1. Mɛni atsɔɔ bo yɛ mɔ ni bɔ nibii fɛɛ lɛ he?

KƐ́ OFƆLƆI lɛ Yehowa Odasefoi ji amɛ lɛ, belɛ ekã shi faŋŋ akɛ, amɛtsɔɔ bo Yehowa he nii kɛjɛ ogbekɛbiiashi tɔ̃ɔ. Amɛtsɔɔ bo akɛ lɛ ebɔ nibii fɛɛ, eyɛ sui kpakpai, ni eto eyiŋ akɛ wɔsɛɛ lɛ, ebaahã shikpɔŋ lɛ fɛɛ atsɔ paradeiso.​—1 Mo. 1:1; Bɔf. 17:24-27.

2. Te mɛi komɛi naa mɛi ni heɔ amɛyeɔ akɛ Nyɔŋmɔ ni bɔ nibii fɛɛ lɛ amɛhãa lɛ tɛŋŋ?

² Shi mɛi pii heee amɛyeee akɛ Nyɔŋmɔ yɛ, aahu ni amɛbaahe amɛye akɛ lɛ ebɔ nibii fɛɛ. Moŋ lɛ, amɛkɛɔ akɛ nibii ni yɔɔ wala mli lɛ diɛŋtsɛ ni ba, ni akɛ yɛ shishijee mli lɛ, amɛtamɔ muawai bibiibibii ni amɛtsake fiofio ni amɛbatsɔmɔ nibii ni wɔnaa ŋmɛnɛ lɛ. Mɛi ni wieɔ nibii ni tamɔ nɛkɛ lɛ ateŋ mɛi komɛi etee skul waa. Amɛteŋ mɛi komɛi kɛɔ akɛ, jeŋ shikpamɔ ehã ana akɛ nɔ ni Biblia lɛ wieɔ lɛ bɛ mli, ni akɛ mɛi ni heɔ amɛyeɔ akɛ mɔ ko ni bɔ nibii fɛɛ lɛ leee nii, amɛskulyaa faaa, ni amɛjwɛŋmɔ esako.

3. Mɛni hewɔ esa akɛ wɔhã wɔhemɔkɛyeli mli awa?

³ Nibii ni mɛi komɛi ni etee skul waa lɛ kɛɔ lɛ hãa mɛi komɛi susuɔ akɛ jeee Yehowa ni bɔ nibii fɛɛ. Kɛ́ ebaaba lɛ nakai yɛ wɔgbɛfaŋ jio, ebaŋ lɛ nakai jio lɛ, fɛɛ damɔ nɔ hewɔ ni wɔheɔ wɔyeɔ akɛ Yehowa ni bɔ nibii fɛɛ lɛ nɔ. Ani kɛɛmɔ ni akɛɛ wɔ akɛ Yehowa ni bɔ nibii fɛɛ lɛ hewɔ wɔheɔ wɔyeɔ akɛ lɛ ebɔ lɛ? Aloo wɔ diɛŋtsɛ wɔhe be wɔtao nii amli ni wɔna nakai? (1 Kor. 3:12-15) Ekɔɔɔ he eko afii abɔ ni wɔkɛsɔmɔ Yehowa lɛ, esa akɛ wɔya nɔ wɔhã hemɔkɛyeli ni wɔyɔɔ yɛ emli lɛ mli awa. Kɛ́ wɔfee nakai lɛ, mɛi ni heee nɔ ni Biblia lɛ wieɔ lɛ amɛyeee lɛ nyɛŋ amɛkɛ “jeŋ nilee kɛ tsɔɔmɔi ni sɛɛnamɔ bɛ he” alaka wɔ. (Kol. 2:8;  Heb. 11:6) Yɛ nikasemɔ nɛɛ mli lɛ, wɔbaakwɛ (1) nɔ hewɔ ni mɛi pii heee amɛyeee akɛ Nyɔŋmɔ ni bɔ nibii fɛɛ, (2) bɔ ni wɔbaafee wɔhã hemɔkɛyeli ni wɔyɔɔ akɛ Yehowa ni bɔ nibii lɛ mli awa, kɛ (3) nɔ ni wɔbaafee koni nakai hemɔkɛyeli lɛ mli akagbɔjɔ. Enɛ baaye abua wɔ ni akalaka wɔ.

4. Yɛ nɔ ni awie yɛ Hebribii 11:1 lɛ naa lɛ, kɛ́ akɛɛ mɔ ko yɛ hemɔkɛyeli lɛ, te atsɔɔ tɛŋŋ?

⁴ Mɛi komɛi susuɔ akɛ kɛ́ akɛɛ mɔ ko yɛ hemɔkɛyeli lɛ, no tsɔɔ akɛ mɔ lɛ kpɛlɛɔ nɔ fɛɛ nɔ ni akɛɔ lɛ lɛ nɔ kɛ́ ebɛ nɔdaamɔnɔ po. Shi Biblia lɛ hãa wɔnaa akɛ jeee nakai eji. (Kanemɔ Hebribii 11:1.) Etsɔɔ wɔ akɛ kɛ́ mɔ ko heɔ nɔ ko eyeɔ lɛ, belɛ mɔ lɛ yɛ odaseyeli ni yɔɔ faŋŋ ni tsɔɔ akɛ nakai nii lɛ yɛ. Akɛ nɔkwɛmɔnɔ lɛ, eyɛ mli akɛ wɔnaaa Yehowa, Yesu, kɛ Maŋtsɛyeli lɛ moŋ, shi wɔyɛ odaseyeli ni tsɔɔ faŋŋ akɛ amɛyɛ. (Heb. 11:3) Jeŋ shikpalɔ ko ni batsɔ Odasefonyo lɛ wie akɛ: “Yehowa Odasefoi yɛ nɔdaamɔnɔ kɛhã nibii fɛɛ ni amɛheɔ amɛyeɔ lɛ, ni amɛkuuu amɛhiɛ amɛshwieee nibii ni jeŋ shikpalɔi etao nii amli amɛna lɛ anɔ.”

5. Mɛni hewɔ mɛi pii heee amɛyeee akɛ Nyɔŋmɔ ni bɔ nibii fɛɛ ni yɔɔ wala mli lɛ?

⁵ Kɛ́ odaseyeli ni yɔɔ faŋŋ yɛ ni tsɔɔ akɛ Nyɔŋmɔ ni bɔ nibii fɛɛ ni yɔɔ wala mli lɛ, belɛ mɛni hewɔ mɛi pii heee enɛ amɛyeee lɛ? Amɛteŋ mɛi komɛi yɛ ni amɛheko be ni amɛkɛbaasusu nibii ni tsɔɔ akɛ Nyɔŋmɔ ni bɔ nibii fɛɛ ni yɔɔ wala mli lɛ he. Oblanyo ko ni atsɛɔ lɛ Robert ni bianɛ lɛ eji Yehowa Odasefonyo lɛ wie akɛ: “Be ni miyaa skul lɛ fɛɛ lɛ, atsĩii tã atsɔɔɔ wɔ akɛ mɔ ko ni bɔ nibii. No hewɔ lɛ, mi hu misusu akɛ jeee mɔ ko ni bɔ. Nɛkɛ ji bɔ ni misusu aahu kɛyashi mikɛ Yehowa Odasefoi kpe be ni miye afii 22 lɛ. Amɛjɛ Biblia lɛ mli amɛhã  mina nibii ni yeɔ odase faŋŋ akɛ Nyɔŋmɔ ni bɔ nibii fɛɛ.” *​—Kwɛmɔ akrabatsa ni ji “ Sane Ko Ni He Hiaa Waa Ni Esa Akɛ Fɔlɔi Akadi.”

6. Mɛni hewɔ mɛi komɛi heee amɛyeee akɛ mɔ ko ni bɔ nibii fɛɛ lɛ?

⁶ Nɔ hewɔ ni mɛi komɛi heee amɛyeee akɛ Nyɔŋmɔ ni bɔ nibii fɛɛ ji, amɛkɛɛ amɛ lɛ ja amɛkɛ amɛhiŋmɛii ena nɔ ko dani amɛbaahe amɛye. Shi mɛi nɛɛ nɔŋŋ lɛ, amɛheɔ nibii komɛi ni amɛnaaa kɛ amɛhiŋmɛii lɛ amɛyeɔ akɛ eyɛ, tamɔ kɔɔyɔɔ nɛkɛ, ejaakɛ amɛyɛ odaseyeli ni tsɔɔ akɛ eyɛ. Nakai nɔŋŋ wɔnaaa nibii komɛi ni awie he yɛ Biblia lɛ mli lɛ kɛ wɔhiŋmɛii, shi ‘odaseyeli yɛ ni tsɔɔ faŋŋ’ akɛ amɛyɛ. (Heb. 11:1) Ja mɔ ko ehe be ekase nii dani ebaana odaseyeli ni tsɔɔ faŋŋ akɛ nibii nɛɛ yɛ, ni no ji nɔ ni wa hã mɛi pii lɛ. Kɛ́ mɔ ko heee be etaooo nii amli lɛ, ekolɛ ebaamu sane naa akɛ Nyɔŋmɔ ko bɛ.

7. Ani mɛi fɛɛ ni le woloŋ lɛ ni jeɔ ŋwane akɛ Nyɔŋmɔ ni bɔ je lɛ? Mɛni hewɔ okɛɔ nakai?

 ⁷ Jeŋ shikpalɔi komɛi ekase nii ni amɛna nibii ni ehã amɛyiŋ etsɔ akɛ Nyɔŋmɔ ni bɔ je lɛ. * Ekolɛ amɛteŋ mɛi komɛi yasusu akɛ jeee mɔ ko ni bɔ je lɛ ejaakɛ atsɔɔɔ amɛ nakai be ni amɛtee yunivɛsiti lɛ, tamɔ Robert ni wɔtsĩ etã kɛtsɔ hiɛ lɛ wie lɛ. Shi bianɛ lɛ, jeŋ shikaplɔi babaoo ebale Yehowa ni amɛbasumɔ lɛ. Bɔ ni jeŋ shikpalɔi nɛɛ kase nii ni no hã amɛbahe amɛye akɛ Nyɔŋmɔ yɛ lɛ, nakai esa akɛ wɔ fɛɛ wɔfee kɛ́ wɔyako skul pii po. Mɔ ko mɔ ko nyɛŋ efee nakai ehã wɔ.

8-9. (a) Mɛɛ sanebimɔi ahe wɔbaasusu? (b) Kɛ́ okase nibii ni Nyɔŋmɔ ebɔ lɛ ahe nii lɛ, mɛɛ gbɛ nɔ obaaná he sɛɛ?

⁸ Mɛni obaafee koni hemɔkɛyeli ni oyɔɔ akɛ Nyɔŋmɔ ni bɔ nibii fɛɛ lɛ mli awa? Hã wɔsusu nibii ejwɛ ni obaanyɛ ofee lɛ ahe.

⁹ Kasemɔ nibii ni Nyɔŋmɔ ebɔ lɛ ahe nii. Kɛ́ osusu kooloi, tsei kɛ fɔfɔi, kɛ ŋulamii ahe lɛ, ebaanyɛ ehã hemɔkɛyeli ni oyɔɔ akɛ Nyɔŋmɔ ni bɔ nibii lɛ mli awa. (Lala 19:1; Yes. 40:26) Kɛ́ otee nɔ okase nibii ni tamɔ enɛɛmɛi lɛ ahe nii lɛ, ebaahã hemɔkɛyeli ni oyɔɔ akɛ Nyɔŋmɔ ni bɔ nibii fɛɛ lɛ mli awa. Bei pii lɛ, awieɔ adebɔɔ nibii srɔtoi ahe yɛ wɔwoji lɛ amli. Kasemɔ saji nɛɛ kɛ́ amɛshishinumɔ wa kɛhã bo po. Ekolɛ onuŋ nɔ fɛɛ nɔ ni obaakase lɛ shishi, shi kɛ́ fioo po onu shishi lɛ ehi. Agbɛnɛ hu, akɛ vidioi srɔtoisrɔtoi ni kɔɔ adebɔɔ nibii ahe ni wɔkwɛ nyɛsɛɛ nɛɛ yɛ wɔkpokpaa wuji anɔ kpeei lɛ ashishi lɛ ewo wɔwɛbsaiti ni ji jw.org lɛ nɔ. Kɛ́ efee lɛ obaanyɛ okwɛ nomɛi hu.

10. Mɛɛ gbɛ nɔ adebɔɔ nibii yeɔ odase akɛ mɔ ko ni bɔ nibii fɛɛ? Okɛ enɛ he nɔkwɛmɔnɔ ahã. (Romabii 1:20)

¹⁰ Kɛ́ ookase adebɔɔ nibii ahe nii lɛ, susumɔ nɔ ni amɛtsɔɔ bo yɛ Nyɔŋmɔ mɔ ni bɔ nibii fɛɛ lɛ he lɛ he. (Kanemɔ Romabii 1:20.) Akɛ nɔkwɛmɔnɔ lɛ, hulu lɛ hãa wɔnáa la kɛ dɔlɛ, ni no hãa wɔnyɛɔ wɔhiɔ wala mli yɛ shikpɔŋ lɛ nɔ. Shi yɛ nakai beiaŋ nɔŋŋ lɛ, nɔ ko yɛ hulu la lɛ mli ni baanyɛ aye adesai awui. Bɔ ni afee ni nii nɛɛ akaye wɔ awui lɛ, nɔ ko yɛ shikpɔŋ lɛ he ni buɔ wɔhe. No ji kɔɔyɔɔ ko ni atsɛɔ lɛ ozone lɛ. Be ni nakai nii ni yɔɔ hulu la lɛ mli ni yeɔ awui lɛ naa waa lɛ, belɛ ozone lɛ hu mli miiti. Kɛ́ okwɛ bɔ ni nii nɛɛ tsuɔ ni ehãa lɛ, ani eba kɛkɛ? Aloo mɔ ko ni hiɛ kã shi ni yɔɔ suɔmɔ ni to he gbɛjianɔ?

11. Nɛgbɛ obaanyɛ oná saji ni kɔɔ adebɔɔ nibii ahe ni baanyɛ ahã ohemɔkɛyeli lɛ mli awa lɛ ekomɛi yɛ? (Kwɛmɔ akrabatsa ni ji “ Saji Ni Baanyɛ Ahã Ohemɔkɛyeli Lɛ Mli Awa.”)

¹¹ Kɛ́ okwɛ Niiamlitaomɔ Wolo Kɛhã Yehowa Odasefoi lɛ mli loo otee jw.org lɛ nɔ lɛ, obaanyɛ oná saji pii ni kɔɔ adebɔɔ nibii ahe ni baanyɛ ahã ohemɔkɛyeli lɛ mli awa. Obaanyɛ okɛ saji kɛ vidioi ni yɔɔ wɛbsaiti lɛ fã ni ji “Ani Mɔ Ko Ni Fee?” lɛ aje shishi. Saji kɛ vidioi nɛɛ asɛɛ kɛlɛɛɛ, ni amɛtsɔɔ wɔ nibii komɛi ni sa kadimɔ yɛ kooloi kɛ adebɔɔ nibii krokomɛi ahe. Agbɛnɛ hu, amɛwieɔ bɔ ni jeŋ shikpalɔi ekase kooloi kɛ adebɔɔ nibii krokomɛi ahe nii, ni amɛkɛmiitsu nii yɛ nibii ni amɛfeɔ amli lɛ he.

12. Kɛ́ wɔmiikase Biblia lɛ, mɛɛ nibii komɛi esa akɛ wɔkɛ wɔjwɛŋmɔ aya nɔ?

¹² Kasemɔ Biblia lɛ. No mli lɛ, jeŋ shikpalɔ lɛ ni wɔwie ehe kɛtsɔ hiɛ lɛ heee eyeee akɛ Nyɔŋmɔ ni bɔ nibii fɛɛ. Shi sɛɛ mli lɛ, ebahe eye. Ewie akɛ: “Jeee nibii ni mikase yɛ adebɔɔ he lɛ pɛ ni hã mibahe miye akɛ Nyɔŋmɔ ni bɔ nibii fɛɛ. Shi agbɛnɛ hu, mikase Biblia lɛ jogbaŋŋ.” Ekolɛ bo lɛ, ole Biblia lɛ mli jogbaŋŋ. Shi fɛɛ sɛɛ lɛ, esa akɛ oya nɔ okase Biblia lɛ koni hemɔkɛyeli ni oyɔɔ akɛ Nyɔŋmɔ ni bɔ  nibii fɛɛ lɛ mli awa. (Yos. 1:8; Lala 119:97) Akɛ nɔkwɛmɔnɔ lɛ, jwɛŋmɔ bɔ ni Biblia lɛ wieɔ nibii ni etee nɔ lɛ ahe fitsofitso, bɔ ni gbalɛi ni yɔɔ mli lɛ eba mli, kɛ bɔ ni saji ni yɔɔ mli lɛ kɛ amɛhe kpãa gbee lɛ nɔ. Enɛ baahã hemɔkɛyeli ni oyɔɔ akɛ mɔ ni bɔ wɔ lɛ sumɔɔ wɔ, ehiɛ kã shi, ni Biblia lɛ ji e-Wiemɔ lɛ mli awa. *​—2 Tim. 3:14; 2 Pet. 1:21.

13. Mɛni ji ŋaawoi kpakpai ni yɔɔ Biblia lɛ mli lɛ ateŋ eko?

¹³ Kɛ́ ookase Nyɔŋmɔ Wiemɔ lɛ, susumɔ bɔ ni emli ŋaawoo lɛ yeɔ ebuaa mɛi waa lɛ he. Akɛ nɔkwɛmɔnɔ lɛ, Biblia lɛ ejɛ jeeŋmɔ ebɔ kɔkɔ akɛ shika suɔmɔ yeɔ awui ni ehãa mɛi kɛ ‘piŋmɔi babaoo gbulɔ amɛhe.’ (1 Tim. 6:9, 10; Abɛi 28:20; Mat. 6:24) Ani kɔkɔbɔɔ nɛɛ kɔɔ wɔhe ŋmɛnɛ? Wolo ko ni wieɔ bɔ ni mɛi feɔ amɛnii amɛhãa yɛ wɔbei nɛɛ amli lɛ he lɛ wie akɛ: “Mɛi ni nuɔ he akɛ shika he hia fe nɔ fɛɛ nɔ lɛ ateŋ mɛi pii bɛ miishɛɛ, ni amɛhao waa. Mɛi po ni miishwe kɛkɛ ni amɛná shika fioo amɛfata nɔ ni amɛyɔɔ lɛ he lɛ hu bɛ miishɛɛ, ni amɛnáaa gbɔmɔtsoŋ hewalɛ kpakpa.” No hewɔ lɛ, ŋaa ni Biblia lɛ ewo akɛ wɔkasumɔ shika lɛ ji ŋaawoo kpakpa. Mɛɛ Biblia mli ŋaawoi krokomɛi eye ebua bo yɛ shihilɛ mli? Kɛ́ wɔjwɛŋ ŋaawoi kpakpai pii ni yɔɔ Biblia lɛ mli lɛ ahe kɛ bɔ ni amɛhe yɔɔ sɛɛnamɔ lɛ, wɔbaana akɛ mɔ ni bɔ wɔ lɛ sumɔɔ wɔ waa, ni ele nɔ ni hi hã wɔ, ni no baahã wɔkɛ wɔhiɛ afɔ̃ enɔ daa. (Yak. 1:5) Ni kɛ́ wɔkɛ wɔhiɛ fɔ̃ enɔ lɛ, wɔbaaná miishɛɛ waa yɛ shihilɛ mli.​—Yes. 48:17, 18.

14. Kɛ́ okase Biblia lɛ, mɛni no baahã ona yɛ Yehowa he?

¹⁴ Kɛ́ ookase Biblia lɛ, okɛfee oti ni ma ohiɛ akɛ ootao ole Yehowa jogbaŋŋ. (Yoh. 17:3) Kɛ́ okase Biblia lɛ, obaana Yehowa sui lɛ kɛ bɔ ni efeɔ enii ehãa, ni obaana akɛ sui nɛɛ nɔŋŋ ona be ni okase adebɔɔ nibii ahe nii lɛ. Enɛ baahã ona akɛ Yehowa yɛ lɛɛlɛŋ. (2 Mo. 34:6, 7; Lala 145:8, 9) Kɛ́ obale Yehowa jogbaŋŋ lɛ, ohemɔkɛyeli lɛ mli baawa, obaasumɔ lɛ waa, ni naanyobɔɔ ni yɔɔ okɛ lɛ teŋ lɛ hu mli baawa.

15. Kɛ́ ogba mɛi nibii ni okase yɛ Nyɔŋmɔ he lɛ, mɛɛ gbɛ nɔ obaaná he sɛɛ?

¹⁵ Gbaa mɛi nibii ni okase yɛ Nyɔŋmɔ he lɛ. Kɛ́ ofee nakai lɛ, ohemɔkɛyeli lɛ mli baawa. Shi kɛ́ okɛ mɔ ko yaagba Nyɔŋmɔ he sane, ni ekɛɛ bo akɛ lɛ lɛ eheee eyeee akɛ Nyɔŋmɔ yɛ, ni onaaa nɔ ni obaakɛɛ lɛ lɛ, mɛni esa akɛ ofee? Taomɔ nii amli yɛ wɔwoji lɛ amli koni ona ŋmalɛi kɛ saji ni obaanyɛ okɛ mɔ lɛ asusu he. (1 Pet. 3:15) Aloo obaanyɛ obi nyɛmi kroko ni eye ebua bo ni ona nɔ ni obaanyɛ okɛɛ mɔ lɛ. Kɛ́ mɔ lɛ kpɛlɛ nɔ ni obaatsɔɔ lɛ kɛjɛ Biblia lɛ mli lɛ nɔ jio, ekpɛlɛɛɛ nɔ jio lɛ, obaaná niiamlitaomɔ ni ofee lɛ he sɛɛ. Ohemɔkɛyeli lɛ mli baawa, ni mɛi ni le woloŋ waa ni kɛɔ akɛ jeee mɔ ko ni bɔ nibii lɛ, nyɛŋ alaka bo.

16. Mɛni hewɔ esa akɛ wɔya nɔ wɔfee nibii ni baahã wɔhemɔkɛyeli lɛ mli awa lɛ?

¹⁶ Ekɔɔɔ he eko afii abɔ ni wɔkɛsɔmɔ Yehowa lɛ, esa akɛ wɔya nɔ wɔfee nibii ni baahã wɔhemɔkɛyeli lɛ mli awa. Mɛni hewɔ? Ejaakɛ kɛ́ wɔfeee nakai lɛ, wɔhemɔkɛyeli lɛ mli baagbɔjɔ. Tamɔ bɔ ni wɔkase kɛtsɔ hiɛ lɛ, hemɔkɛyeli ji nibii ni wɔnaaa lɛ ahe odaseyeli ni yɔɔ faŋŋ. Ni kɛ́ wɔnaaa nɔ ko lɛ, ewaaa akɛ wɔjwɛŋmɔ baaje nɔ. No hewɔ ni Paulo tsɛ hemɔkɛyeli ni abɛ lɛ akɛ “esha ni lalaa wɔ oya lɛ.” (Heb. 12:1) No hewɔ lɛ, mɛni baaye abua wɔ ni wɔhemɔkɛyeli lɛ mli akagbɔjɔ?​—2 Tes. 1:3.

17. Mɛni baaye abua wɔ ni wɔhemɔkɛyeli lɛ mli awa daa?

¹⁷ Klɛŋklɛŋ lɛ, sɔlemɔ okpa Yehowa fai daa ni edro bo emumɔ krɔŋkrɔŋ lɛ. Mɛni hewɔ? Ejaakɛ hemɔkɛyeli fata yibii ni mumɔ lɛ woɔ lɛ he. (Gal. 5:22, 23) Kɛ́ Yehowa kɛ emumɔ krɔŋkrɔŋ  lɛ yeee ebuaaa wɔ lɛ, wɔnyɛŋ wɔná hemɔkɛyeli ni mli wa. Kɛ́ wɔkpa Yehowa fai be fɛɛ be ni ehã wɔ emumɔ lɛ, ekɛbaahã wɔ. (Luka 11:13) Wɔbaanyɛ wɔsɔle wɔkɛɛ lɛ akɛ: “Hã wɔhemɔkɛyeli lɛ ada.”​—Luka 17:5.

18. Yɛ nɔ ni awie yɛ Lala 1:2, 3 lɛ naa lɛ, mɛɛ hegbɛ wɔná ŋmɛnɛ?

¹⁸ Nɔ ni ji enyɔ lɛ, kasemɔ Nyɔŋmɔ Wiemɔ lɛ daa. (Kanemɔ Lala 1:2, 3.) Be ni aŋma lala nɛɛ lɛ, no mli lɛ, Israelbii fioo pɛ yɔɔ Nyɔŋmɔ Mla muu lɛ fɛɛ eko. Shi no mli lɛ, maŋtsɛ lɛ kɛ osɔfoi lɛ yɛ eko. Ni daa afii kpawo lɛ, atoɔ gbɛjianɔ ni akaneɔ Nyɔŋmɔ Mla lɛ ahãa ‘hii, yei, gbekɛbii, kɛ gbɔi’ fɛɛ ni yɔɔ Israel lɛ. (5 Mo. 31:10-12) Yɛ Yesu beiaŋ lɛ, mɛi fioo pɛ yɔɔ Ŋmalɛ lɛ eko, ni akɛ eko hu toɔ kpeehe lɛ. Shi ŋmɛnɛ lɛ, mɛi babaoo yɛ Nyɔŋmɔ Wiemɔ muu lɛ fɛɛ loo efã ko. Enɛ ji hegbɛ kpele diɛŋtsɛ. Mɛni wɔbaanyɛ wɔfee kɛtsɔɔ akɛ wɔhiɛ sɔɔ hegbɛ nɛɛ?

19. Kɛ́ wɔmiitao wɔhemɔkɛyeli lɛ mli awa daa lɛ, mɛni esa akɛ wɔfee?

¹⁹ Kɛ́ wɔkane Nyɔŋmɔ Wiemɔ lɛ daa lɛ, no baatsɔɔ akɛ wɔhiɛ sɔɔ hegbɛ ni wɔná akɛ wɔyɛ Nyɔŋmɔ Wiemɔ lɛ eko lɛ. Esa akɛ wɔto be ni wɔkɛkane Biblia lɛ ni wɔkase, shi jeee ni wɔbaata shi ni kɛ́ wɔná dekã lɛ dani wɔyafee. Kɛ́ wɔkase Biblia lɛ daa lɛ, wɔhemɔkɛyeli lɛ mli baawa daa.

20. Mɛni esa akɛ wɔtswa wɔfai shi akɛ wɔbaafee?

²⁰ Wɔtamɔɔɔ “hiɛshikalɔi kɛ nilelɔi” ni yɔɔ je nɛɛ mli lɛ; wɔ lɛ wɔhemɔkɛyeli damɔ Biblia lɛ nɔ. (Mat. 11:25, 26) Biblia lɛ ni wɔkase lɛ hewɔ lɛ, wɔle nɔ hewɔ ni nibii yaa nɔ efiteɔ yɛ shikpɔŋ lɛ nɔ kɛ nɔ ni Yehowa baafee yɛ he. No hewɔ lɛ, nyɛhãa wɔtswaa wɔfai shi akɛ wɔbaafee nibii ni baahã wɔhemɔkɛyeli lɛ mli awa, ni wɔye wɔbua mɛi pii ni amɛ hu amɛbahe amɛye akɛ mɔ ko ni bɔ nibii fɛɛ. (1 Tim. 2:3, 4) Wɔsɛɛ lɛ, mɛi fɛɛ ni yɔɔ shikpɔŋ lɛ nɔ lɛ baajie Yehowa yi ni amɛwie wiemɔi ni yɔɔ Kpojiemɔ 4:11 lɛ. Jɛmɛ kɛɔ akɛ: “Yehowa wɔ-Nyɔŋmɔ, bo ji mɔ ni sa akɛ akɛ anunyam lɛ . . . ahã, ejaakɛ bo obɔ nibii fɛɛ.” Wɔmiikpa be nɛɛ gbɛ waa!