Oku Baroma 2:1-29
2 Ego muntu we, nk’oli wachira abandi olubanja orhakababalirwa chiro akaba oli nde, bulala amango oli wachira abandi olubanja, oba eyi nawe wachichirire olubanja, bulala nawe weli wacha olubanja onakola ebyola byen’ebyo.
2 Rhumenyere oku olubanja Mungu anachira abantu banakola ebintu bili nk’ebyola luba l’okuli.
3 Ego muntu we, oli wawaza oku amango wamachira abantu banakola ebintu bili nk’ebyola olubanja nawe okashuba kubikola, wakafuma olubanja lwa Mungu si?
4 Changwa oli wasuzagura obwinja bunene bwa Mungu, okulembera n’okulindira kwage? Orhenji k’oku bwinja bwage ali alonza akuyerekeze ewa kuhungama?
5 Aliko eju y’erhwe lyawe lizibu n’omurhima gwawe gurhalonzeze kuhungama, oli washula Mungu oburhe. Nj’abuyerekana oku lusiku l’okuchira abantu boshi olubanja, nj’anacha olubanja omu kunali.
6 Nj’alipa na buli muntu omu kukulikiza ebijiro byage:
7 akalamo k’esiku n’amango ku balala bali balonza obukuuze, olukengo embere za Mungu n’akalamo karhakafa omu kulembera eyi banali bakola ebinja;
8 aliko abantu b’entambala barhakenga okuli si banakenga ebirhali by’okunali, nji balipwa oburhe n’obukali.
9 Nji haba amalibuko n’omulago ku buli muntu onakola amabi, kurhangirira oku Muyahudi naho oku Mugiriki;
10 aliko nji haba obukuuze, olukengo n’omurhula ku buli muntu onakola amenja, kurhangirira oku Muyahudi naho oku Mugiriki.
11 Bulala Mungu arhajira kabolo.
12 Abantu boshi bajirire ebyaha buzira kumenya amarhegeko nji baharabiswa buzira marhegeko; aliko boshi bajirire ebyaha eyi baherhe amarhegeko nji bachirwa olubanja kugerera amola marhegeko.
13 Bulala abanayunva amarhegeko arhali ba banyakunali embere za Mungu, si abanakola eby’amarhegeko maderhere ba nji batangazwa oku bali banyakunali.
14 Amango abarhali Bayahudi barhajira marhegeko bamakola eby’amarhegeko maderhere oku bwabo-bwabo, chiro akaba oku nta marhegeko bajira, banayerekana oku amarhegeko maba omu mirhima yabo.
15 Banayerekana oku ebiderherwe omu marhegeko biyandikirwe omu mirhima yabo, n’ezamiri zabo zinabiyemeza, n’omu mawazo mabo banamenya akaba baherhe egosa changwa nanga.
16 Ebyola nji byaba amango Mungu nj’achira abantu boshi olubanja kugerera Kristu Yesu oku bintu bakolere omu bwibisho, nk’oku emyazi minja yinatangaza ederhere.
17 Bobuno, akaba oli wachiyirika Muyahudi, onalangalire amarhegeko n’okuchivugira Mungu,
18 omenyere obulonza bwage onayemerere ebintu binja bulala wayigirizwe Amarhegeko,
19 onachizerere oku oli muntu w’okuyerekeza empumi, oli mwangaza omu mwizimya,
20 muntu onagorora abahwinja, mwalimu w’abana badorho, oherhe obumenyi butosheze bw’enyigirizo z’omusinji n’obukweri buli omu Marhegeko. . .
21 Woyo wenayigiriza abandi, bulagurhe nawe orhachiyigiriza? Woyo wenahubiri, “Orhayibaga,” bulagurhe oli waja wayiba?
22 Woyo w’eli waderha, “Orhajiraga obugonyi,” bulagurhe oli waja wajira obugonyi? Woyo wenaderha k’onashomba esanamu, gurhe oli waja wayiba omu mahekalu?
23 Oli wachitapa* oku oyinji Amarhegeko, bulagurhe oli waja wasuzagura Mungu omu kuvuna Amarhegeko?
24 Bulala nka kulala binayandikirwe, “Abantu b’amashanja bali badukanga ezino lya Mungu eju yenyu.”
25 Omu bukweri, okukatwa* kuherhe enyungu akaba oli wakenga amarhegeko; aliko akaba oli wavuna amarhegeko, okukatwa kwawe kwanahinduka kurhakatwa.
26 Bobuno, akaba omuntu orhakatirwe* ali akola ebikwanene bihemerwe omu Marhegeko, chiro akaba oku arhakatirwe Mungu yewe amubona oku akatirwe, arhali ntyo si?
27 N’omuntu orhakatirwe* oku mubiri, omu kukenga Amarhegeko anayerekana k’oli munyamagosa chiro akaba k’oherhe amarhegeko mayandikirwe onakatirwe.
28 Bulala Omuyahudi w’okuli arhali olala obonekene oku ali Muyahudi oku mubiri, n’okukatwa* k’okuli kurhali kukatwa oku mubiri.
29 Aliko Omuyahudi w’okuli ali olala oli Muyahudi omu ndani, n’okukatwa* k’okuli kuli kukatwa k’omurhima kugerera eroho s’arhali kugerera amarhegeko mayandikirwe. Mungu yenasingiza omuntu oli nk’oyola s’arhali abantu.
