N te tai ae waekoa ngkana e a kairiri Ana Tautaeka ae boou te Atua mai karawa i aoia aomata ni kabane, ao e nang riki te aonnaba bwa te tabo ae kakukurei are a nang kaai ni maeka iai aomata ma te kukurei ao ni karaoa ae raoiroi ma mwakuri aika a na rauaki iai. E a tia te Atua ni mwiokoa Iesu Kristo bwa e na kairiri n te aonnaba ni kabutaa. Ni boong aikai, a bati taani kairiri aika aki tabeakinia raoi aomata, ma e kaokoro Iesu ibukina bwa e na boni karaoa ae te kabanea n tamaroa ibukia aomata. E na boto ana kairiri i aon te tangira ao e na riki bwa te Uea ae akoi, e nanoanga, ao e kakaraoa ae riai.​—Itaia 11:4.

A nang aki manga kakaokoroia aomata ni kaineti ma abaia ke aia reeti. A nang katiteuanaaki aomata ni kabane. (Te Kaotioti 7:​9, 10) Aomata ni kabane aika maeka n te aonnaba, a nang tangira te Atua ao n tangiriia raoia n aomata, ao a nang kaai n ibuobuoki ma te rau, ni kakororaoa ana moani kantaninga te Atua, ae tararuaan raoi mwengaia ae te aonnaba.​—Taian Areru 115:16.

Ngkana e a kairiri Ana Tautaeka n Uea te Atua n te aonnaba ao e nang taraia raoi te tia Karikiriki bwa a nang nakoraoi bwaai ni kaineti ma tauani kanoan te bong. (Taian Areru 24:​1, 2) Ngke e katoka te angibuaka ae karuanikai Iesu ao e kaotia iai bwa e boni kona ni karaoia ni mwaakan te Atua. (Mareko 4:​39, 41) Ai akea ae nangi manga maaka te kabuanibwai ae karina i aan ana kairiri Kristo. Ngkana e a kairiri Ana Tautaeka n Uea te Atua, ao ti nangi maeka ma te rau ma maan, ao ti nang aki manga urua ara otabwanin.​—Otea 2:18.

A nangi bane ni kororaoi marurungia aomata. Akea ae e na manga aoraki, n rikirake ni kara, ke ni mate. (Itaia 35:​5, 6) A nang nora te tabo ae tamaroa ma n itiaki aomata are a noria naba ara moani karo n te onnaroka are Eten. E nangi mari te aonnaba ae boou n aron Eten ao e na rangi ni bati kanaia kaain te aonnaba. (Karikani Bwaai 2:9) Aomata ni kabane a nang ‘amwarake ni kanaia ni karokoa nuaia’ n aroia ana aomata rimoa te Atua ake tibun Iteraera. ​—Nakoaia Ibonga 26:​4, 5.

A nangi bane aomata n nora te rau i aan ana tautaeka te Atua are e na kabutaa te aonnaba, ao a nang iakoakoi i marenaia ao ni kakaraoa ae riai. A nang akea taiani buaka, akea te aomata ae e nangi manga kabongana buaka mwaakana, ao a nangi bane n reke baike ti kainnanoi. E berita ni kangai te Baibara: “Ane a na tekateka temanna ma temanna i aan arokana ae te kureebe ao i aan arokana ae te biiku, ao akea temanna ae e na kakamaakuia.”​—Mika 4:​3, 4.

A nangi bane n toa utu ma mwengaia ao akea ae e na maaka are e na manga bua mwengana, ao a nang uaana mwakuri nako ake ti karaoi. N aron ae taku te Baibara, a “na aki korakai ibukin te akea,” ke e na akea uaaia, naake a maeka n ana aonnaba ae boou te Atua.​—Itaia 65:​21-23.

E berita ni kangai te Baibara: “E na boni buta te aonnaba n ataakin Iehova.” (Itaia 11:9) A nang karekea wanawanaia ae bati aomata aika maeka i aan Ana Tautaeka n Uea te Atua mairoun aia tia Karikiriki ae Iehova, ao wanawanaia naba ni kaineti ma baike e karikii aika raraoi. A nang aki kabongana aia atatai ni karaoi bwaai ni buaka ke ni karuanikaia raoia n aomata. (Itaia 2:4) Ma a nang reireinia aroni karekean te rau i marenaia, ao aroia n tararuaa te aonnaba.​—Taian Areru 37:11.

E korakora aron ana katauraoi te Atua ibukin te aonnaba aei bwa ti aonga ni kona ni kukurei ni maiu iai ni katoabong. Bon nanona bwa a na maiu aomata n aki toki n te aonnaba. (Taian Areru 37:29; Itaia 45:18) E na bon “onga te mate n aki toki” te Atua bwa e aonga ni kakororaoa ana moani kantaninga. (Itaia 25:8) E berita ni kangai te Baibara: “E nang akea riki te mate, ke te nanokawaki ke te tang ke te maraki.” (Te Kaotioti 21:4) E na boni karekea te Atua te anga are a na kona ni maiu n aki toki iai aomata ni kabane, ake taekaia te koraki ake e kamaiuia ngke e kamaunaia aomata aika buakaka, ao te koraki ake a mate aika aki kona ni warekaki ake e na kautiia nakon te aonnaba ae boou.​—Ioane 5:​28, 29; Mwakuri 24:15.

 Mirion ma mirion aomata aika a tia naba ngkai ni kakatauraoia bwa a aonga ni kona ni mena i aan Ana Tautaeka n Uea te Atua ae e a rangi ni kaan ngkai. E ngae ngke a aki kororaoi, ma a a kamani kekeiaki ni kataia n riki bwa aeka n aomata ake e tangiriia te Atua bwa a na maeka n ana aonnaba ae boou. N te aro raa? N aroia n reiakina taekan Iehova ae te Atua ao taekan teuare kanakomaia are Iesu Kristo.​—Ioane 17:3.

Kakaae nako riki i aon arom ni kona ni kamaiuaki n tokin te aonnaba aei, ao i aon arom ni kona ni maiu n te aonnaba ae tamaroa riki ae e a rangi ni kaan roko ngkai. Butimwaea te reirei n te Baibara ae aki kabooaki mairoun temanna Ana Tia Kakoaua Iehova, ni kabonganaan te boki ae Ko Kona ni Kukurei n Aki Toki!