Oku Baroma 12:1-21
12 Che chirhumire bene-berhu, oku lukogo lwa Mungu, mbahemere muhaane emibiri yenyu nka nterekero ezene, nchesibwa yakanayemerwa na Mungu, k’okuderha okukola akasi kachesibwa omu kukolesa obuhashe bwenyu b’okuwaza.
2 Murhayemeraga elila gulu lyababumba-bumba, si muhindamule okuntu munawaza yi mugala kuchirhegereza mwenyine ebi Mungu alonzeze, ebinja, ebiyemererwe n’ebishinganene.
3 Bulala oku lukogo lwa Mungu rhurhakwanene nahaabirwe, mbwirire buli muguma wenyu arhachiwazagako kuchubusa nk’oku bihemere, s’awaze omu kuntu kuyerekene oku agwerhe obwenge burhulerere omu kukulikiza omulengo g’obwemere Mungu ahere buli muguma.
4 Bulala nka kulala omubiri gujira birumbu binene aliko byoshi birhakola kasi kaguma,
5 nerhu kon’okola, chiro akaba oku rhuli banene, rhuli mubiri muguma omu buguma na Kristu, aliko buli muguma werhu ali chirumbu ch’owindi.
6 Che chirhumire rhugwerhe empano zirhali kuguma oku lukogo lwa Mungu rhurhakwanene rhwahaabirwe. Bobola akaba bulebi bu rhwaabirwe, rhuhaane obulebi buyenerene n’obwemere bwerhu;
7 akaba mpano y’okukolera abandi yirhwahaabirwe, rhubakolere; akaba mpano y’okuyigiriza y’omuntu ahaabirwe, ayigirize;
8 akaba mpano y’okuheba omurhima, ahebe omurhima; akaba mpano y’okugaba, agabe buzira kalondole; akaba mpano y’okuyimangira, ayimangire n’omurhima goshi; akaba mpano y’okuyerekana olukogo, ayerekane olukogo n’obushagaluke.
9 Obuzigire bwenyu burhabaga b’obuchimbi. Mushombe amabi; muchishwekere oku binja.
10 Mugwarhane k’obuzigire bw’akasisi nka bana ba nda nguma. Mube b’oburhanzi omu kuyerekana obukenge.
11 Mugwarhe obushiru, si murhabaga bolokazi. Eroho lya Mungu libadugurhemo, mukolere Yehova nka baja.
12 Mugwarhe obusime eju y’obulangalire. Mulembere amalibuko. Musalire buzira kuleka.
13 Muhe abachesibwa bali omu bulagirire. Mugwarhe engeso y’okukaribisa abageni.
14 Mugenderere kugisha abali babalibuza; mugishe si murhavumaga.*
15 Musime haguma n’abali omu busime; mulake haguma n’abali balaka.
16 Mubone abandi nk’oku munachibona; murhachihebaga enyanya si muchiche bufi. Murhachibonaga bengehe oku masu menyu mwenyine.
17 Ntaye mugalulirage obubi oku bwindi. Mukole ebibonekene oku bantu boshi oku bili binja.
18 Akaba byakashoboka, nk’okumwakanagala koshi, mube omu murhula n’abantu boshi.
19 Bazigirwa, murhachiholeraga si mulekere oburhe bwa Mungu akasanzi; bulala Amandiko maderhere: “‘Okuchiholera kali kasi kani; nyono nye nji najuha’, intyo ku Yehova aderhere.”
20 Aliko nk’omwanzi wawe ali nzara, omuhe ech’alya; akaba ali nyorha, omuhe ech’anywa. Bulala nk’ojirire ntyo, eyi oli wagusha amakala makolerere oku rhwe lyage.
21 Orhayemeraga wahimwa n’obubi s’ogenderere kuhima obubi kugerera obwinja.
Mahugulo m'efo
^ Ao “murhakomaga.”
