Oku Baroma 7:1-25
7 Bene-berhu, byakashobokana eyi murhenji oku amarhegeko manayerekeza omuntu amango achili muguma-guma si? (Nyinji oku ndi nabwira balala bayinji amarhegeko bwinja.)
2 Omufano, omukazi oshabirwe aba ashwekerwe n’amarhegeko kw’eba amango achiliho; aliko amango eba amafa, eyi amashwekulwa omu marhegeko m’eba.
3 Bobola amango moshi eba achiliho, oyola mukazi akabonekana oku ajirire obugonyi nk’abere muka owindi mulume. Aliko nk’eba amafa, eyi amashwekulwa kurhenga omu marhegeko m’eba, nantyo nk’abere muk’owindi mulume arhaba eyi ajirire obugonyi.
4 Bobola bene-berhu, nenyu mwalishwekerwe n’amarhegeko, aliko kugerera enterekero ya Kristu mwashwekwirwe nantyo mukala muli bantu ba Kristu omu kuntu muyane amatunda malerhera Mungu obukuuze.
5 Bulala amango rhwalilamire omu kukulikiza omubiri, enyifinjo zikalihire z’echaha zaliri zazuswa n’Amarhegeko, zaliri zakola omu mibiri yerhu yi rhuyana amatunda m’okulerha olufu.
6 Aliko bulala rhwashwekwirwe kurhenga omu Marhegeko omu kuntu rhurhachiyerekezwa namo, rhukala rhuli baja ba Mungu omu yindi-yindi njira erhayumangiire oku Marhegeko nk’oku byaliri mira, s’eyumangiire oku roho lichesibwa.
7 Bichi rhujage rhwaderha? Amarhegeko chili chaha si? Nanga haba n’akatyu! Omu bukweri, ntakamenyere echaha nk’Amarhegeko marhaliriho. Omufano, ntakamenyere obongwa nk’Amarhegeko marhaliderhere: “Orhakwanene kuyongwa.”
8 Aliko kugerera amarhegeko echaha chapata orozo l’okunderha m’obongwa bwa buli buko, bulala buzira amarhegeko echaha chakabere eyi chifire.
9 Kweri, mango maguma nalilamire buzira marhegeko, aliko amango amarhegeko mayinja, echaha chafuka, nyono nafa.
10 N’amarhegeko malikwanene kuyerekeza ewa kalamo, nayinja kubona oku gasi mayerekeze ewa lufu.
11 Bulala eju y’amola marhegeko, echaha chapata orozo l’okunshumika n’okunyirha.
12 Amarhegeko ma Musa mali machesibwa, n’ebiderherwe mw’amola marhegeko bili bichesibwa, by’okunali, binali binja.
13 K’okuderha oku ebintu binja bye byanderhere olufu si? Nanga haba n’akatyu! Aliko echaha che chalulerhere. Amarhegeko maba menja manayerekene oku echaha che chinalerha olufu. Nantyo amarhegeko mayerekene kangana gurhe echaha chili chibi bwenene.
14 Bulala rhumenyere oku Amarhegeko maba m’ekiroho, aliko nyono ndi muntu w’omubiri, nanaguzizwe yi mba muja w’echaha.
15 Ntenji ebi ndi nakola. Bulala ebintu mba ndonzeze kukola arhali b’inankola, aliko eb’inshomba b’inankola.
16 Aliko chiro najira eb’intalonzeze, nyemerere oku amarhegeko mali menja.
17 Ahola arhachili nyono nyemba eyi ndi nabikola, s’echaha chimbamo.
18 Bulala imenyere oku mu nyono, k’okuderha omu mubiri gwani nta chintu chinja chibamo; bulala injira enyorha y’okukola ebintu binja aliko ntajira obuhashe b’okubiyeneza.
19 Bulala ntajira ebintu binja ndonzeze kujira, s’ebintu bibi ntalonzeze b’inanjira.
20 Bobola akaba nanjira eb’intalonzeze, arhali nyemba eyi ndi nabijra s’echaha chimbamo.
21 Indi nabona elila rhegeko omu hali yani: Amango ndi nalonza kujira ebintu binja, ebintu bibi byanantangana.
22 Okudeha okuli, omu murhima gwani inansima amarhegeko ma Mungu,
23 aliko ndi nabona omu mubiri gwani elindi rhegeko lili lyalwisa erhegeko linayerekeza obwenge bwani, n’okunjira mushwekwa w’erhegeko ly’echaha lili omu mubiri gwani.
24 Kweri ndi muntu wa busha! Inde wakanyokola kurhenga m’ogula mubiri guli gwanyerekeza ewa lufu?
25 Koko emwa Mungu kugerera Waliha Yesu Kristu! Omu bwenge bwani ndi muja w’amarhegeko ma Mungu, aliko omu mubiri gwani ndi muja w’erhegeko ly’echaha.
