Oku Baroma 4:1-25
4 Akaba ntyo ku bili, rhwakaderha oku nyungu zihe shokuliza werhu Abrahamu alipatire?
2 Omufano, nka Abrahamu atangazwaga munyakunali eju y’ebijiro, akagwarhire empanvu y’okuchitapa,* aliko arhali oku masu ma Mungu.
3 Gurhe kulala Amandiko maderhere? “Abrahamu agwarha obwemere mu Yehova, n’eju y’echola aganjwa oku ali munyakunali.”
4 Bulala omuntu oli wakola, eyi bamukamarhisa omushahara gwage birhabonekana oku luli lukogo arhakwanene, si nka chintu akwanene.
5 Aliko omuntu orhali wakola s’agwerhe obwemere m’Olala onaganja omuntu orhayubahire Mungu oku ali munyakunali, obwemere bwage bunarhuma naye aganjwa oku ali munyakunali.
6 Nka kulala Daudi naye aderhaga oku bilolere obusime b’omuntu Mungu anaganja oku ali munyakunali buzira bijiro:
7 “Abagwerhe obusime bali balala ebijiro byabo by’okuvuna amarhegeko byababalirwe, n’ab’ebyaha byabo byababalirwe;
8 ogwerhe obusime ali muntu Yehova arhaganjira echaha chiro.”
9 Obola busime buli bw’abantu bakatirwe* bonyine s’abarhakatirwe bowe nanga? Bulala rhuli rhwaderha: “Obwemere bwa Abrahamu bwalirhumire aganjwa oku ali munyakunali.”
10 Bobola, aganjwaga oku ali munyakunali ey’ali omu hali eli gurhe? Abaga akatirwe* changwa arhaliza kukatwa? Arhali amango alikatirwe s’amango arhaliza kukatwa.
11 Alipatire echimenyeso; k’okuderha okukatwa,* nka kashe kayerekene oku ali munyakunali kugerera obwemere aligwerhe ey’arhaza kukatwa, omu kuntu abe eshe wa balala boshi bagwerhe obwemere chiro akaba oku barhaza kukatwa yi baganjwa oku bali banyakunali;
12 n’omu kuntu abe eshe w’oluburho lw’abakatirwe,* arhali eshe wa balala bachishwekere oku rhegeko ly’okukatwa bonyine, si kandi eshe wa balala bali balambagira bwinja omu njira y’obwemere darha Abrahamu aligwerhe amango arhaliza kukatwa.
13 Bulala arhali amarhegeko mamarhumaga Abrahamu changwa oluburho lwage bapata echilagane oku akashokwere elindi-lindi gulu, s’obwemere bwage bobwarhumaga aganjwa oku ali munyakunali.
14 Akaba balala bachishwekere oku marhegeko banji bashokoola, obwemere bwanaba bwa busha n’echilagane chanaba eyi chashandirwe.
15 Omu bukweri omuntu wavuna Amarhegeko nj’ahanwa; aliko aharhali marhegeko nta gosa lyakabaho.
16 Echola che chirhumire, kuli kugerera obwemere yi luba lukogo rhurhakwanene omu kuntu rhuchizere oku echilagane chayenera oku luburho lwage loshi, arhali ku balala bachishwekere oku Marhegeko bonyine si na ku balala bachishwekere oku bwemere bwa Abrahamu oli darha werhu rhweshi.
17 (Ebyola bipatene n’eby’Amandiko maderhere: “Nakujirire eshe w’amashanja manene.”) Abrahamu aligwerhe obwemere mu Mungu onafula abafire n’okuhamagala ebintu birhabaho wamenya nka bibaho.*
18 Chiro akaba oku nta mpanvu yaliriho y’okugwarha obunihire, obulangalire aligwerhe bwarhuma agwarha obwemere oku akabere eshe w’amashanja manene, nk’oku Amandiko manabaga maderhere: “Intyo k’oluburho lwawe nji lwaba.”
19 Chiro akaba oku obwemere bwage burhalinokere, alibwene omubiri gwage gowe oku gunali nk’ogufire (bulala aligwerhe myaka hofi 100), olekere nantyo Sara naye aliri ngumba.
20 Aliko eju y’echilagane cha Mungu, arhahehwaga eyi n’eyi eju y’okubula obwemere, s’ahubwe agwarha emisi kugerera obwemere, nantyo aha Mungu obukuuze
21 anachizera loshi-loshi oku Mungu agwerhe obuhashe b’okuyeneza eby’alaganyize.
22 Echola charhuma “aganjwa oku ali munyakunali.”
23 Aliko echinwa “aganjwa” chirhayandikwaga eju yage yenyine
24 si n’eju yerhu, bulala nj’arhuganja oku rhuli banyakunali okwenge rhuchizerere oku yewe ye wafulaga Waliha Yesu.
25 Alihaanirwe ayirhwe eju y’ebyaha byerhu, anafuka yi rhutangazwa oku rhuli banyakunali.
