Oku Baroma 14:1-23
14 Mukaribise bwinja omuntu oherhe bwemere bunokere, aliko murhachiraga olubanja abantu barhabwene ebintu nk’oku mwabo mubibwene.
2 Hali omuntu ogwerhe obwemere burhamubuzize okulya buli choshi, aliko omuntu ozambire yewe analya eshogo zonyine.
3 Olala oli walya arhabonereraga orhali walya, n’orhali walya arhachiraga olubanja oli walya, bulala Mungu amukaribisize.
4 Woyo oli nde y’ochira omukozi w’owindi olubanja? Akaba oyola muntu ayumangire changwa ahenere,* ebyola bilolere nahamwabo. Kweri, ayumanzwa bulala Yehova akamuyumanza.
5 Hali omuntu onawaza oku lusiku lulebe lulushire olwindi; aliko owindi yewe anawaza okw’esiku zoshi ze ziguma. Buli muntu abe eyi achizerere bwinja-bwinja ebi awazize.
6 Onakenga lusiku lulebe, analukengera Yehova. Echindi, omuntu onalya, analiira Yehova, bulala anabwira Mungu koko; n’olala orhalya arhaliira Yehova, bulala naye anabwira Mungu koko.
7 Intaye n’omuguma mu rhwabo onalama y’achiha obukuuze yenyine, na ntaye onafa y’achiha obukuuze.
8 Bulala akaba rhulamire, rhulamire yi rhuha Yehova obukuuze; na rhukafa, rhwafa yi rhuha Yehova obukuuze. Bobuno, rhulame changwa rhufe rhuli ba Yehova.
9 Bulala Kristu afaga n’okufuka y’aba Waliha w’abazene n’abafire.
10 Aliko, bulagurhe oli wachira mwene-wenyu olubanja? Changwa bulagurhe oli wabonerera mwene-wenyu? Okuderha okuli, rhweshi nji rhwayimanga embere w’echichumbi ch’okuchira k’olubanja cha Mungu.
11 Bulala Amandiko maderhere: “‘Obola kweri inamba ndamire, buli ivi* nji lyafukama embere zani, na buli lulimi nji lwayemera oku ndi Mungu,’ intyo ku Yehova aderhere.”
12 Bobuno, Mungu nji abaza buli muguma ebi akolere.
13 Bobola, rhurhachiyinjaga rhwachirana olubanja, s’ahubwe rhujire okwerhu koshi yi rhurhahira embere za mwene-werhu echintu chakarhuma agoma changwa echintu chakamurhega.
14 Imenyere inanyemezezwe mu Waliha Yesu oku nta chintu chibaho chirhachere; s’amango omuntu amabona chintu chilebe oku chirhachere, ku yewe chanaba eyi chirhachere.
15 Nka mwene-wenyu amagaya eju y’ebilyo, ahola ey’orhachili walambagira omu buzigire. Eju y’ebilyo byawe orhaharabisaga omuntu Yesu afiraga.
16 Bobola murhayemeraga ebintu binja muli mwakola byaderhwa kubi.
17 Bulala arhali okulya n’okunywa k’okwakarhuma omuntu aja omu Obwami bwa Mungu, s’okuba munyakunali, muntu w’omurhula, ojira obusime, binalerhwa n’eroho lichesibwa.
18 Bulala omuntu onakolera Kristu nka muja omu njira eli nk’eyola, anasimisa Mungu n’abantu banamusima.
19 Bobola rhugenderere kujira ebintu by’okulerha omurhula n’ebintu by’okuyumbakana.
20 Muleke okushanda akasi ka Mungu eju y’ebilyo. Kweri, ebintu byoshi bichere, aliko okulya ebyakarhuma owindi agoma kuli kubi bwenene.
21 Kuli kwinja bwenene okurhalya enyama, okurhanywa edivayi changwa okujira echintu choshi-choshi chakarhuma mwene-wenyu avunika omurhima.
22 Obwemere ogwerhe, obuberane woyo wenyine embere za Mungu. Ogwerhe obusime ali muntu orhachichira olubanja omu kukulikiza ebi yewe ayemerere.
23 Aliko omuntu akalya anagwerhe engangane, ahola anaganjirwa egosa bulala alire arhanamenyere akaba ebi ajirire bikwanene. Kweri, echintu choshi omuntu anakola chirhayimangiire oku bwemere chili chaha.
