Oku Baroma 1:1-32
1 Nyono Paulo, muja wa Kristu Yesu. Ampamagere y’imba ntumwa, anachinshogere ntangaze emyazi minja ya Mungu
2 alaganyaga kurhenga mira omu Mandiko machesibwa kugerera abalebi bage,
3 oku bilolere Omugala waburhwaga nka muntu oku gulu omu mulala gwa Daudi,
4 aliko kugerera emisi y’eroho lichesibwa afuka n’okutangazwa oku ali Mugala wa Mungu; nechi, ye Yesu Kristu Nahamwerhu.
5 Kugerera kuye nahaabirwe olukogo rhurhakwanene n’akasi k’okuba ntumwa, omu kuntu ntabale abantu b’amashanja moshi bayerekane obwemere n’okumukenga yi bakuuza ezino lyage.
6 Nenyu mwahamagerwe kurhenga mw’amola mashanja yi muba bantu ba Yesu Kristu.
7 Oku bazigirwa ba Mungu boshi bali e Roma, bahamagerwe yi baba bachesibwa:
Mugwarhe olukogo rhurhakwanene n’omurhula gurhengere emwa Darha Mungu n’emwa Waliha Yesu Kristu.
8 Embere wa byoshi, mbwirire Mungu wani koko kugerera Yesu Kristu oku bibalolere mweshi, bulala obwemere bwenyu buli bwaderhwako omu gulu lyoshi.
9 Mungu nankolera akasi kachesibwa n’omurhima gwani goshi oku bilolere Omugala, ali muhamirizi wani oku amango moshi ntaleka kubaderha omu masala mani,
10 ey’indi namuhema oku akaba byakashobokana, nzinde eyi nagalire kuyinja emunda muli akaba buli bulonza bwa Mungu.
11 Bulala ndi nachifija okubabona y’imbaha oluhembo lurhengere emwa Mungu l’okukomeza obwemere bwenyu;
12 changwa nakaderhere, rhuhirane omurhima kugerera obwemere bwa buli muguma n’owindi, obwenyu n’obwani.
13 Aliko bene-berhu, ntalonzeze mukafunda kumenya oku nalonzeze kuyinja emunda muli kanene; aliko birhaza kugalikana kugera buno, bulala ngwerhe obunihire b’okupata amatunda menja mu mwabo kuguma n’omu mandi mashanja.
14 Nyono ngwerhe edeni ly’Abagiriki n’ely’abarhali Bagiriki, ely’abengehe n’ely’abarhagwerhe bwenge;
15 bobola ngwerhe enyorha y’okubatangaziza emyazi minja nenyu mwe muli e Roma.
16 Bulala ntayunvira emyazi minja eshoni; kweri eyi myazi minja eli njira ekomere Mungu anakolesa omu kuchungula abantu boshi bagwerhe obwemere, kurhangirira oku Muyahudi naho oku Mugiriki.
17 Bulala abaherhe obwemere banachibonera kugerera emyazi minja oku Mungu anayerekana oku ali munyakunali, n’echola chinakomeza obwemere bwabo nk’oku binayandikirwe: “Aliko omunyakunali alama kugerera obwemere.”
18 Bulala Mungu ayerekana oburhe bwage kurhenga embingu oku bantu boshi barhamuyubaha barhanali banyakunali. Abantu bali nk’abola banarhuma okuli kurhamenyikana,
19 n’obola byoshi byakamenyikana oku bilolere Mungu bibonekene bwinja emunda bali, bulala Mungu abayerekerebyo bwinja-bwinja.
20 Engeso zage zirhabonekana, zinabonekana bwinja-bwinja kurhondera egulu lilemwa na kugenderera, bulala zinabonekana kugerera ebintu alemere. Ebyola bintu alemere binayerekana emisi yage y’esiku n’amango, kandi binayerekana oku kweri ali Mungu. Che chirhumire barhakababalirwa chiro.
21 Chiro akaba oku balimenyere Mungu, barhamuhaaga obukuuze yewe nka Mungu barhanamubwiraga chiro koko, s’ahubwe baba bihwinja omu miwazize yabo, n’emirhima yabo erhagwerhe bwenge yarhogera omu mwizimya.
22 Chiro akaba oku baliri bachihala oku bali bengehe, bazinda eyi babere bihwinja,
23 ahali h’okuha Mungu orhakafa obukuuze, barhondera kubuha esanamu z’abantu bakafa, ez’enyunyi, ez’enyama za magulu mane n’ezinabululuka.
24 Che charhumire, omu kukulikiza enyifinjo z’emirhima yabo, Mungu abalekere omu zinga lyabo, omu kuntu bowe bonyine basuzagurise emibiri yabo.
25 Bahingana* obukweri bwa Mungu n’obubeshi, barhondera kuharamya ebilemwa n’okubikolera akasi kachesibwa ahali h’okukakolera Omulemi onasingizwa esiku n’amango. Ame.
26 Che charhumire Mungu abaleka omu nyifinjo zabo zinene z’obubaraga zikozeze eshoni, bulala abakazi babo bahindamwire okuntu Mungu alipangire emibiri yabo ekoleswe, barhondera kuyikolesa okwindi-kwindi.
27 Abalume nabo kon’okola, balekere okujira echijiro ch’obuhya n’abakazi nk’okubyalemwaga bibe, abalume oku balume banahindamukirana bonyine oku bonyine omu nyifinjo zabo zikalihire, banakola ebintu bibihire bwenene; banali bapata obuhane omu mibiri yabo bukwanene obubi bwabo.
28 Bulala barhabonaga oku kuli kwinja okuyemera Mungu, Mungu naye abalekere omu miwazize yabo mibi, yi bajira ebintu birhakwanene.
29 Bayunjulirene buli buko bw’amawazo marhakwanene, obubi, obuhugu, obugomi, obongwa bunene, obunizi, entambala, obubeshi, amayeri mabi, okuvebana,
30 banaderha abandi kubi, banashomba Mungu, bantu b’akabonerero, b’echiburi, banachihala. Banapanga kukola amabi, barhakenga abazere,
31 barhajira bwenge, barhakenga ebi balaganyanaga, barhajira kasisi, barhajira na bonjo.
32 Chiro akaba oku bayinji bwinja oku Mungu aderhere oku abanakola ebintu bili nk’ebyola bakwanene olufu, bali bagenderera kubijira, banali basimiswa n’abanabijira.
Mahugulo m'efo
^ Ao “Bagurana.”
