Oku Baroma 10:1-21
10 Bene-berhu, kweri obulonza bwinja b’omurhima gwani n’amasala mani m’okulakirira Mungu kuba kulonza bachunguke.
2 Nakayemeza oku bajira obushiru oku bilolere Mungu, aliko burhaba bupatene n’obumenyi b’okuli.
3 Eju y’okufunda kumenya ebi Mungu anabona oku bili by’okunali, balonza bachihebere h’amabo-mabo makanuni, nantyo barhakengaga ebi Mungu anabona oku bili by’okunali.
4 Bulala Kristu ye buzinda bw’Amarhegeko, omu kuntu buli yeshi wayerekana oku aherhe obwemere abonekane oku ali munyakunali embere za Mungu.
5 Musa aliyandikire ntya oku bilolere okunali kunalerhwa n’Amarhegeko: “Omuntu onakola ebyola bintu alama kubigererako.”
6 Aliko okunali kunalerhwa n’obwemere kuderhere ntya: “Orhachibwiraga ntya omu murhima gwawe: ‘Inde wazamukira embingu?’ K’okuderha akaja kuyandagaza Kristu,
7 changwa ‘inde wayandagala omu abiso?’* K’okuderha akaja kuzamula Kristu arhenge omu bafu.”
8 Bichi echinwa cha Mungu chiderhere? “Oburhumwa buli hofi nawe, omu bunu bwawe, n’omu murhima gwawe”; k’okuderha “oburhumwa” rhunahubiri, obunayemerwa kugerera obwemere.
9 Bulala okatangaza n’obunu bwawe embere z’abantu oku Yesu ali Waliha, okanayerekana k’oherhe obwemere omu murhima gwawe oku Mungu amufulire, nji wachunguka.
10 Bulala okugwarha obwemere omu murhima kunarhuma omuntu aba munyakunali, aliko obunu buli bwatangaza obola bwemere embere z’abantu b’obunamulerhera obuchunguke.
11 Bulala Amandiko maderhere: “Olala wayumbaka obwemere bwage kuye nj’arhakozwa eshoni.”
12 Nta tofauti eliho ahakagarhi k’Omuyahudi n’Omugiriki. Hali Waliha muguma oli elugulu zabo boshi, onagisha bwenene boshi banamuhamagala.
13 Bulala “buli yeshi wahamagala ezino lya Yehova nj’achunguka.”
14 Aliko si, gurhe bakamuhamagala nka barhagwerhe obwemere muye? Na gurhe bakagwarha obwemere muye barhanasaga kuyunva oku bimulolere? Na gurhe bakayunva oku bimulolere buzira muntu w’okuhubiri?
15 Na gurhe bakahubiri nka barharhumirwe? Nk’oku Amandiko maderhere: “Amagulu m’abanatangaza emyazi minja y’ebintu binja maba makwirire orhakalola!”
16 Chiro akaba ntyo, arhali boshi babalikengere emyazi minja. Bulala Isaya aderhere: “Yehova, inde wagwarhire obwemere omu bi ayunvirhe rhuli rhwaderha?”
17 Bobola omuntu anagwarha obwemere kugerera eby’ayunvirhe. Na nk’ayunvirhe, ey’okwenge hali owaderhere oku bilolere Kristu.
18 Aliko nabaza: mbwazize oku boshi bayunvirhe, arhali ntyo si? Bulala kweri omulenge gwayunvikene omu gulu lyoshi, n’oburhumwa bwagendere kuhika n’oku mirhambiira y’egulu lyoshi abantu balamireko.
19 Nashuba kubaza: Izraeli ayunvirhe; arhali ntyo si? Musa aderhere ntya: “Nabazusa m’obongwa kugerera abantu barhali Baizraeli; nabazusa m’oburhe bukalihire kugerera eshanja lihwinjagere.
20 Isaya ava agwarha obushiru bunene aderha ntya: “Abarhaliri bandonza ba bampatire, n’abarhaliri babaza oku bindolere ba bamenyere.”
21 Aliko aderhere ntya oku bilolere Izraeli: “Buli lusiku inanyorha ntegere efune, ey’indi nahamagala olubaga lurhakenga lunaherhe amarhwiri mazibu lungalukire.
Mahugulo m'efo
^ Ao “omu chishimu chirhaherhe buzinda.”
