Wolo Ni Akɛmaje Galatiabii Lɛ 5:1-26

  • Kristofoi aheyeli (1-15)

  • Nyiɛmɔ yɛ mumɔ naa (16-26)

    • Heloo lɛ nitsumɔi (19-21)

    • Yibii ni mumɔ lɛ woɔ (22, 23)

5  Ejaakɛ nɛkɛ heyeli nɛɛ hewɔ Kristo hã wɔye wɔhe lɛ. No hewɔ lɛ, nyɛdamɔa shi shiŋŋ,+ ni nyɛkahãa akɛ nyɛ woa nyɔŋyeli kɔɔŋtso shishi dɔŋŋ.+  Naa! Mi Paulo, mi diɛŋtsɛ miikɛɛ nyɛ akɛ kɛ́ nyɛhã afolɔ nyɛ ketia lɛ, Kristo he baŋ sɛɛnamɔ ko kɛhãŋ nyɛ.+  Miisaa miiye odase miitsɔɔ gbɔmɔ fɛɛ gbɔmɔ ni hãa afoɔ lɛ ketia lɛ akɛ, sɔ̃ kã enɔ akɛ eya nɔ eye Mla muu lɛ fɛɛ nɔ.+  Nyɛ mɛi ni nyɛtaoɔ akɛ atsɔ mla nɔ abu nyɛ jalɔi lɛ, ekɔɔɔ he eko mɛi ni nyɛji lɛ, atse nyɛ kɛje Kristo he;+ nyɛje edromɔ lɛ mli.  Ejaakɛ yɛ wɔgbɛfaŋ lɛ, wɔtsɔɔ mumɔ lɛ nɔ wɔkɛ miishɛɛ mɛɔ jalɛ ni wɔhiɛ kã nɔ yɛ hemɔkɛyeli hewɔ lɛ.  Ejaakɛ Kristo Yesu mli lɛ, ketiafoo loo ketia ni afoko he bɛ sɛɛnamɔ ko,+ shi hemɔkɛyeli ni tsɔɔ suɔmɔ nɔ etsuɔ nii lɛ ji nɔ ni he yɔɔ sɛɛnamɔ.  Kulɛ nyɛmiida foi lɛ jogbaŋŋ.+ Namɔ tsĩ nyɛ gbɛ koni nyɛkaya nɔ nyɛbo anɔkwale lɛ toi?  Nɛkɛ yiŋtsɔmɔ nɛɛ, jeee mɔ ni tsɛɔ nyɛ lɛ mli ejɛ.  Ashikishaŋ-sha bibioo shaa ashikishaŋ muu lɛ fɛɛ.+ 10  Miyɛ nɔmimaa akɛ nyɛ mɛi ni nyɛ kɛ Nuŋtsɔ lɛ efee ekome lɛ,+ nyɛnáŋ jwɛŋmɔ kroko; shi mɔ ni gbaa nyɛnaa lɛ,+ ekɔɔɔ he eko mɔ ni eji lɛ, ebaaná toigbalamɔ ni sa lɛ. 11  Nyɛmimɛi, mi lɛ, kɛ́ mikã he miishiɛ ketiafoo lɛ, mɛni hewɔ awaa mi yi lolo? Kɛ́ nakai ni lɛ, belɛ ajie piŋmɔ tso*+ lɛ he nanetɔ̃tɔmɔnɔ lɛ kɛje jɛmɛ. 12  Miná ni kulɛ mɛi ni miibɔ mɔdɛŋ ni amɛfutu nyɛyiŋ lɛ folɔ amɛnuutsei amɛshwie.* 13  Nyɛmimɛi, heyeli mli atsɛ nyɛ kɛba; nyɛkɛ nɛkɛ heyeli nɛɛ akatsua nii akɛ hegbɛ ni nyɛná ni nyɛkɛaatiu nibii ni heloo lɛ shweɔ lɛ asɛɛ kɔkɔɔkɔ,+ shi moŋ nyɛtsɔa suɔmɔ nɔ nyɛsɔmɔa nyɛhe akɛ nyɔji.+ 14  Ejaakɛ awo Mla muu lɛ fɛɛ obɔ* yɛ kitã kome nɛɛ mli akɛ: “Suɔmɔ onyɛmi gbɔmɔ tamɔ bo diɛŋtsɛ ohe.”+ 15  Shi kɛ́ nyɛtee nɔ nyɛkɔmɔkɔmɔɔ nyɛhe ni nyɛmimii nyɛhe lɛ,+ nyɛkwɛa jogbaŋŋ ni nyɛkayea nyɛhe awui.+ 16  Shi miikɛɛ akɛ, Nyɛyaa nɔ nyɛnyiɛa yɛ mumɔ lɛ naa,+ ni nyɛfeŋ nibii ni heloo lɛ shweɔ lɛ eko kwraa.+ 17  Ejaakɛ nibii ni heloo lɛ shweɔ lɛ teɔ shi woɔ mumɔ lɛ, ni mumɔ lɛ hu teɔ shi woɔ heloo lɛ; enɛɛmɛi kɛ amɛhe yeee, ni no hewɔ ni nyɛfeee nibii tuuntu ni nyɛsumɔɔ akɛ nyɛfee lɛ.+ 18  Agbɛnɛ hu, kɛ́ mumɔ lɛ tsɔɔ nyɛ gbɛ lɛ, belɛ nyɛbɛ mla shishi. 19  Agbɛnɛ, anaa heloo lɛ nitsumɔi lɛ faŋŋ, ni nomɛi ji ajwamaŋbɔɔ,*+ muji nii, jeŋba gbonyo ni efeee mɔ hiɛgbele,*+ 20  amagajamɔ, mumɔi kɛshãramɔ,*+ nyɛɛ, béi, awuŋayeli, mlifu, naataamɔi, mligbálamɔi, jamɔ kui, 21  hetsɛ̃, dãatɔɔ,+ henaabuamɔi* ni yɔɔ hoo, kɛ nibii ni tamɔ enɛɛmɛi.+ Miikɛɛ nyɛ miifɔ̃ shi, tamɔ bɔ ni mibɔ nyɛ kɔkɔ momo lɛ, akɛ mɛi ni yaa nɔ amɛfeɔ nɛkɛ nibii nɛɛ anine shɛŋ Nyɔŋmɔ Maŋtsɛyeli lɛ nɔ.*+ 22  Shi yibii ni mumɔ lɛ woɔ lɛ ji suɔmɔ, miishɛɛ, toiŋjɔlɛ, tsuishitoo, mlihilɛ, ekpakpafeemɔ,+ hemɔkɛyeli, 23  mlijɔlɛ, henɔyeli.+ Mla ko bɛ ni teɔ shi woɔ nibii ni tamɔ enɛɛmɛi. 24  Agbɛnɛ hu, mɛi ni ji Kristo Yesu nii lɛ, amɛkala heloo lɛ kɛ ekɔnɔi kɛ nibii ni eshweɔ lɛ fɛɛ amɛkpɛtɛ tso jaŋŋ lɛ he.+ 25  Kɛ́ wɔhiɔ shi yɛ mumɔ lɛ naa lɛ, nyɛhãa wɔyaa nɔ wɔnyiɛa jogbaŋŋ yɛ mumɔ lɛ naa hu.+ 26  Nyɛkahãa wɔnaa wɔhe tsɔ,+ ni wɔteɔ akaŋshii shi yɛ wɔteŋ,+ ni wɔhe miitsɛ̃tsɛ̃ɛ wɔhe.

Shishigbɛ Niŋmaa

Loo “sa amɛhe; tsɔmɔ osaii,” ni no baatsɔɔ akɛ amɛsaaa mɛi ni kɛ mla lɛ nɔŋŋ ni amɛjieɔ yi amɛhãa mɛi lɛ tsuɔ nii.
Shishitsɔɔmɔi komɛi kɛɔ akɛ, “afoɔ Mla muu lɛ fɛɛ kuku.”
Greek mli lɛ, por·neiʹa. Kwɛmɔ Wiemɔi Titrii Amligbalamɔ lɛ.
Loo “nyɛnyɛŋtswibɔɔ.” Greek, a·selʹgei·a. Kwɛmɔ Wiemɔi Titrii Amligbalamɔ lɛ.
Loo “ŋkunyaayeli; tsofai kɛnitsumɔ.”
Loo “okpɔlɔŋmɛi.”
Greek sht. ŋm., “náŋ Nyɔŋmɔ Maŋtsɛyeli lɛ akɛ gboshinii.”