Oku Baroma 16:1-27
16 Namabamenyesa mwali-werhu Foyibe, mukozi w’omu chibaga ch’omu Kankreya,
2 omu kuntu mumukaribise mu Waliha nk’oku abachesibwa bakwanene kukaribiswa, munamuhe byoshi akaba akenere bulala anaderhera bantu banene, chiro nani nyenyine.
3 Mundamusize Priska na Akila, berhu bakozi mu Kristu Yesu,
4 balihirire akalamo kabo omu buhanya eju yani. Arhali nyenyine nye mbabwirire koko si n’ebibaga byoshi by’abantu b’amashanja bibabwirire koko.
5 Mulamuse n’echibaga chinajirira embuganano omu mwabo. Mulamuse omuzigirwa wani Epaineto oli omu banafunzi barhanzi ba Kristu b’omu Aziya.
6 Mulamuse Mariya wabakoleere bwenene.
7 Mulamuse bachi bani Androniko na Yuniya rhwashwekwaga haguma, bantu bamenyikene bwenene n’entumwa bamanalegama kundusha eyi bali omu buguma na Kristu.
8 Mundamusize Ampliyato muzigirwa wani mu Waliha.
9 Mulamuse Iribe, werhu mukozi mu Kristu, n’omuzigirwa wani Staki.
10 Mulamuse Apele wayemererwe mu Kristu. Mulamuse ab’omu mwa Aristobulo.
11 Mulamuse muchi wani Herodiyone. Mulamuse ab’omu mwa Narsise bali mu Waliha.
12 Mulamuse Trifene na Trifoze bakazi banakola bwenene mu Waliha. Mulamuse omuzigirwa werhu Persise, bulala akolere bwenene mu Waliha.
13 Mulamuse Rufo wachishogerwe mu Waliha, mulamuse na nyina onali nyaama.
14 Mulamuse Asinkrito, Flegoni, Hermesi, Patroba, Herma, na bene-berhu bali haguma nabo.
15 Mulamuse Filologo na Jili, Nereya na mwali-wabo, Olimpa n’abachesibwa boshi bali haguma nabo.
16 Mulamusane mweshi n’ebize nchesibwa. Ebibaga byoshi bya Kristu bibalamwise.
17 Bene-berhu, mbahemere mulole abali balerha okurhayunvikana n’okurhuma abandi bagoma, ebintu birhapatene n’ebimwayigire, mubayake.
18 Bulala abantu bali nk’abola barhali baja ba Waliha Kristu si bali baja b’enda zabo. Kugerera ebinwa by’okununiriza n’eby’okusingiza-singiza banashumika emirhima y’abantu barhachirhegereze.
19 Okukenga kwenyu kwamenyikene oku bantu boshi, che chirhumire ngwerhe obusime eju yenyu. Indonzeze mugwarhe obwengehe yi murhegera ebintu binja aliko mube buzira chisobe oku bilolere ebintu bibi.
20 Oku bwage, hanola hofi Mungu onahaana omurhula avunyongolera Shetani eshishi w’ebishando byenyu. Olukogo rhurhakwanene lwa Waliha Yesu lube haguma nenyu.
21 Owerhu mukozi Timoteyo abalamwise, na bachi bani Lukiyo, Yasoni na Sosipata babalamwise.
22 Nyono Tertiyo, wayandikaga manola maruba, nani mbalamwise mu Waliha.
23 Gayo warhukaribisize omu mwage nyono n’echibaga choshi abalamwise. Eraste onabika efuranga z’evile abalamwise, na Kwarto mwene-wabo abalamwise.
24 ——
25 Mungu wakabakomeza kugerera emyazi minja ndi natangaza, amahubiri oku bilolere Yesu Kristu, n’okubishulwa kw’esiri nchesibwa yabaga yabishirwe kurhangira mira,
26 aliko ekala emenyikene oku bantu b’amashanja moshi kugerera Amandiko m’obulebi, omu kukulikiza erhegeko lya Mungu olamire esiku n’amango, olonzeze abantu b’amashanja moshi bamuyemere banamukenge,
27 emwa Mungu yewe yenyine ojira obwengehe, habe obukuuze kugerera Yesu Kristu esiku n’amango. Ame.
