Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

Wolo Ni Ji Enyɔ Ni Akɛmaje Tesalonikabii Lɛ 1:1-12

EMLI SAJI

  • Ŋamɔ (1, 2)

  • Tesalonikabii lɛ ahemɔkɛyeli lɛ miida (3-5)

  • Abaatɔ toigbolɔi lɛ ahe owele (6-10)

  • Asɔle ahã asafo lɛ (11, 12)

1  Paulo, kɛ Silvano,* kɛ Timoteo+ kɛ wolo nɛɛ miimaje Tesalonikabii asafo ni kɛ Nyɔŋmɔ, ni ji wɔ-Tsɛ lɛ, kɛ Nuŋtsɔ Yesu Kristo efee ekome lɛ:  Dromɔ kɛ toiŋjɔlɛ ni jɛ Nyɔŋmɔ, ni ji Tsɛ lɛ, kɛ Nuŋtsɔ Yesu Kristo dɛŋ lɛ ahã nyɛ.  Nyɛmimɛi, sɔ̃ kã wɔnɔ akɛ wɔdaa Nyɔŋmɔ shi be fɛɛ be yɛ nyɛhewɔ. Enɛ sa jogbaŋŋ, ejaakɛ nyɛhemɔkɛyeli lɛ miida naakpa, ni suɔmɔ ni nyɛteŋ mɔ fɛɛ mɔ kɛsumɔɔ enyɛmi lɛ miifa kɛmiiya nɔ.+  Enɛ hewɔ lɛ, wɔ diɛŋtsɛ wɔkɛ nyɛ shiɔ wɔtsitsi+ yɛ Nyɔŋmɔ asafoi lɛ amli, yɛ nyɛshifimɔ kɛ nyɛhemɔkɛyeli yɛ yiwai kɛ shihilɛi ni mli wawai* ni nyɛtsɔɔ mli* lɛ fɛɛ hewɔ.+  Enɛ ji odase ni tsɔɔ Nyɔŋmɔ jalɛ kojomɔ ni hãa abuɔ nyɛ mɛi ni sa Nyɔŋmɔ Maŋtsɛyeli lɛ, nɔ ni yɛ anɔkwale mli lɛ, nyɛnaa nɔ yɛ he lɛ.+  Nɔ hewɔ ni enɛ baa lɛ nakai ji akɛ, eja yɛ Nyɔŋmɔ gbɛfaŋ akɛ ekɛ amanehulu ato mɛi ni hãa nyɛnaa amanehulu lɛ najiaŋ.+  Shi nyɛ mɛi ni nyɛnaa amanehulu lɛ, abaahã nyɛ kɛ wɔ fɛɛ aná hejɔlɛ, be ni abaajie Nuŋtsɔ Yesu kpo+ kɛaajɛ ŋwɛi ni ebɔfoi ni yɔɔ hewalɛ lɛ fata ehe lɛ+  yɛ la ni tsoɔ mli, be ni etɔɔ owele yɛ mɛi ni leee Nyɔŋmɔ kɛ mɛi ni booo wɔ-Nuŋtsɔ Yesu he sane kpakpa lɛ toi lɛ anɔ lɛ.+  Mɛi nɛɛ baaná toigbalamɔ ni ji naanɔ hiɛkpatamɔ+ ni baajie amɛ kɛje Nuŋtsɔ lɛ hiɛ kɛ agbɛnɛ hu kɛje ehewalɛ lɛ anunyam lɛ he, 10  be ni ebaaba koni awo ehiɛ nyam yɛ emɛi krɔŋkrɔŋi lɛ agbɛfaŋ, ni mɛi fɛɛ ni he amɛye lɛ* anaa akpɛ amɛhe yɛ ehewɔ yɛ nakai gbi lɛ nɔ lɛ, ejaakɛ nyɛná hemɔkɛyeli yɛ odase ni wɔye yɛ nyɛteŋ lɛ mli. 11  Enɛ nɔŋŋ hewɔ lɛ, wɔsɔleɔ wɔhãa nyɛ be fɛɛ be koni wɔ-Nyɔŋmɔ lɛ abu nyɛ akɛ nyɛsa etsɛmɔ lɛ,+ koni ekɛ ehewalɛ lɛ atsu nibii kpakpai fɛɛ ni saa ehiɛ lɛ kɛmɔ shi, ni egbe hemɔkɛyeli nitsumɔ fɛɛ hemɔkɛyeli nitsumɔ naa. 12  Enɛ baahã awo wɔ-Nuŋtsɔ Yesu hiɛ nyam yɛ nyɛmli, ni nyɛ hu nyɛhiɛ aba nyam yɛ ekome ni nyɛ kɛ lɛ efee lɛ hewɔ, yɛ wɔ-Nyɔŋmɔ lɛ kɛ Nuŋtsɔ Yesu Kristo dromɔ lɛ naa.

Shishigbɛ Niŋmaa

Atsɛɔ lɛ Sila hu.
Loo “amanehului.”
Loo “nyɛfiɔ shi yɛ mli.”
Loo “mɛi fɛɛ ni jie hemɔkɛyeli kpo lɛ.”