Oku Baroma 13:1-14
13 Buli muntu akenge abarhegesi, bulala nta bukulu bubaho burharhengaga emwa Mungu. Obukulu bubaho bwahirirweho na Mungu omu byeo bibaho.
2 Che chirhumire owapinga oburhegesi, eyi amapinga omupango gwa Mungu; n’abantu boshi banabupinga eyi bali bachikululira obuhane.
3 Bulala abola barhegesi bakwanene bayubahwe, arhali eju y’ebijiro binja, s’eju y’ebibi. Wakasima orhayubahaga abarhegesi si? Ogenderere kujira ebinja, wasingizwa eju y’echola;
4 bulala bali bakozi ba Mungu emwawe oku nyungu yawe. Aliko akaba oli wajira ebibi, oyubahe, bulala barhahekera engorho busha. Bali bakozi ba Mungu, b’okuha owakolere ebibi obuhane.
5 Aliko hali eyindi mpanvu erhumire mukwanene kukenga, arhali eju y’okuyubaha obuhane s’eju y’ezamiri yenyu.
6 Echola che chinarhuma munalipa n’ebitansi; bulala abola barhegesi banakolera abantu amango moshi, n’omu kujira ntyo bali bakozi ba Mungu.
7 Muhe buli muntu ebi akwanene: ohemere echitansi, mumuhe echitansi; ohemere ehoro, mumuhe ehoro; ohemere obuba, mumuyubahe; ohemere olukengo, mumuhe olukengo.
8 Orhabaga omu deni ly’omuntu olekere ely’okuzigirana; bulala ozigiire omuturanyi wage eyi amayeneza ebi amarhegeko mahemere.
9 Bulala amarhegeko maderhere, “Orhakwanene kujira obugonyi, orhakwanene kuyirha, orhakwanene kuyiba, orhakwanene kuyongwa.” Amandi marhegeko moshi mashwekerwe mw’ebila binwa: “Okwanene kuzigira omuturanyi wawe nk’oku ochizigira.”
10 Obuzigire burhakolera omuturanyi amabi; che chirhumire obuzigire k’okuyeneza eby’amarhegeko mahemere.
11 Munajire ntyo bulala mumenyere echihe rhulamiremo. Kanola kakala kasanzi k’okusisimuka omu ro, bulala zene obuchunguke bwerhu bukala buli hofi bwenene kulusha amango rhwabaga bemezi.
12 Obudufu bwagera hale; bukala buli hofi kucha. Che chirhumire rhuchikule kw’ebijiro byoshi by’omu mwizimya rhuyambale entwaro z’omu mwangaza.
13 Rhuchigendese nk’okubihemere kuchigendesa omu mwangaza gw’ezuba. Arhali omu fete zikabize, arhali omu bulalu, arhali omu bubaraga n’olugenzi l’obumaguza lwa buzira shoni, arhali omu buhaka n’obongwa.
14 Ahubwe muyambale Waliha Yesu Kristu, murhanayinjaga mwapanga ebintu by’okuyeneza enyifinjo z’omubiri.
