MWAKORO NIMAUA

Okira “te Tia Kawakintiibu ae Mataniwi i Aoni Maiumi”

KAMAIUA

Ko a tia n rinanon te kangaanga teuana ke ae bati riki, ake a maroroakinaki n te boroutia aei? Ngkana ngaia anne, bon tiaki tii ngkoe n rinanona. A bati ana toro te Atua aika kakaonimaki n taai ake rimoa n te Baibara ao ni boong aikai, ake a aitara naba ma kangaanga ae aron akanne. N aron ae a tia ni karekei buokaia mairoun Iehova bwa a na tokanikai i aoia, ko boni konaa naba.

E na boni butimwaeiko Iehova ngkana ko okiria

KAKOAUAA raoi ae e na boni butimwaeiko Iehova ngkana ko okiria. E na buokiko n tokanikai i aon te raraoma, te marakinnano ao karekean te rau n ara iango ao nanora, are nako man itiakin te mataniwi n nano. Imwin anne, ko a kona ni manga tangira te kani beku ma tarim n te onimaki ibukin Iehova. Titeboo te bwai ae ko rinanona ma Kristian tabeman n te moan tienture, are e koroboki te abotoro Betero nakoia ni kangai: “Kam tiotionako n aroia tiibu ngkoa, ma kam a okira ngkai te tia kawakintiibu ae te mataniwi i aoni maiumi.”—1 Betero 2:25.

Okiran Iehova bon te kabanea n tamaroa n iango. Bukin tera? Bwa ko kakimwareireia iai nanona. (Taeka N Rabakau 27:11) N aron ae ko ataia, iai ana namakin Iehova, ngaia are e kona n rotaki n ara mwakuri. Ni koauana, e aki kairoroira Iehova bwa ti na tangiria ao ni beku irouna. (Te Tua-Kaua 30:19, 20) E taekinna ni kangai temanna te tia rabakau n te Baibara: “Bon akea bwaini kaukani mataroan nanon te aomata mai tinaniku, bwa e riai ni kaukaki mai nanona.” Ti kona ni kauka te mataroa anne, n arora n taromauria Iehova ma tangirana ni koaua iroura. Ni karaoan anne, ti a anganna te bwaintituaraoi ae kakawaki, ae kakaonimakira ma te nano ae eti, ao ti kakimwareireia nanona. Eng, akea kabotauan te kimwareirei ae ti rinanona man anganakin Iehova riaina n taromauriaki.—Mwakuri 20:35; Te Kaotioti 4:11.

Irarikin anne, ngkana ko a okira arom n taromauria te Atua, a na bati riki kakabwaiaam ni bwaai n taamnei. (Mataio 5:3) N te aro raa? A nanokokoraki aomata aika bati ao a taku: ‘Bukin tera ngkai ti mena ikai?’ A bwarui kaekaan titiraki ibukin manenan te maiu aei. Iai irouia aomata kainnanoan anne ibukina bwa e karikiia Iehova ma ngaia. E karaoira bwa ti na boni kukurei ni beku ibukina. Akea riki te raunnano ae korakora ae kona n reke man ataan ae ti taromauria Iehova ibukina bwa ti tangiria.—Taian Areru 63:1-5.

Taiaoka n ataia ae e tangiriko Iehova bwa ko na okiria. Ko na kangaa ni koaua iai? Iangoa aei: E katauraoaki te boroutia aei ma te tataro ae bati. Tao e kaotia nakoim te unimwaane n te ekaretia ke tarim n te onimaki temanna. Ikanne are ko a kairaki iai bwa ko na warekia ao ni maiuakinna. E kaotaki n aei bwa e aki mwaninga taekam Iehova. Ma e karauko raoi ni katikiko nakoina.—Ioane 6:44.

Ti kona ni karekea te raunnano n ataan ae e bon aki mwaninga Iehova taekaia ana toro aika tiotionako. Anne are e kakaitau iai te tari te aine ae Donna. E taku: “I a tia n tiotionako man te koaua, ma I aki toki ni kananoa au iango n Taian Areru 139:23, 24, ae kangai: ‘Te Atua, nenerai ao ataa nanou. Tuoai ao atai tabeaiangan au iango, ao noria bwa iai i nanou te aro ae karuanikai ke akea, ao kairirai n te kawai ae teimatoa n aki toki.’ I ataia bwa I aki riai ni kaaina te aonnaba ae I bon aki tau iai, ao I kakoauaa ae I riai ni mena n ana botaki Iehova. I a ataia ae e bon aki kitanai Iehova, ma I tii riai ni kakaaea angau n okiria. Ao I rangi ni kukurei bwa I a tia ni karaoia!”

“I a ataia ae e bon aki kitanai Iehova, ma I tii riai ni kakaaea angau n okiria”

Ti tataro ma nanora ni koaua bwa ko na manga okira “te kimwareirei are e anga Iehova.” (Neemia 8:10) Ko na bon aki uringaaba ngkana ko okira Iehova.

Kaekaan Titiraki Ibukin Okiran Iehova

N NA MOANNA MA IA?

E bae te aomata ae e aoraki ni kan okiri baike e kakaraoi ni katoabong, teutana imwin teutana. N aron anne, ko kona ni kakorakora am onimaki ngkana ko kataia ni butimwaei amwarake n taamnei, teutana imwin teutana ni katoabong. Tai iangoia bwa ko na karaoi bwaai ni kabane n tii te taina. Tao ko kona ni kabanea tabeua te miniti ni wareware ke n ongora n te Baibara ae raweaki, reiakina teuana kanoan ara boki, mamataku n ara atureti ae jw.org ke mataku n te kaetieti teuana ae oti n te terewitin n te atureti ae tv.jw.org. Kataia naba n ira botakin te ekaretia teuana, n te tai ae waekoa. Ao ae kakawaki riki, tataroa ana ibuobuoki Iehova. ‘Kabanei am iango n raraoma ni kaaki i aona, ibukina bwa e mumutiakiniko.’—1 Betero 5:7.

“Ngke I a aki tataromauri ao I a namakinna ae I maama naba n tataro. Ngke e a reke korakorau n tataro, e a taetae nakoiu te unimwaane n te ekaretia n au kaawa. E buokai bwa N na kakaitau nakon Iehova bwa e aki kaaki taekau. E kaungaai naba bwa N na moana au wareware n te Baibara ni katoabong. Ngke I karaoa anne, e a oki korakorau ao I a manga iriri bobotaki. N te tai ae aki maan, I a manga uataboa karaoan te mwakuri ni minita. I rangi ni kukurei bwa e aki roko n te kaaki taekau Iehova.”—Eeva.

TERA AROIA KAAIN TE EKARETIA NI BUTIMWAEAI?

Kakoauaa raoi bwa a na boni butimwaeiko ma te tangira kaain te ekaretia. N oneani mwin ae a na bwainingareiko ke ni motika taekam, a na boni kaota tangiram ao a na kabanea aia konaa ni kaungako.—Ebera 10:24, 25.

“I rangi ni maama n okira te Tabo n Taromauri. I iangoia bwa tera aroia raoraou nakoiu. E taku nakoiu temanna tarira te aine ae e a kara, are ai 30 ana ririki n te onimaki: ‘I kukurei ni butimwaeiko, Natiu nakoni mwengam!’ E rangi n torobaki nanou n taeka aikai. I a bon roko raoi ni mwengau ni koaua.”—Javier.

“I nako n te Tabo n Taromauri ao n tekateka i buki bwa I aonga n aki noraki. Ma, a bati ake a boni kinaai n iririu ngkoa ngke I uarereke. A butimwaeai ma n inga ma ngai, ike I a namakina iai te raunnano ae korakora. Titeboo ma I a bon roko raoi ni mwengau.”—Marco.

TERA AROIA UNIMWAANE NI BUOKAI?

A na butimwaeiko unimwaane ma te akoi. A na kamoamoako ibukin nanom ni kani kaoka “te tangira are reke iroum n te moantai.” (Te Kaotioti 2:4) A na buokiko ma te nanoanga, bwa ko na kaetii am kairua rimoa ma “te nano ae nimamannei.” (I-Karatia 6:1; Taeka N Rabakau 28:13) A kona ni bairea temanna bwa e na reirei ma ngkoe, tao n te boki ae Kaaniko Riki ma Iehova ke “Kawakiningkami n te Aro ae Kam Na Teimatoa n Tangiraki Iai Iroun Te Atua.” Karaua nanom bwa a na boni kabebeteko unimwaane, ao ni boutokaiko n aanga nako ake a konaa iai.—Itaia 32:1, 2.

“I nanon ririki aika wanua ake I mamaara iai n te onimaki, ao a aki toki unimwaane ni kakawarai. N te tai teuana, e kaotii nakoiu taamneira, temanna te unimwaane are e rawei ngkoa. I a uringi iai taai aika bati ake a kakukurei, ike I a tangiria ni manga kaoka kimwareireiu ngkoa ngke I beku iroun Iehova. A a tia unimwaane aika tatangira ni buokai, bwa N na manga karaoa au babaire ni bwaai n taamnei.”—Victor.

“E na Kakorakorako”

Iai n ara boki n anene ae Anene Nakon Iehova, kuuna aika a ringa te nano, ake a kona ni kabebeteko ao ni kaungako bwa ko na okira am beku iroun te Atua. N te katoto, iangoi mwanewen te kuna ae nambwa 60. A boto mwanewen te kuna ae “E na Kakorakorako” man 1 Betero 5:10.

E karokoa te koaua nakoim Iehova

Ni weteiko man te rotongitong.

E nora ingaingan nanom n ukeria

Ao ni kakaraoi bwaai aika raoiroi.

Ko beritana touan nanona.

E na teimatoa ni buokiko.
E anga natina ibukim Iehova.

E kan noriko n tokanikai.

E na anganiko te korakora Iah

Ngkai e aki taua Natina.

E na uringa kakaonimakim.

E na tararuai Ana bwai Iah.

(KORATI)

E kabooko te Atua n raraan Iesu.

E kani buokiko bwa ko na bon nene.

E na kairiko Iehova ao ni kamanoko.

Eng, e na buokiko, ko na korakora.

Ngkana ko na ongora anenean te kuna aei ao tabeua riki anenen te Tautaeka n Uea, nakon PUBLICATIONS > MUSIC.

Ko Bae Naba n Tangira

RONGORONGORA

Bubutii Reireim n te Baibara ae Aki Kabooaki ma Ana Tia Kakoaua Iehova

Discuss a Bible topic with Jehovah’s Witnesses, or try out our free Bible study program.

OKIRA IEHOVA