2 Mose 34:1-35

  • Ako tɛi tɛtrɛbii hei (1-4)

  • Mose na Yehowa anunyam lɛ (5-9)

  • Awie kpaŋmɔ lɛ mli nibii lɛ ahe ekoŋŋ (10-28)

  • Mose hiɛ kpɛ́ (29-35)

34  Ni Yehowa kɛɛ Mose akɛ: “Ko tɛi tɛtrɛbii enyɔ ni tamɔ klɛŋklɛŋ tɛi lɛ ohã ohe,+ ni maŋma wiemɔi ni yɔɔ klɛŋklɛŋ tɛi tɛtrɛbii+ ni ojwara amɛ+ lɛ anɔ lɛ yɛ tɛi tɛtrɛbii nɛɛ anɔ.  Saamɔ ohe oto leebi, ejaakɛ leebi lɛ obaakwɔ kɛya Sinai Gɔŋ lɛ nɔ ni oyadamɔ mihiɛ yɛ jɛmɛ, yɛ gɔŋ lɛ yiteŋ.+  Shi mɔ ko mɔ ko akafata ohe kɛkwɔ kɛtee, ni akana mɔ ko mɔ ko hu yɛ gɔŋ lɛ nɔ he ko he ko. Toi loo tsinai po akayaye nii yɛ nakai gɔŋ lɛ hiɛ.”+  No hewɔ lɛ, Mose ko tɛi tɛtrɛbii enyɔ ni tamɔ klɛŋklɛŋ tɛi lɛ, ni ete shi leebi maŋkpa ni ekwɔ kɛtee Sinai Gɔŋ lɛ nɔ, tamɔ bɔ ni Yehowa efã lɛ lɛ, ni ehiɛ tɛi tɛtrɛbii enyɔ lɛ yɛ edɛ̃.  Kɛkɛ ni Yehowa kpeleke shi+ kɛba yɛ atatu lɛ mli, ni ebadamɔ emasɛi yɛ jɛmɛ, ni ejaje Yehowa gbɛ́i lɛ etsɔɔ.+  Yehowa batsɔ ehiɛ kɛho ni ejaje akɛ: “Yehowa, Yehowa, Nyɔŋmɔ mɔbɔnalɔ+ kɛ musuŋtsɔlɔ,*+ ní mli fuuu mra+ ni esuɔmɔ ni tsakeee+ kɛ enɔkwale*+ fa babaoo,  ejieɔ suɔmɔ ni tsakeee kpo etsɔɔ mɛi akpei abɔ,+ ekɛ tɔmɔ kɛ toigbele* kɛ esha keɔ,+ shi egbalaa mɛi ni yeɔ fɔ lɛ atoi,+ ekɛ tsɛmɛi atɔmɔi lɛ ahe toigbalamɔ baa bii kɛ nabii anɔ, kɛ yinɔ ni ji etɛ kɛ yinɔ ni ji ejwɛ lɛ nɔ.”+  Mose he fee oya ni ekula shi ni ekɛ ehiɛ bu shi.  Kɛkɛ ni ekɛɛ: “Yehowa, agbɛnɛ kɛji mihiɛ eba nyam yɛ ohiɛ lɛ, no lɛ, Yehowa, ofainɛ, eyɛ mli akɛ maŋ ni kuɛŋ ti ji wɔ+ moŋ, shi hii wɔteŋ kɛya,+ ní okɛ wɔtɔmɔ kɛ wɔhe esha lɛ ake wɔ,+ ní oŋɔ wɔ ofee bo diɛŋtsɛ onii.” 10  Ni lɛ hu ekɛɛ: “Naa, mikɛ nyɛ miikpaŋ kpaŋmɔ ko: Mafee naakpɛɛ nii ní afeko* eko dã yɛ shikpɔŋ lɛ nɔ fɛɛ loo yɛ jeŋmaji lɛ fɛɛ ateŋ,+ ni maji fɛɛ ni nyɛyɔɔ amɛteŋ lɛ baana Yehowa nitsumɔ lɛ, ejaakɛ nɔ ni mafee mahã nyɛ lɛ yɛ naakpɛɛ.+ 11  “Bo nɔ ni mifãa bo ŋmɛnɛ lɛ toi jogbaŋŋ.+ Naa, mashwie Amorbii kɛ Kanaanbii kɛ Hitbii kɛ Perizbii kɛ Hivbii kɛ Yebusbii lɛ kɛje ohiɛ.+ 12  Kwɛmɔ jogbaŋŋ ni okɛ shikpɔŋ ni oyaa nɔ lɛ nɔ bii lɛ akakpaŋ kpaŋmɔ ko,+ kɛjeee nakai lɛ, ebaatsɔ tsɔne yɛ nyɛteŋ.+ 13  Shi nyɛkumɔa amɛfɔleshaa latɛi lɛ nyɛshwiea shi, nyɛjwaraa amɛwɔŋ tɛi lɛ, ni nyɛfolɔa amɛwɔŋ tsei* lɛ nyɛshwiea shi.+ 14  Kaakoto nyɔŋmɔ kroko,+ ejaakɛ ale Yehowa akɛ ebiɔ* ni ajá ekome too pɛ.* Hɛɛ, eji Nyɔŋmɔ ni biɔ ni ajá ekome too pɛ.+ 15  Kwɛmɔ jogbaŋŋ ni okɛ shikpɔŋ lɛ nɔ bii lɛ akakpaŋ kpaŋmɔ ko, ejaakɛ kɛ́ amɛkɛ amɛnyɔŋmɔi lɛ miibɔ ajwamaŋ* ní amɛmiishã afɔle amɛmiihã amɛnyɔŋmɔi lɛ,+ mɔ ko baafɔ̃ bo nine, ni obaayaye efɔle lɛ eko.+ 16  Kɛkɛ lɛ, bɔ fɛɛ bɔ ni fee lɛ, obaaŋɔ amɛbiyei lɛ eko ohã obihii,+ ni amɛbiyei lɛ kɛ amɛnyɔŋmɔi lɛ baabɔ ajwamaŋ, ni amɛbaahã obihii lɛ hu kɛ amɛnyɔŋmɔi lɛ abɔ ajwamaŋ.+ 17  “Okɛ dade akafee nyɔŋmɔi.+ 18  “Ye Blodo Ni Ashikishaŋ-sha* Bɛ Mli Gbi Jurɔ+ lɛ. Ye blodo ni ashikishaŋ-sha bɛ mli, tamɔ bɔ ni mifã bo lɛ; feemɔ nakai gbii kpawo yɛ be ni ato yɛ Abib* nyɔɔŋ+ lɛ nɔ lɛ mli, ejaakɛ Abib nyɔɔŋ lɛ nɔ oshi Ejipt. 19  “Kromɔbi fɛɛ kromɔbi ni ji nuu* lɛ, minɔ ni,+ ni kooloi fɛɛ ni olɛɔ lɛ hu fata he, kɛ́ eji klɛŋklɛŋ tsinanuu jio, klɛŋklɛŋ toonuu jio.+ 20  Teji kromɔbi lɛ, okɛ too akpɔ̃ lɛ. Shi kɛ́ okpɔ̃ɔɔ lɛ lɛ, no lɛ, kuu ekuɛŋ. Obinuu fɛɛ obinuu ni ji kromɔ lɛ, kpɔ̃ lɛ.+ Mɔ ko mɔ ko akabapue yɛ mihiɛ kɛ edɛ̃ folo. 21  “Gbii ekpaa otsu nii, shi gbi ni ji kpawo lɛ nɔ lɛ, jɔɔmɔ ohe.*+ Humɔ beiaŋ kɛ nikpamɔ beiaŋ po lɛ, jɔɔmɔ ohe. 22  “Ni okɛ wiitikpamɔ lɛ mli klɛŋklɛŋ yibii lɛ aye Otsii Agbi Jurɔ lɛ, kɛ Nibii Anaabuamɔ Gbi Jurɔ* lɛ yɛ afi lɛ naagbee.+ 23  “Daa afi lɛ, ohii lɛ fɛɛ abapue yɛ Nuŋtsɔ Yehowa, Israel Nyɔŋmɔ lɛ, hiɛ shii etɛ.+ 24  Ejaakɛ mashwie jeŋmaji lɛ kɛje ohiɛ,+ ni malɛɛ ohusui lɛ amli, ni be ni otee oyaapue yɛ Yehowa, o-Nyɔŋmɔ lɛ, hiɛ shii etɛ daa afi lɛ, mɔ ko mɔ ko hiɛ ekɔ̃ŋ oshikpɔŋ lɛ nɔ. 25  “Okɛ ashikishaŋ-sha* nii ko kwraa akafata mifɔle lɛ lá lɛ he okɛbahã.+ Hehoo gbi jurɔ lɛ afɔle lɛ, kaahã je miitsɛre nɔ.+ 26  “Okɛ oshikpɔŋ lɛ nɔ nibaa nii lɛ amli klɛŋklɛŋ yibii ni hi fe fɛɛ lɛ aba Yehowa, o-Nyɔŋmɔ lɛ shĩa lɛ.+ “Okɛ abotiabi ko nyɛ fufɔ mli nu akahoo abotiabi lɛ.”+ 27  Yehowa tee nɔ ekɛɛ Mose akɛ: “Ŋmalamɔ wiemɔi nɛɛ oshwie shi,+ ejaakɛ mikɛ bo kɛ Israel miikpaŋ kpaŋmɔ yɛ wiemɔi nɛɛ anaa.”+ 28  Ni ekɛ Yehowa hi jɛmɛ jetsɛremɔ kɛ jenamɔ gbii 40. Eyeee nɔ* ko, ni enuuu nu hu.+ Ni Nyɔŋmɔ ŋma* kpaŋmɔ lɛ mli wiemɔi lɛ, ni ji Kitãi Nyɔŋma lɛ* yɛ tɛi tɛtrɛbii lɛ anɔ.+ 29  Agbɛnɛ, Mose jɛ Sinai Gɔŋ lɛ nɔ ekpeleke shi, ni ehiɛ Odaseyeli tɛi tɛtrɛbii enyɔ lɛ yɛ edɛ̃.+ Be ni Mose kpeleke shi kɛjɛ gɔŋ lɛ nɔ lɛ, eleee akɛ akɛni ekɛ Nyɔŋmɔ yawie lɛ hewɔ lɛ, ehiɛ miikpɛ́. 30  Be ni Aaron kɛ Israelbii lɛ fɛɛ na Mose lɛ, amɛna akɛ ehiɛ miikpɛ́, ni amɛshe gbeyei akɛ amɛbaabɛŋkɛ lɛ.+ 31  Shi Mose tsɛ amɛ, ni no hewɔ lɛ, Aaron kɛ Israelbii lɛ anukpai lɛ fɛɛ ba eŋɔɔ, ni Mose kɛ amɛ wie. 32  No sɛɛ lɛ, Israelbii lɛ fɛɛ tsi amɛbɛŋkɛ lɛ, ni ekɛ kitãi fɛɛ ni Yehowa kɛhã lɛ yɛ Sinai Gɔŋ lɛ nɔ lɛ hã amɛ.+ 33  Kɛ́ Mose kɛ amɛ wie egbe naa lɛ, ekɛ hiɛhaanɔ haa ehiɛ.+ 34  Shi kɛ́ Mose miiya ni ekɛ Yehowa ayawie lɛ, ejieɔ hiɛhaanɔ lɛ yɛ ehiɛ kɛyashi be ni ebaaje kpo.+ No sɛɛ lɛ, ejeɔ kpo ni eyahãa Israelbii lɛ leɔ kitãi ni akɛhã lɛ lɛ.+ 35  Ni Israelbii lɛ naa akɛ Mose hiɛ miikpɛ́; ni Mose saa ekɛ hiɛhaanɔ lɛ haa ehiɛ kɛyashi be ni ebaaya ni ekɛ Nyɔŋmɔ* ayawie ekoŋŋ.+

Shishigbɛ Niŋmaa

Loo “drolɔ.”
Loo “enɔkwayeli.”
Hebri sht. ŋm., “mlatɔmɔ.”
Loo “abɔko.”
Hebri sht. ŋm., “ejaakɛ Yehowa gbɛ́i lɛ biɔ.”
Loo “eŋmɛɛɛ mɛi ni kɛ lɛ peleɔ nii ahe lɛ gbɛ.”
Loo “kɛ́ amɛyeee anɔkwa akɛni amɛjáa amɛnyɔŋmɔi lɛ hewɔ.”
Hebri sht. ŋm., “Nɔ fɛɛ nɔ ni gbeleɔ musu naa.”
Loo “ye hejɔɔmɔ gbi.”
Atsɛɔ lɛ hu akɛ Asesei (Mama Tsũi) Agbi Jurɔ.
Hebri sht. ŋm., “blodo.”
Hebri sht. ŋm., “eŋma.” Kwɛmɔ kk. 1.
Hebri sht. ŋm., “Wiemɔi Nyɔŋma Lɛ.” Atsɛɔ lɛ hu akɛ Dekalɔg.
Hebri sht. ŋm., “lɛ.”