Oku Baroma 3:1-31
3 Bobola, bichi Abayahudi balushire abandi, changwa okukatwa* kuherhe nyungu ehe?
2 Hali bintu binene babalushire. Ech’oburhanzi, bowe balihaabirwe ebinwa bichesibwa bya Mungu.
3 Gurhe si oku bilolere Bayahudi baguma barhagwarhaga obwemere? Okurhagwarha obwemere kwabo kwakarhuma obwimana bwa Mungu bwaba bwa busha si?
4 Kweri nanga! Aliko Mungu abonekane oku ali w’okuli chiro akaba oku buli muntu ali abonekana oku ali mubeshi, nka kulala amandiko maderhere: “Y’obonekana oku oli munyakunali omu binwa byawe, onayaze amango bali bakuchira olubanja.”
5 Aliko, akaba okurhaba banyakunali kwerhu kuyerekene oku Mungu yewe ali munyakunali, bichi rhwakaderha? Oku Mungu anaba eyi arhakolere okunali amango amayerekana oburhe bwage si? (Indi naderha nk’oku abantu banaderha.)
6 Arhali ntyo chiro! Akaba Mungu arhali munyakunali, gurhe nj’akaja achira egulu olubanja?
7 Aliko akaba kugerera obubeshi bwani obukweri bwa Mungu bwabonekene bwinja y’ahaabwa obukuuze, bulagurhe nani ndi nachirwa olubanja oku ndi munyabyaha?
8 Na bulagurhe rhurhakaderha nka kulala bantu baguma banarhubeshera mpu rhunaderha ntya: “Muleke rhukole ebintu bibi y’ebinja biyinja”? Okuchira abola bantu olubanja kupatene n’ehaki.
9 Bichi rhujage rhwaderha? Rhwabo rhuli omu hali ekwirire si? Nanga haba n’akatyu! Bulala rhwamamala kubona oku Abayahudi n’Abagiriki boshi banajira ebyaha;
10 nk’oku Amandiko maderhere: “Nta munyakunali obaho, ntaye n’omuguma chiro;
11 ntaye n’omuguma oherhe obumenyi; ntaye n’omuguma oli walonza Mungu.
12 Abantu boshi bajire eburhambi, boshi babere eyi ntacho bamalire; ntaye n’omuguma mubo onakola amenja, ntaye n’omuguma chiro.”
13 “Emimiro yabo eli nka shinda efungwirwe, banabesha n’olulimi lwabwo.” “Esumu ly’enjoka liba omu bunu bwabo.”
14 “Ebinwa byabo biyunjwire emivumo n’obululu.”
15 “Amagulu mabo maba mayanguhire kuja kushesha eshagama.”
16 “Mu byoshi banakola muba okuyirha n’okulibuza abandi,
17 barhanayinji bichi bakakola yi baba omu murhula n’abandi.”
18 “Barhayubaha Mungu.”
19 Rhumenyere oku byoshi Amarhegeko maderhere, bili byabwirwa abali eshishi w’Amarhegeko, omu kuntu buli bunu busizwe n’egulu lyoshi libonekane oku likwanene obuhane embere za Mungu.
20 Bobola, nta muntu wahamagalwa oku ali munyakunali embere za Mungu mp’okwenge akolere ebi amarhegeko maderhere, bulala kugerera amarhegeko rhunapata obumenyi b’okuli oku bilolere echaha.
21 Aliko lero okunali kwa Mungu kwayerekenwe buzira marhegeko, nka kulala Amarhegeko n’eby’abalebi bayandikaga bihaanire obuhamirizi.
22 Chiro akaba omuntu arhengerere ngahe, buli yeshi oherhe obwemere, k’okuderha obwemere mu Yesu Kristu, akabonekana oku ali munyakunali embere za Mungu.
23 Bulala abantu boshi bajirire echaha, nantyo bagambwa kuyerekana engeso zinja bwenene za Mungu.
24 Lunali luhembo lwa busha okubona Mungu abatangazize oku bali banyakunali kugerera olukogo lwage rhurhakwanene, bulala balikwirwe kugerera enchungu Kristu Yesu alipire.
25 Mungu amuhaanire nka ntulo y’okurhuma abantu bayunvikana naye kugerera obwemere omu shagama ya Kristu. Ajiraga ntyo omu kuyerekana oku anali munyakunali, bulala ayerekene engeso y’okulindira n’okubabalira ebyaha byakolwaga mira,
26 n’okuyerekana oku ali munyakunali mu chinola chihe amango amatangaza omuntu oherhe obwemere mu Yesu oku ali munyakunali.
27 Hali empanvu yakarhuma omuntu achitapa* si? Ntayo n’enguma. Marhegeko mahe omuntu akachitapira? Amayerekene oku ebijiro bili by’akamaro si? Nanga, s’ahubwe amayerekene k’omuntu akwanene kugwarha obwemere.
28 Bulala rhubwene k’omuntu anatangazwa oku ali munyakunali kugerera obwemere s’arhali omu kukola ebi amarhegeko maderhere.
29 Changwa, ali Mungu w’Abayahudi bonyine si? Arhali Mungu w’abantu b’amashanja bowe si? Nechi ali Mungu w’abantu b’amashanja nabo.
30 Bulala Mungu aba muguma, nj’atangaza abantu bakatirwe* oku bali banyakunali akaba baherhe obwemere n’okutangaza abantu barhakatirwe oku bali banyakunali kugerera obwemere bwabo.
31 K’okuderha oku rhwamakula h’amarhegeko kugerera obwemere bwerhu si? Nanga haba n’akatyu! S’ahubwe rhuli bantu bashigikire amarhegeko.
