Oku Baroma 6:1-23
6 Gurhe rhujage rhwaderha? Rhukwanene kugenderera kujira echaha y’olukogo lwa Mungu rhurhakwanene lugenderera kuluga si?
2 Omu bukweri nanga! Bulala rhwarhengere omu buja bw’echaha, bulagurhe rhwakashuba kugenderera kulama omu chaha?
3 Changwa murhenji oku obola rhweshi rhwabatizwe mu Kristu Yesu, ahola rhwabatizwe n’omu lufu lwage?
4 Rhwahambirwe naye kugerera obubatizo bwerhu omu lufu lwage, omu kuntu nka kulala Kristu afukaga kugerera obukuuze bwa Darha, nerhu rhukwanene kugenderera kulambagira omu kalamo kahyahya.
5 Akaba rhwajire omu buguma naye omu kufa olufu luli nk’olwage, kweri nji rhwaja n’omu buguma naye omu kufuka kuguma naye.
6 Bulala rhumenyere ok’oborhere bwerhu bwa mira bwamanikirwe oku murhi haguma naye, omu kuntu omubiri gwerhu gw’echaha gube eyi nta misi guchigwerhe, yi rhurhachigenderera kuba baja b’echaha.
7 Bulala owafire anaba eyi amababalirwa echaha chage.
8 Echindi, akaba rhwafire haguma na Kristu, rhuchizerere oku kandi nji rhwalama haguma naye.
9 Bulala rhumenyere oku bunola Kristu afukire; arhakanachifa, olufu lurhachiherhe obuhashe kuye.
10 Afire liguma na liguma, omu kuntu akule echaha loshi-loshi. Aliko akalamo akala alamire zene kali k’okukola obulonza bwa Mungu.
11 Intyo kon’okola, nenyu muchibone nka bantu bafire oku bilolere echaha, aliko muchibone nka bantu balamire yi bakola obulonza bwa Mungu nka banafunzi ba Yesu Kristu.
12 Che chirhumire murhayemeraga echaha chagenderera kurhegeka nka mwami omu mibiri yenyu yakafa, nantyo mukagenderera kukenga enyifinjo zayo.
13 Murhanahaanaga emibiri yenyu oku chaha nka ntwaro z’okukola ebirhakwanene, si muchihaane emwa Mungu nka bantu barhengere omu lufu balama. Muhaane n’emibiri yenyu emwa Mungu nka ntwaro z’okukola ebi kwanene.
14 Bulala echaha chirhakwanene kubarhegeka, bunola murhachigendera oku Marhegeko ma Musa si muli mwayunguka n’olukogo lwa Mungu rhurhakwanene.
15 Bichi rhujage rhwaderha omu kumaliriza? Rhukole echaha obola rhurhachili rhwagendera oku Marhegeko ma Musa, si rhuli rhwayunguka n’olukogo lwa Mungu rhurhakwanene? Nanga haba n’akatyu!
16 Murhenji oku nka muchijirire baja ba muntu mulebe omu kumukenga, ahola eyi muli baja b’oyola mukengere? Akaba murhali baja b’echaha chinayerekeza ewa lufu, eyi muli baja b’obukenge bunarhuma omuntu aba munyakunali.
17 Aliko Mungu koko bulala mango maguma mwaliri baja b’echaha, aliko mwahindamuka mwaba bantu banakenga kurhenga oku murhima omu kukulikiza olwiganyo lw’enyigirizo mwahaabirwe.
18 Nechi, bulala mwalikwirwe kurhenga omu buja bw’echaha, mwabere baja b’okunali.
19 Yinaderha nk’oku abantu banaderha eju y’emibiri yenyu ezambire; bulala nka kulala mwahaanaga ebirumbu byenyu omu buja b’okukola ebirhachere n’okuvuna amarhegeko yi mukola amabi, lero mujage mwahaana ebirumbu by’omubiri gwenyu omu buja b’okukola ebijiro by’okunali binayerekeza ewa buchesibwa.
20 Bulala amango mwaliri baja b’echaha, murhaliri mwayerekezwa n’amarhegeko ma Mungu.
21 Matunda nyabachi mwaliri mwayana mw’agola mango? Bili bintu muli mwayunvira eshoni zene, bulala obuzinda bwabyo luli lufu.
22 Aliko bulala mwakulirwe omu buja bw’echaha mwaba baja ba Mungu, muli mwayana amatunda omu buchesibwa, n’obuzinda b’okujira ntyo kali kalamo k’esiku n’amango.
23 Bulala omushahara echaha chinalipa luba lufu, aliko oluhembo Mungu anahaana kali kalamo k’esiku n’amango kugerera Waliha Kristu Yesu.
