ntya: “Mwabo bantu b’amashanja, mugwarhe obusime haguma n’abantu bage.”
11 Kandi maderhere: “Mwabo bantu b’amashanja moshi, musingize Yehova, n’abantu boshi bamusingize.”
12 Isaya naye aderhere ntya: “Omu mulala gwa Yese nji harhengerera omuntu nji warhegeka amashanja. N’abantu b’amashanja nji banihira na nyorha nene oku abakolera ebintu binja.”
13 Mungu onahaana obulangalire abayunjuze obusime n’omurhula bulala mumulangalire, omu kuntu obulangalire bwenyu bube bunene bwenene kugerera emisi y’eroho lichesibwa.
14 Bene-berhu, nchizerere nyono nyenyine oku muyunjwire obwinja, muyunjwire obumenyi, n’oku mwakagala kuhanulana.
15 Aliko, hali ebindi nabayandikire buzira kushiba naluma oku chinaderha y’inshuba kubayibusa, eju y’olukogo rhurhakwanene Mungu ampere
16 y’imba mukozi wa Yesu Kristu w’okukolera abantu boshi omu mashanja. Indi nakola akasi kachesibwa k’emyazi minja ya Mungu omu kuntu amala mashanja mabe ntulo eyemererwe, echesezwe kugerera eroho lichesibwa.
17 Imperhe empanvu y’okuchishinga bulala ndi mwanafunzi wa Kristu Yesu inandi nakola akasi ka Mungu.
18 Bulala ntakafa naderhere echintu n’echiguma olekere ebi Yesu ajirire kungererako, omu kuntu amashanja makenge kugerera ebinwa n’ebijiro byani,
19 kugerera ebimenyeso n’ebisomerene bikomere ndi najira na kugerera eroho lichesibwa Mungu anahaana. Nantyo nahubirire bwinja-bwinja emyazi minja oku bilolere Kristu, kurhangirira e Yerusalemu kuzunguluka kuhika chiro ne Ilirikamu.
20 Kweri omu kujira ntyo, nalichihanganire ntatangazaga emyazi minja efasi ezino lya Kristu lyabaga lyatangazizwe, y’intayumbaka oku musinji g’owindi muntu;
21 aliko nka kulala Amandiko maderhere: “Abarhapataga emyazi yoshi-yoshi oku bimulolere nji babona, n’abarhayunvaga oku bilolere emyazi yage nji bayiyunva bwinja.”
22 N’ebyola bye byambuzize kanene kuyinja emunda muli.
23 Aliko lero omu materitware moshi m’enola munda ntayo n’enguma nchigwerhe erhaza kuhubiribwa, namamala na myaka minene ey’indi nachifija gurhe nakagera emunda muli.
24 Che chirhumire, hanola mbalamira e Espanye, inihire oku rhwabonana mwanaba nka mwamperekeza, eyi narhangire kusiimira okuba haguma nenyu.
25 Aliko bunola, indi hofi kubalamira e Yerusalemu kukolera abachesibwa.
26 Bulala, oku busime abali e Makedoniya ne Akaya babwene oku basholole oku bintu byabo yi barhabala abakene bali omu bachesibwa be Yerusalemu.
27 Kweri bajirire ntyo n’obusime, aliko okuderha okuli balichiyunvirhe bali omu deni ly’okujira ntyo; bulala Abayuhudi basangire n’abantu b’amashanja ebintu binja binarhenga emwa Mungu, abantu b’amashanja nabo bali omu deni ly’okubakolera omu kukolesa ebintu byabo by’omubiri.
28 Bobuno hanola imala akola kasi n’okubageza kw’eyila nshololo omu bulanzi, nagerera emwenyu omu kuja e Espanye.
29 Echindi, imenyere bwinja oku nayinja emunda muli ey’ingwerhe omulengo guyunjwire emigisho erhengere emwa Kristu.
30 Bobuno bene-berhu, imbahemere kugerera Waliha Yesu Kristu na kugerera obuzigire bw’eroho, mugenderere kulwisa haguma nani omu kunsalirira emwa Mungu,
31 omu kuntu ngale kurhenga omu fune z’abantu be Yudeya barhali bemezi, n’abachesibwa bayemere akasi kani k’okurhabala abantu bali e Yerusalemu,
32 omu kuntu oku bulonza bwa Mungu nyinje emunda muli ey’ingwerhe obusime, rhunarhulirizwe haguma.
33 Mungu onahaana omurhula abe haguma nenyu mweshi. Ame.
