Oku Baroma 5:1-21
5 Bobo lero, bulala rhwatangezwe oku rhuli banyakunali kugerera obwemere, muleke rhusiimire omurhula haguma na Mungu kugerera Waliha Yesu Kristu.
2 Kugerera kuye rhwajire m’olula lukogo rhurhakwanene rhulimo zene kugerera obwemere. Muleke rhuchishinge bulala rhugwerhe obulangalire b’okupata oku bukuuze bwa Mungu.
3 Arhali echola chonyine, aliko rhuchishinge chiro n’amango rhuli omu malibuko, bulala rhumenyere oku amalibuko manaburha okulembera;
4 okulembera kwanaburha ehali y’okuyemerwa na Mungu; ehali y’okuyemerwa na Mungu yanaburha obulangalire,
5 n’obulangalire burhakakoza omuntu eshoni, bulala obuzigire bwa Mungu bwashesherwe omu mirhima yerhu kugerera eroho lichesibwa rhwahaabirwe.
6 Bulala kweri amango rhwalichili bichibwa, Kristu ava afa eju y’abantu barhayubahire Mungu oku kasanzi kabaga kaheberweho.
7 Bikomere okuderha k’omuntu ayemere afe eju y’omunyakunali; si nkabaga hali owakayemera afa eju y’omuntu mwinja.
8 Aliko ntya ku Mungu arhuyerekere obuzigire bwage: Kristu afa eju yerhu n’obola rhwalichili banyabyaha.
9 Bulala rhwatangezwe oku rhuli banyakunali kugerera eshagama yage, rhugwerhe empanvu ekomere y’okuchizera oku kugerera kuye nji rhwafuma oburhe bwa Mungu.
10 Bulala akaba amango rhwaliri bashombanyi ba Mungu, byagalikana rhuyunvikane naye kugerera olufu l’Omugala, rhugwerhe empanvu ekomere y’okuchizera oku nji rhwachungulwa kugerera akalamo kage, okwenge rhukala rhuli omu bunvikane naye.
11 Arhali echola chonyine, aliko kandi rhugwerhe obusime mu Mungu kugerera Waliha Yesu Kristu, bulala rhukala rhuyunvikene na Mungu kugerera kuye.
12 Che chirhumire, nka kulala kugerera muntu muguma echaha chajire omu gulu, n’olufu kugerera echaha, nantyo olufu lwayahukira abantu boshi bulala boshi bajirire echaha—.
13 Bulala echaha chaliri omu gulu embere Amarhegeko mabeho, aliko nta muntu bakaganjira echaha nka nta marhegeko maliho.
14 Chiro akaba ntyo, olufu lwaliri lwarhegeka nka mwami kurhenga ku Adamu kugera ku Musa, chiro na ku balala barhakolaga echaha chili nk’echi Adamu ajiraga, waliri kuguma n’olala walikwanene kuyinja.
15 Aliko oluhembo lwa Mungu lowe lurhali kuguma n’echaha cha Adamu. Bulala akaba kugerera echaha cha muntu muguma bantu banene bafire, olukogo lwa Mungu rhurhakwanene n’oluhembo anahaana oku busha kugerera olukogo rhurhakwanene lwa muntu muguma yekala Yesu Kristu, byayunjulirene oku bantu!
16 Echindi, olola luhembo Mungu anahaana oku busha lurhali kuguma n’okuntu ebintu byabaga eju ya muntu muguma wajiraga echaha. Bulala olubanja lwachibwaga muntu muguma ayusa kujira echaha, kwaliri kuhaabwa obuhane. Aliko oluhembo Mungu ahaanaga oku busha amango bantu banene bamala kujira echaha lwarhuma batangazwa oku bali banyakunali.
17 Akaba kugerera echaha cha muntu muguma olufu lwalirhegekere nka mwami, abanapata oku bunene olukogo lwa Mungu rhurhakwanene n’oluhembo Mungu anahaana oku busha l’okunali, nji bahaabwa akalamo, banarhegeka nka bami chiro na kulusha, kugerera muntu muguma Yesu Kristu!
18 Bobo lero nka kulala chaha chiguma charhumire abantu ba buli buko bachirwa echihano, intyo kon’okola kugerera chijiro chiguma ch’okunali, abantu ba buli buko yi batangazwa oku bali banyakunali omu kuntu bahaabwe akalamo.
19 Nka kulala kugerera okurhakenga kwa muntu muguma, bantu banene bajirirwe banyabyaha, intyo kon’okola, kugerera okukenga kwa muntu muguma, bantu banene bajirwa banyakunali.
20 Lero Amarhegeko mabereho y’ebyaha biluga. Aliko ah’ebyaha bilugire, olukogo lwa Mungu rhurhakwanene lunalugaho na kulusha.
21 Yi bija byaba gurhe? Omu kuntu nka kulala echaha n’olufu byarhambulaga haguma nka mwami, intyo kon’okola k’olukogo lwa Mungu rhurhakwanene lwarhegeka nka mwami omu kunali. Nantyo rhwanahaabwa akalamo kugerera Waliha Yesu Kristu.
