Klɛŋklɛŋ Wolo Ni Akɛmaje Timoteo 6:1-21

  • Esa akɛ nyɔji kɛ woo ahã amɛnuŋtsɔmɛi (1, 2)

  • Amale tsɔɔlɔi kɛ shikasuɔmɔ (3-10)

  • Gbɛtsɔɔmɔi kɛhã Nyɔŋmɔ gbɔmɔ (11-16)

  • Tekemɔ nɔ yɛ nitsumɔi kpakpai amli (17-19)

  • Buu nɔ ni atu awo odɛŋ lɛ he (20, 21)

6  Mɛi ni yɔɔ nyɔŋyeli kɔɔŋtso shishi lɛ aya nɔ abu amɛnuŋtsɔmɛi lɛ akɛ mɛi ni sa akɛ akɛ woo babaoo ahã amɛ,+ koni mɔ ko akawie Nyɔŋmɔ gbɛ́i lɛ kɛ tsɔɔmɔ lɛ he efɔŋ ko kwraa.+  Agbɛnɛ hu, mɛi ni yɔɔ nuŋtsɔmɛi ni heɔ Nuŋtsɔ lɛ nɔ amɛyeɔ lɛ, ajie bulɛ kpo amɛtsɔɔ amɛ akɛni nyɛmimɛi ji amɛ lɛ hewɔ. Esa akɛ amɛsɔmɔ amɛ jogbaŋŋ fe tsutsu lɛ, ejaakɛ mɛi ni náa amɛsɔɔmɔ kpakpa lɛ he sɛɛ lɛ ji mɛi ni heɔ Nuŋtsɔ lɛ nɔ amɛyeɔ kɛ mɛi ni asumɔɔ. Yaa nɔ otsɔɔ nibii nɛɛ, ni okɛ wiemɔkɛtsɔɔmɔi nɛɛ ahã.  Kɛ́ mɔ ko tsɔɔ tsɔɔmɔ kroko ni ekpɛlɛɛɛ gbɛtsɔɔmɔ ni jɛ wɔ-Nuŋtsɔ Yesu Kristo ŋɔɔ ni hãa mɔ náa hewalɛ* lɛ nɔ,+ ni ekpɛlɛɛɛ tsɔɔmɔ ni kɛ Nyɔŋmɔjamɔ nyiɛ lɛ hu nɔ lɛ,+  no lɛ ewó ehe nɔ, ni enuuu nɔ ko nɔ ko shishi.+ Naataamɔi kɛ wiemɔi ahe ŋwanejei eye lɛ sɛkɛ.*+ Nibii ni jɛɔ enɛɛmɛi amli baa ji hetsɛ̃ kɛ béi kɛ wiemɔi fɔji kɛ mɛi ahe susumɔi fɔji  kɛ saji ni he ehiaaa ahe naataamɔi ni akpaaa, ni gbɔmɛi ni amɛjwɛŋmɔi efite+ ni ashɔ̃ anɔkwale lɛ yɛ amɛdɛŋ lɛ teɔ lɛ shi, mɛi ni susuɔ akɛ Nyɔŋmɔjamɔ ji nɔ ko ni akɛtaoɔ nii ahãa he lɛ.+  Eji anɔkwale akɛ, sɛɛnamɔ kpele yɛ Nyɔŋmɔjamɔ he,+ kɛji mɔ mii shɛɔ enii ahe kɛfataa he.*  Ejaakɛ wɔkɛ nɔ ko baaa je lɛ mli, ni wɔnyɛŋ wɔkɛ nɔ ko aya hu.+  No hewɔ lɛ, kɛ́ wɔyɛ niyenii* kɛ atade* lɛ, wɔmii baashɛ nibii nɛɛ ahe.+  Shi mɛi ni etswa amɛfai shi akɛ amɛbaatsɔmɔ niiatsɛmɛi lɛ gbeɔ kaa* kɛ tsɔne+ kɛ kwashiai akɔnɔi pii ni yeɔ awui ni kɛ gbɔmɛi yaa hiɛkpatamɔ kɛ fitemɔ mli lɛ amli.+ 10  Ejaakɛ shikasuɔmɔ ji nibii fɔji srɔtoi fɛɛ ashishifãi lɛ eko, ni akɛni mɛi komɛi di suɔmɔ nɛɛ sɛɛ hewɔ lɛ, amɛdu gbɛ kɛje hemɔkɛyeli lɛ he, ni amɛkɛ piŋmɔi babaoo egbulɔ amɛhe fɛɛ.+ 11  Shi bo lɛ, Ao Nyɔŋmɔ gbɔmɔ, joo nibii nɛɛ anaa foi. Shi tiumɔ jalɛ kɛ Nyɔŋmɔjamɔ kɛ hemɔkɛyeli kɛ suɔmɔ kɛ shifimɔ kɛ mlijɔlɛ sɛɛ.+ 12  Wu hemɔkɛyeli lɛ he ta kpakpa lɛ; mɔ naanɔ wala lɛ mli kpɛŋŋ, nɔ hewɔ ni atsɛ bo, ni ojaje jajemɔ fɛfɛo yɛ he yɛ odasefoi pii ahiɛ hu lɛ. 13  Miifã bo yɛ Nyɔŋmɔ, mɔ ni hãa nibii fɛɛ yaa nɔ hiɔ wala mli lɛ, kɛ Kristo Yesu, mɔ ni, akɛ odasefonyo lɛ, ejaje jajemɔ fɛfɛo yɛ Pontio Pilato hiɛ+ lɛ hiɛ 14  akɛ oye kitã lɛ nɔ yɛ gbɛ ni kpa ko bɛ he ni anáŋ he sane fɔŋ ko awie lɛ nɔ, kɛyashi wɔ-Nuŋtsɔ Yesu Kristo kpojiemɔ lɛ,+ 15  nɔ ni Nɔyelɔ kome pɛ ni yɔɔ hewalɛ waa ni yɔɔ miishɛɛ lɛ baajie kpo yɛ be* ni ato kɛhã no lɛ mli lɛ. Lɛ ji mɛi ni yeɔ nɔ akɛ maŋtsɛmɛi lɛ a-Maŋtsɛ, kɛ mɛi ni yeɔ nɔ akɛ nuŋtsɔmɛi lɛ a-Nuŋtsɔ,+ 16  mɔ hu ni lɛ ekome pɛ eyɔɔ wala ni sɛɛ nyɛŋ afo,+ ni ehiɔ la ni anyɛŋ abɛŋkɛ mli lɛ,+ mɔ ni gbɔmɔ ko gbɔmɔ ko enako lɛ dã,+ ni enyɛŋ lɛ ena hu lɛ. Lɛ enɔ ji woo kɛ naanɔ hewalɛ lɛ. Amen. 17  Wiemɔ otsɔɔ* mɛi ni ji niiatsɛmɛi yɛ jeŋ ni yɔɔ amrɔ nɛɛ* mli lɛ akɛ amɛkana amɛhe tsɔ,* ni amɛkɛ amɛhiɛ akafɔ̃ ninámɔ ni baanyɛ afiliki kɛya lɛ nɔ,+ shi moŋ amɛkɛ amɛhiɛ afɔ̃ Nyɔŋmɔ, mɔ ni kɛ nibii ni wɔnáa mli ŋɔɔmɔ lɛ fɛɛ hãa wɔ ni etekeɔ nɔ lɛ nɔ.+ 18  Kɛɛmɔ amɛ ni amɛtsu nitsumɔ kpakpa, amɛteke nɔ yɛ nitsumɔi kpakpai amli, amɛfee ejurɔ,* amɛsumɔ nihãmɔ,+ 19  koni amɛkɛbua jwetri naa shweshweeshwe amɛhã amɛhe ni efee faneshi kpakpa kɛhã wɔsɛɛ,+ koni amɛmɔ wala diɛŋtsɛ lɛ mli kpɛŋŋ.+ 20  Timoteo, buu nɔ ni atu awo odɛŋ lɛ he,+ ni otsi ohe kɛje wiemɔi ni sɛɛnamɔ bɛ he ni buleɔ krɔŋkrɔŋ nii kɛ agbɛnɛ hu, susumɔi ni kɛ amɛhe kpãaa gbee ni amaleɔ akɛɔ akɛ eji “nilee” lɛ ahe.+ 21  Akɛni mɛi komɛi kɛ nilee nɛɛ shwãa hewɔ lɛ, amɛdu gbɛ kɛje hemɔkɛyeli lɛ he. Dromɔ lɛ kɛ nyɛ ahia shi.

Shishigbɛ Niŋmaa

Loo “ní tsaa mɔ; ní sɛɛnamɔ yɔɔ he.”
Loo “ehé ejwɛŋmɔ bɔ ni esaaa.”
Greek sht. ŋm., “kɛji mɔ hãa nii ni eyɔɔ lɛ faa hãa lɛ kɛfataa he.”
Loo “nɔ ni wɔkɛlɛɔ wɔhe.”
Loo “wɔɔhe.” Greek sht. ŋm., “hehaanii.”
Ni ji, efɔŋ he kaa.
Greek sht. ŋm., “bei.”
Loo “Fã.”
Loo “yinɔ ni yɔɔ amrɔ nɛɛ; shihilɛ gbɛjianɔtoo ni yɔɔ amrɔ nɛɛ.” Kwɛmɔ Wiemɔi Titrii Amligbalamɔ lɛ.
Loo “amɛkajwɛŋ nii wuji.”
Loo “amɛdɛŋ akpɔ.”