Oku Baroma 11:1-36
11 Bobuno nabaza, Mungu akabulire abantu bage si? Nanga haba n’akatyu! Bulala nani ndi Muizraeli, w’omu luburho lwa Abrahamu, w’omu buko bwa Benjame.
2 Mungu arhakabuliraga abantu bage arhangaga kumenya. Murhamenyere eby’Olwandiko luderhere si oku bilolere Eliya amango aliri alakirira Mungu ey’ali alundumira Abaizraeli?
3 “Yehova, bayirhire abalebi bawe, bahombwere amazabahu mawe, nyenyine nye nyorhere, nani yibalonza banyirhe.”
4 Aliko Mungu amushubiza gurhe? “Inchigwerhe bantu 7 000 barhafukamiraga Baali.”
5 Intyo ku binali na zene. Hachili abandi basigere, bachishogerwe oku lukogo lwa Mungu rhurhakwanene.
6 Bachishogerwe oku lukogo lwa Mungu rhurhakwanene, s’arhali eju y’ebijiro byabo. Bulala nk’ebijiro byabo bye byarhumaga achishogabo, lurhakachibere lukogo lwa Mungu rhurhakwanene.
7 Bichi rhujage rhwaderha? Echintu Izraeli ali alonza n’obushiru arhachipataga, si balala bachishogerwe ba bachipatire. Abandi bayorhere bamarhwiri mazibu,
8 nk’okw’Amandiko maderhere: “Kugera zene, Mungu ajirire emirhima yabo ehondobere omu ro, amasu mabo marhabonaga, n’amarhwiri mabo marhayunvaga.”
9 Na Daudi aderhere: “Ameza mabo mahinduke murhego, mahinduke muguli, mabe chintu ch’okusirhalako, bunabe buhane bwabo.
10 Amasu mabo mabe m’omwizimya omu kuntu barhagalaga kubona, n’amango moshi obagondamye emigongo.”
11 Bobola nabaza: Basirhere n’okuhena loshi-loshi si? Nanga haba n’akatyu! Aliko bulala Abayahudi bashikamire nantyo abantu b’amashanja bapata obuchunguke, echola chabazusize m’obongwa.
12 Akaba okushikamira kwabo kwalerheere egulu emigisho, n’okugeha kwabo kwalerheere abantu b’amashanja emigisho, oluganjo lwabo luyenere lukwanene kulerha migisho minene kulusha!
13 Bunola, ndi naganira nenyu mwabo bantu b’amashanja. Bulala ndi ntumwa oku bantu b’amashanja, ndi nasingiza akasi kani
14 omu kulola akaba byakashobokana mu njira nguma changwa eyindi, nzuse abantu b’eshanja lyani m’obongwa omu kuntu nchungule baguma mubo.
15 Bulala akaba okukabulwa kwabo kwarhumire abantu b’amashanja bayunvikana na Mungu, bichi okuyemerwa kwabo kwakaja kwalerha akaba karhali kalamo kurhenga omu bafu?
16 Echindi, nk’echigabi ch’epate charholwaga nka ntulo y’amatunda marhanzi chili chichesibwa, k’okuderha oku epate yoshi yapondwaga eli nchesibwa; na nk’omuzi guli guchesibwa eyi n’amarhabi namo mali machesibwa.
17 Aliko, akaba marhabi maguma machibirwe, nawe chiro akaba oku oli muzabibu gw’elubala bakunanizize haguma n’amola marhabi mayorhere onali wayunguka haguma namo oku by’emizi eli yalisa omurhi g’omuzabibu,
18 orhagwarhaga omwibone embere z’amola marhabi. Okagwarha omwibone, oyibuke oku arhali woyo wehekere emizi, s’emizi y’ekuhekere.
19 Nkabaga waderha: “Bachaga agola marhabi y’inanizwa ahagaliri.”
20 B’obukweri obola! Bamachaga bulala marhaligwerhe obwemere, aliko woyo oyimangire kugerera obwemere. Orhagwarhaga echiburi, s’ogwarhe obuba.
21 Bulala akaba Mungu arhalekaga amola marhabi m’echisisi, arhali woyo w’aleka.
22 Bobola owaze oku bwinja bwa Mungu n’oku bukali bwage. Ayerekene obukali oku bahenere,* aliko woyo ali akuyereka obwinja akaba waziga wayorha omu bwinja bwage. Aliko akaba orhajirire ntyo, nawe wachibwa.
23 Akaba nabo barhagenderere kubula obwemere, bananizwa; bulala Mungu akagala kushuba kubananiza.
24 Bulala akaba woyo wachibirwe oku muzabibu gw’elubala wananizwa oku muzabibu gw’eka omu kuntu birhazigana kuba, amarhabi ma kw’echola chisisi makwanene kushuba kunanizwa oku muzabibu marhengagako chiro kukulusha!
25 Aliko bene-berhu, ntalonzeze mukahaba eyila siri nchesibwa, omu kuntu mukachibona bengehe oku masu menyu mwenyine: Baizraeli baguma bakomeze emirhima yabo, byanagenderera kuba ntyo kugera amango oluganjo loshi lw’abantu b’amashanja lwaba lwagushirwe.
26 Omu njira eli nk’eyola, Izraeli yeshi nj’achunguka nka kulala Amandiko maderhere: “Omuchunguzi nj’arhengerera omu Sayuni anakula Yakobo omu bijiro byage by’okurhakenga Mungu.
27 Eyola y’endagano yani haguma nabo amango nji nakula ebyaha byabo.”
28 Kweri, bali banzi ba Mungu bulala balahire emyazi minja, nenyu mwapata enyungu eju y’echola. Aliko eju y’echilagane Mungu ahaga b’eshekuliza, achishogere baguma mubo babe bera bage.
29 Bulala Mungu nj’arhachiganya eju y’empembo ahaanire, n’eju y’abantu ahamagere.
30 Bulala kuguma nk’oku nenyu hali amango murhalikengere Mungu aliko zene abayerekere olukogo eju y’okurhakenga kwabo,
31 intyo kon’okola abala nabo bafundire kukenga nantyo mwayerekwa olukogo, omu kuntu nabo Mungu aje abayereka okukogo.
32 Mungu abalekere boshi bayorhe nka bashwekwa omu kurhakenga kwabo, omu kuntu abayereke boshi olukogo.
33 Berhu we, emigisho ya Mungu, obwengehe, n’obumenyi bwage bilugire bwenene! Bikomere bwenene okuyunva okuntu anacha emanja, n’okuyunva eby’anakola kurhayorohere!
34 Bulala “inde wahikiire kumenya obwenge bwa Yehova, changwa inde wabere muhanuzi wage?”
35 Changwa, “inde warhangire kuha Mungu echintu omu kuntu naye amugalulirecho?”
36 Bulala ebintu byoshi byarhengaga emwa Mungu, kugerera yewe, byoshi binali byage. Ahaabwe obukuuze esiku n’amango. Ame.
Mahugulo m'efo
^ Ao “bachikubire, bagwire ahashi, bakumbagere.”
