Lalai 119:1-176
-
Hiɛsɔɔ kɛhã Nyɔŋmɔ wiemɔ ni jara wa lɛ
א [Alef]
119 Mɛi ni sane ko bɛ amɛhe* yɛ amɛgbɛ nɔ lɛ yɛ miishɛɛ,Mɛi ni nyiɛɔ yɛ Yehowa mla lɛ mli lɛ.+
2 Mɛi ni yeɔ ekaimɔi lɛ anɔ lɛ yɛ miishɛɛ,+Mɛi ni kɛ amɛtsui fɛɛ taoɔ esɛɛ gbɛ lɛ.+
3 Amɛfeee nii ni ejaaa;Amɛnyiɛɔ yɛ egbɛi lɛ anɔ.+
4 Owo kitã akɛAye ofamɔi lɛ anɔ jogbaŋŋ.+
5 Miná ni manyɛ mafĩ shi shiŋŋ*+Koni manyiɛ otaomɔ nii lɛ asɛɛ!
6 Kulɛ mihiɛ gboŋ,+Kɛ́ mijwɛŋ okitãi lɛ fɛɛ anɔ.
7 Mikɛ tsui ni ja baajie oyi,Kɛ́ miná mile oyiŋkpɛi* ni ja lɛ.
8 Manyiɛ otaomɔ nii lɛ asɛɛ.
Ekaba kɔkɔɔkɔ akɛ obaakwa mi kwraa.
ב [Bet]
9 Te oblanyo baafee tɛŋŋ ehã egbɛ he atse lɛ?
Ja ekwɛ ehe nɔ jogbaŋŋ, ni eye owiemɔ lɛ nɔ.+
10 Mikɛ mitsui muu fɛɛ taoɔ osɛɛ gbɛ.
Kaahã midu gbɛ kɛje okitãi lɛ ahe.+
11 Mikɛ owiemɔ lɛ toɔ mitsui mli tamɔ jwetri+Koni mikafee esha mishi bo.+
12 Ao Yehowa, ajie oyi;Tsɔɔmɔ mi otaomɔ nii lɛ.
13 Mikɛ minaabu jajeɔYiŋkpɛi* fɛɛ ni jɛ onaa lɛ.
14 Mimii shɛɔ mihe yɛ okaimɔi lɛ ahe+Fe bɔ ni mimii shɛɔ mihe yɛ nibii kpakpai krokomɛi fɛɛ ahe lɛ.+
15 Majwɛŋ ofamɔi lɛ anɔ*+Ni mahã mihiŋmɛii ahi ogbɛi lɛ anɔ.+
16 Minyaa omlai lɛ ahe waa.
Mihiɛ kpaŋ owiemɔ lɛ nɔ.+
ג [Gimel]
17 Okɛ otsulɔ aye jogbaŋŋ,Koni mahi wala mli ni maye owiemɔ lɛ nɔ.+
18 Gbelemɔ mihiŋmɛiiKoni mana omla lɛ mli naakpɛɛ nibii lɛ jogbaŋŋ.
19 Gbɔ ji mi yɛ shikpɔŋ lɛ nɔ.+
Okɛ okitãi lɛ akatee mi.
20 Shwe ni mishweɔ oyiŋkpɛi* lɛ be fɛɛ be lɛEwo mi* hela.
21 Okãa mɛi ni yeɔ amɛtsuinaa sane lɛ ahiɛ,Mɛi ni alomɔ amɛ ni duɔ gbɛ kɛjeɔ okitãi lɛ ahe lɛ.+
22 Jiemɔ* hiɛshishwiemɔ kɛ heguɔgbee kɛje minɔ,Ejaakɛ miyeɔ okaimɔi lɛ anɔ.
23 Kɛ́ lumɛi po tara shi ni amɛmiiwie amɛmiishi mi lɛ,Otsulɔ jwɛŋɔ otaomɔ nii lɛ anɔ.*
24 Minyaa okaimɔi lɛ ahe waa;+Amɛji miŋaawolɔi.+
ד [Dalet]
25 Mikãa* shi yɛ mulu mli.+
Baamɔ miyi yɛ owiemɔ lɛ naa.+
26 Mijaje migbɛi lɛ mitsɔɔ bo, ni ohere mi nɔ;Tsɔɔmɔ mi otaomɔ nii lɛ.+
27 Hã manu nɔ ni ofamɔi lɛ tsɔɔ diɛŋtsɛ lɛ* shishi,Koni majwɛŋ onaakpɛɛ nitsumɔi lɛ anɔ.*+
28 Awerɛho sɔŋŋ hãaa manyɛ mawɔ.*
Okɛ owiemɔ lɛ awo mi hewalɛ.
29 Jiemɔ lakamɔ gbɛ kɛje mihe,+Ni okɛ omla lɛ adro mi.
30 Mikɔ anɔkwayeli gbɛ.+
Mina akɛ oyiŋkpɛi* lɛ ja.
31 Mikpɛtɛɔ okaimɔi lɛ ahe.+
Ao Yehowa, kaahã mihiɛ gbo.*+
32 Matiu okitãi lɛ agbɛ lɛ sɛɛ kɛ foi,Ejaakɛ ogbele mitsui mli kɛhã okitãi lɛ.*
ה [He]
33 Ao Yehowa,+ tsɔɔmɔ mi otaomɔ nii lɛ agbɛ lɛ,Koni manyiɛ sɛɛ kɛyashi naagbee.+
34 Hã manu nii ashishi,Koni maye omla lɛ nɔNi mikɛ mitsui muu fɛɛ aye nɔ.
35 Tsɔɔmɔ mi gbɛ* yɛ okitãi lɛ agbɛ lɛ nɔ,+Ejaakɛ nomɛi ahe mimii shɛɔ.
36 Hã mitsui aya okaimɔi lɛ ahe moŋFe hiɛkɔ̃ɔ nɔ.*+
37 Jiemɔ mihiŋmɛii yɛ nibii ni sɛɛnamɔ bɛ he lɛ akwɛmɔ nɔ;+Baamɔ miyi yɛ ogbɛ lɛ nɔ.
38 Ye shi ni owo* otsulɔ lɛ nɔ,Koni ashe bo gbeyei.*
39 Jiemɔ hiɛshishwiemɔ ni misheɔ he gbeyei lɛ kɛje minɔ,Ejaakɛ oyiŋkpɛi* lɛ hi.+
40 Naa, mishweɔ ofamɔi lɛ waa akɛ nɔ ko.
Okɛ ojalɛ nifeemɔi lɛ abaa miyi.
ו [Waw]
41 Ao Yehowa, jiemɔ osuɔmɔ ni tsakeee lɛ kpo otsɔɔ mi,+Oyiwalaheremɔ lɛ, yɛ shi ni owo lɛ naa;*+
42 Kɛkɛ lɛ, maná hetoo mahã mɔ ni wieɔ eshiɔ mi lɛ,Ejaakɛ mikɛ mihiɛ efɔ̃ owiemɔ lɛ nɔ.
43 Kaajie anɔkwa wiemɔ lɛ kɛje minaa kɛtee kwrakwraEjaakɛ mihiɛ kã oyiŋkpɛɛ* lɛ nɔ.*
44 Maye omla lɛ nɔ be fɛɛ be,Kɛya naanɔi anaanɔ.+
45 Ni manyiɛ yɛ he ko ni yɔɔ shweshweeshwe,*+Ejaakɛ mitaoɔ ofamɔi lɛ asɛɛ gbɛ.
46 Mawie okaimɔi lɛ ahe yɛ maŋtsɛmɛi ahiɛ,Ni efeŋ mi hiɛgbele.+
47 Minyaa okitãi lɛ ahe waa,Lɛɛlɛŋ, misumɔɔ amɛ.+
48 Mahole miniji anɔ yɛ okitãi ni misumɔɔ lɛ ahewɔ,+Ni majwɛŋ otaomɔ nii lɛ anɔ.*+
ז [Zayin]
49 Kaimɔ wiemɔ ni okɛ otsulɔ ewie lɛ,*Nɔ ni hã mi hiɛnɔkamɔ lɛ.*
50 Enɛ ji nɔ ni shɛjeɔ mimii yɛ minɔnaa lɛ mli,+Ejaakɛ owiemɔ lɛ ebaa miwala yi.
51 Mɛi ni yeɔ amɛtsuinaa sane lɛ yeɔ mihe fɛo waa,Shi migbako afã kɛjeko omla lɛ he.+
52 Ao Yehowa, mikaiɔ oblema yiŋkpɛi* lɛ,+Ni amɛshɛjeɔ mimii.+
53 Mlifu ni naa wa eyi mimli obɔ yɛ mɛi fɔji lɛ ahewɔ,Mɛi ni yeee omla lɛ nɔ lɛ.+
54 Otaomɔ nii lɛ ji lalai kɛhã miYɛ he fɛɛ he ni mihiɔ.*
55 Ao Yehowa, nyɔɔŋ fɛɛ lɛ mikaiɔ ogbɛ́i lɛ,+Bɔ ni afee ni maye omla lɛ nɔ.
56 Enɛ ji nɔ ni mifeɔ be fɛɛ beEjaakɛ miyeɔ ofamɔi lɛ anɔ.
ח [Het]
57 Yehowa ji migbɛfaŋnɔ;+Miwo shi akɛ maye owiemɔi lɛ anɔ.+
58 Mikɛ mitsui fɛɛ miikpa bo fai;*+Naa mi mɔbɔ+ yɛ shi ni owo lɛ naa.*
59 Mijwɛŋ migbɛi lɛ ahe,Koni minaji aku sɛɛ kɛya okaimɔi lɛ ahe.+
60 Maye mihe oyai ni mishashaoŋ shiKoni maye okitãi lɛ anɔ.+
61 Mɛi fɔji akpãi lɛ ebɔle mi,Shi mihiɛ kpaaa omla lɛ nɔ.+
62 Miteɔ shi nyɔɔŋteŋ midaa bo shi+Yɛ oyiŋkpɛi* ni ja lɛ ahewɔ.
63 Minanemɛi ji mɛi fɛɛ ni sheɔ bo gbeyei,Kɛ mɛi fɛɛ ni yeɔ ofamɔi lɛ anɔ lɛ.+
64 Ao Yehowa, osuɔmɔ ni tsakeee lɛ eyi shikpɔŋ lɛ nɔ obɔ;+Tsɔɔmɔ mi otaomɔ nii lɛ.
ט [Tet]
65 Ao Yehowa, okɛ otsulɔ eye jogbaŋŋ diɛŋtsɛYɛ owiemɔ lɛ naa.
66 Tsɔɔmɔ mi jwɛŋmɔ ni hi kɛ nilee,+Ejaakɛ mikɛ mihiɛ efɔ̃ okitãi lɛ anɔ.
67 Dani mana nɔ lɛ, no mli lɛ, miduɔ gbɛ,*Shi amrɔ nɛɛ, miyeɔ owiemɔ lɛ nɔ.+
68 Ohi*+ ni onitsumɔi lɛ hu hi.
Tsɔɔmɔ mi otaomɔ nii lɛ.+
69 Mɛi ni yeɔ amɛtsuinaa sane lɛ kɛ amale kpaa mihe,Shi miyeɔ ofamɔi lɛ anɔ kɛ mitsui fɛɛ.
70 Amɛtsui wa tamɔ tɛ,*+Shi minyaa omla lɛ he waa.+
71 Ehi akɛ mina nɔ,+Koni makase otaomɔ nii lɛ.
72 Mla ni jɛ onaa lɛ hi hã mi+Fe shika tsuru kɛ jwiɛtɛi akpei abɔ.+
י [Yod]
73 Oniji ni fee mi, ni amɛshɔ̃ mi.
Hã manu nii ashishi,Koni makase okitãi lɛ.+
74 Mɛi ni sheɔ bo gbeyei lɛ naa mi ni amɛnáa miishɛɛ,Ejaakɛ mihiɛ kã owiemɔ lɛ nɔ.*+
75 Ao Yehowa, mile akɛ oyiŋkpɛi* lɛ ja,+Ni ohã mina nɔ yɛ onɔkwayeli lɛ hewɔ.+
76 Ofainɛ, hã osuɔmɔ ni tsakeee+ lɛ ashɛje mimiiYɛ shi ni owo* otsulɔ lɛ naa.
77 Naa mi mɔbɔ koni maya nɔ mahi wala mli,+Ejaakɛ minyaa omla lɛ he waa.+
78 Mɛi ni yeɔ amɛtsuinaa sane lɛ ahiɛ ashwie shi,Ejaakɛ amɛfeɔ mi efɔŋ be ni mifeko amɛ nɔ ko.*
Shi majwɛŋ ofamɔi lɛ anɔ.*+
79 Hã mɛi ni sheɔ bo gbeyei lɛ aku amɛsɛɛ kɛba miŋɔɔ,Mɛi ni le okaimɔi lɛ.
80 Kaahã sane ko hi mitsui he yɛ otaomɔ nii lɛ asɛɛ ni eeenyiɛ lɛ mli,+Koni mihiɛ akashwie shi.+
כ [Kaf]
81 Mishweɔ* oyiwalaheremɔ lɛ akɛ nɔ ko,+Ejaakɛ mihiɛ kã owiemɔ lɛ nɔ.*
82 Eetɔ mihiŋmɛii yɛ owiemɔ lɛ hewɔ+Mikɛɛ akɛ: “Mɛɛ be obaashɛje mimii?”+
83 Ejaakɛ mitsɔ tamɔ kooloo hewolo tɔ ni tsotsoro shi yɛ lasu mli ni egbi,Shi mihiɛ kpaaa otaomɔ nii lɛ anɔ.+
84 Gbii enyiɛ sɔŋŋ esa akɛ otsulɔ amɛ kɛyashi?
Mɛɛ be obaagbala mɛi ni waa mi yi lɛ atoi?+
85 Mɛi ni yeɔ amɛtsuinaa sane lɛ tsaa bui amɛhãa mi,Mɛi ni yeee omla lɛ nɔ lɛ.
86 Anyɛɔ akɛ he fɔ̃ɔ okitãi lɛ fɛɛ anɔ.
Gbɔmɛi ni mifeko amɛ nɔ ko waa mi yi; ye obua mi!+
87 Shwɛ fioo ni amɛkpãtã mihiɛ kɛje shikpɔŋ lɛ nɔ,Shi mikwaaa ofamɔi lɛ.
88 Baamɔ miyi yɛ osuɔmɔ ni tsakeee lɛ hewɔ,Koni maye kaimɔi ni jɛ onaa lɛ anɔ.
ל [Lamed]
89 Ao Yehowa,Owiemɔ lɛ hiɔ shi yɛ ŋwɛi kɛyaa naanɔ.+
90 Onɔkwayeli lɛ hiɔ shi yɛ yinɔi fɛɛ amli.+
Okɛ shikpɔŋ lɛ ema shi shiŋŋ, koni ema shi daa.+
91 Oyiŋkpɛi* lɛ naa amɛyɔɔ* kɛbashi ŋmɛnɛ,Ejaakɛ otsuji ji amɛ fɛɛ.
92 Eji minyaaa omla lɛ he waa kulɛ,Benɛ mihiɛ ekpãtã yɛ minɔnaa lɛ mli.+
93 Mihiɛ kpaŋ ofamɔi lɛ anɔ kɔkɔɔkɔ,Ejaakɛ okɛ nomɛi ebaa miyi.+
94 Onɔ ji mi; heremɔ mi,+Ejaakɛ mitaoɔ ofamɔi lɛ asɛɛ gbɛ.+
95 Mɛi fɔji mɛɔ koni amɛkpãtã mihiɛ,Shi mikɛ mijwɛŋmɔ fɛɛ fɔ̃ɔ okaimɔi lɛ anɔ.
96 Mina nibii fɛɛ ni eye emuu ahusui,Shi okitã lɛ bɛ husu ko.*
מ [Mem]
97 Misumɔɔ omla lɛ waa diɛŋtsɛ!+
Mijwɛŋɔ nɔ* gbi muu fɛɛ.+
98 Okitã lɛ hãa mihiɛ kãa shi fe mihenyɛlɔi lɛ,+Ejaakɛ eyɛ mimasɛi daa.
99 Miyoɔ nii asɛɛ waa fe mitsɔɔlɔi lɛ fɛɛ,+Ejaakɛ mijwɛŋɔ okaimɔi lɛ anɔ.*
100 Minuɔ nii ashishi fe onukpai po,Ejaakɛ miyeɔ ofamɔi lɛ anɔ.
101 Minyiɛɛɛ gbɛ fɔŋ ko nɔ,+Bɔ ni afee ni maye owiemɔ lɛ nɔ.
102 Migbaaa afã kɛjeee oyiŋkpɛi* lɛ ahe,Ejaakɛ bo otsɔɔ mi nii.
103 Owiemɔi lɛ ŋɔɔ yɛ midaaŋ,Fe bɔ ni wo ŋɔɔ minaa lɛ!+
104 Ofamɔi lɛ hãa minuɔ nii ashishi+ yɛ migbɛ nɔ.
No hewɔ ni minyɛɔ gbɛ fɔŋ fɛɛ gbɛ fɔŋ lɛ.+
נ [Nun]
105 Owiemɔ lɛ ji kane kɛhã minane,Kɛ la hu yɛ migbɛ* nɔ.+
106 Mikã kitã akɛ maye oyiŋkpɛi* ni ja lɛ anɔ,Ni maye nɔ hu.
107 Mina nɔ waa.+
Ao Yehowa, baamɔ miyi yɛ owiemɔ lɛ naa.+
108 Ao Yehowa, ofainɛ ná yijiemɔ afɔlei*+ ni mijɛɔ mitsuiŋ mikɛhãa lɛ ahe miishɛɛ,Ni otsɔɔ mi oyiŋkpɛi* lɛ.+
109 Miwala yɛ oshãra mli be fɛɛ be,*Shi mihiɛ kpako omla lɛ nɔ.+
110 Mɛi fɔji etsɔ mi tsɔne,Shi miduko gbɛ kɛjeko ofamɔi lɛ ahe.+
111 Miŋɔ okaimɔi lɛ akɛ migbɛfaŋnɔ* kɛmiiya naanɔ,Ejaakɛ amɛhãa mitsui náa miishɛɛ.+
112 Mikpɛ mli yɛ mitsui mli akɛ manyiɛ otaomɔ nii lɛ asɛɛBe fɛɛ be, kɛyashi naagbee.
ס [Samek]
113 Minyɛɔ mɛi ni tsui mli eja enyɔ lɛ,+Shi misumɔɔ omla lɛ.+
114 Bo ji mishihilɛhe kɛ mitsɛŋ.+Ejaakɛ mihiɛ kã owiemɔ lɛ nɔ.*+
115 Nyɛ efɔŋfeelɔi,+ nyɛjea minɔ nyɛyaa,Koni maye mi-Nyɔŋmɔ lɛ kitãi lɛ anɔ.
116 Ye obua mi tamɔ bɔ ni owo shi lɛ,*+Koni maya nɔ mahi wala mli;Kaahã mihiɛnɔkamɔ lɛ tsɔ hiɛgbele.*+
117 Ye obua mi koni ahere mi;+Kɛkɛ lɛ, mikɛ mijwɛŋmɔ fɛɛ baama otaomɔ nii lɛ anɔ be fɛɛ be.+
118 Okwaa mɛi fɛɛ ni duɔ gbɛ kɛjeɔ otaomɔ nii lɛ ahe lɛ,+Ejaakɛ amɛmaleɔ ni amɛlakaa mɛi.
119 Oshɛrɛɔ mɛi fɔji ni yɔɔ shikpɔŋ lɛ nɔ lɛ fɛɛ oshwieɔ oookɛɛ amɛji dadefei* ni he bɛ sɛɛnamɔ.+
No hewɔ ni misumɔɔ okaimɔi lɛ.
120 Gbeyei ni misheɔ bo lɛ hãa migbɔmɔtso* kpokpoɔ;Misheɔ oyiŋkpɛi* lɛ gbeyei.
ע [Ayin]
121 Mifeɔ nɔ ni sa kɛ nɔ ni ja.
Okɛ mi akawo mɛi ni waa mi yi lɛ adɛŋ!
122 Wo shi akɛ obaahã ehi ehã otsulɔ;Kaahã mɛi ni yeɔ amɛtsuinaa sane lɛ wa mi yi.
123 Oyiwalaheremɔ+ lɛ kɛ oshiwoo*+ ni ja lɛ ni mimɛɔ sɔŋŋ lɛEhã etɔ mihiŋmɛii.
124 Jiemɔ osuɔmɔ ni tsakeee lɛ kpo otsɔɔ otsulɔ,+Ni otsɔɔ mi otaomɔ nii lɛ.+
125 Otsulɔ ji mi; hã manu nii ashishi+Koni male okaimɔi lɛ.
126 Be eshɛ ni Yehowa baatsu saji ahe nii,+Ejaakɛ amɛku omla lɛ mli.
127 No hewɔ ni misumɔɔ okitãi lɛFe shika tsuru, shika tsuru ni atsuu he po lɛ.+
128 No hewɔ lɛ, mibuɔ nɔ fɛɛ nɔ ni otsɔɔ mi* lɛ akɛ eja;+Minyɛɔ gbɛ fɔŋ fɛɛ gbɛ fɔŋ.+
פ [Pe]
129 Okaimɔi lɛ yɛ naakpɛɛ.
No hewɔ ni miyeɔ* nɔ lɛ.
130 Kɛ́ ajie owiemɔi lɛ akpo lɛ, ekɛ la baa,+Ni ehãa mɛi ni jwɛŋmɔ esako lɛ nuɔ nii ashishi.+
131 Migbɛɔ midaaŋ hatoo, ni mimuɔ waa waa,*Ejaakɛ miishwe okitãi lɛ.+
132 Tsɔ ohiɛ ohã mi, ni ona mi mɔbɔ,+Yɛ bɔ ni okpɛ oyiŋ yɛ mɛi ni sumɔɔ ogbɛ́i lɛ ahe lɛ naa.+
133 Okɛ owiemɔ lɛ abu minajifaamɔi ahe shweshweeshwe;*Kaahã efɔŋ ko ye minɔ.+
134 Jiemɔ* mi kɛje mɛi ni waa mɛi ayi lɛ adɛŋ,Ni maye ofamɔi lɛ anɔ.
135 Ná otsulɔ he miishɛɛ,*+Ni otsɔɔ mi otaomɔ nii lɛ.
136 Yaafonui hoɔ kɛjɛɔ mihiŋmɛiiaŋ eshwieɔ shi,Ejaakɛ gbɔmɛi yeee omla lɛ nɔ.+
צ [Tsade]
137 Ao Yehowa, jalɔ ji bo,+Ni oyiŋkpɛi* lɛ ja.+
138 Okaimɔi lɛ ja,Ni anyɛɔ akɛ he fɔ̃ɔ nɔ kwraa.
139 Mihiɛdɔɔ lɛ tsoɔ yɛ mimli tamɔ la,*+Ejaakɛ mɛi ni nyɛɔ mi lɛ ahiɛ ekpa owiemɔi lɛ anɔ.
140 Owiemɔ lɛ he tse keŋkeŋ,*+Ni otsulɔ sumɔɔ.+
141 Mijeee mɔ ko, ni abuuu mi hu;+Shi mihiɛ kpako ofamɔi lɛ anɔ.
142 Ojalɛ nifeemɔi lɛ, jalɛ nifeemɔi ni hiɔ shi kɛyaa naanɔ ni,+Ni omla lɛ, anɔkwale ni.+
143 Haomɔ kɛ jaramɔ shihilɛ baaba minɔ moŋ,Shi minyaa okitãi lɛ ahe waa lolo.
144 Okaimɔi lɛ ja kɛmiiya naanɔ.
Hã manu nii ashishi,+ koni maya nɔ mahi wala mli.
ק [Kof]
145 Mikɛ mitsui muu fɛɛ bo mitsɛ bo. Ao Yehowa, heremɔ mi nɔ.
Manyiɛ otaomɔ nii lɛ asɛɛ.
146 Miibo miitsɛ bo; heremɔ mi!
Maye okaimɔi lɛ anɔ.
147 Mihiɛ tsɛ̃ɔ maŋkɛ* ni mibolɔɔ mitsɛɔ bo koni oye obua mi,+Ejaakɛ mihiɛ kã owiemɔi lɛ anɔ.*
148 Mihiŋmɛii gbeleɔ dani nyɔɔŋ buu bei lɛ shɛɔ,Koni majwɛŋ owiemɔ lɛ nɔ.*+
149 Bo migbee toi yɛ osuɔmɔ ni tsakeee lɛ hewɔ.+
Ao Yehowa, baamɔ miyi yɛ ojalɛsaneyeli lɛ naa.
150 Mɛi ni feɔ efɔŋ* lɛ ebɛŋkɛ mi;Amɛkɛ omla lɛ teŋ jekɛ.
151 Ao Yehowa, oyɛ mimasɛi,+Ni okitãi lɛ fɛɛ lɛ, anɔkwale ni.+
152 Kɛjɛ jeeŋmɔ beebe miná mile okaimɔiNi oto shishi koni amɛhi shi kɛya naanɔ lɛ.+
ר [Resh]
153 Kwɛmɔ minɔnaa lɛ, ni ojie mi,+Ejaakɛ mihiɛ kpako omla lɛ nɔ.
154 Fã mihe,* ni ojie mi;+Baamɔ miyi yɛ shi ni owo lɛ naa.*
155 Yiwalaheremɔ kɛ mɛi fɔji ateŋ jekɛ,Ejaakɛ amɛtaooo otaomɔ nii lɛ asɛɛ gbɛ.+
156 Ao Yehowa, omɔbɔnalɛ fa babaoo,+
Baamɔ miyi yɛ ojalɛsaneyeli lɛ naa.
157 Mɛi ni waa mi yi lɛ, kɛ mɛi ni nyɛɔ mi lɛ ayi fa;+Shi migbaaa afã kɛjeee okaimɔi lɛ ahe.
158 Kɛ́ mina mɛi ni yeee anɔkwa lɛ, amɛnii feɔ mi taŋ,Ejaakɛ amɛyeee owiemɔ lɛ nɔ.+
159 Naa, misumɔɔ ofamɔi lɛ akɛ nɔ ko!
Ao Yehowa, baamɔ miyi yɛ osuɔmɔ ni tsakeee lɛ hewɔ.+
160 Owiemɔ lɛ fɛɛ lɛ, anɔkwale sɔŋŋ ni,+Ni oyiŋkpɛi* ni ja lɛ hiɔ shi kɛyaa naanɔ.
ש [Sin] loo [Shin]
161 Lumɛi waa mi yi+ be ni mifeko amɛ nɔ ko,Shi mitsui sheɔ owiemɔi lɛ gbeyei.+
162 Minyaa owiemɔ lɛ he+Tamɔ mɔ ko ni ená ta mli nii babaoo.
163 Minyɛɔ amale—mihiɔ kwraa+—Misumɔɔ omla lɛ.+
164 Mijieɔ oyi shii kpawo daa gbiYɛ oyiŋkpɛi* ni ja lɛ ahewɔ.
165 Mɛi ni sumɔɔ omla lɛ yɛ toiŋjɔlɛ babaoo;+Nɔ ko nɔ ko hãaa amɛtɛrɛ.*
166 Ao Yehowa, mihiɛ kã oyiwalaheremɔ nitsumɔi lɛ anɔ,Ni miyeɔ okitãi lɛ anɔ.
167 Miyeɔ* okaimɔi lɛ anɔ,Ni misumɔɔ amɛ waa diɛŋtsɛ.+
168 Miyeɔ ofamɔi lɛ kɛ okaimɔi lɛ anɔ,Ejaakɛ ole nibii ni mifeɔ lɛ fɛɛ.+
ת [Taw]
169 Ao Yehowa, hã bolɔmɔ ni mibolɔɔ kɛhã yelikɛbuamɔ lɛ ashɛ ohiɛ.+
Hã manu nii ashishi yɛ owiemɔ lɛ naa.+
170 Hã fai ni mikpaa koni ona mi mɔbɔ lɛ aba ohiɛ.
Heremɔ mi, tamɔ bɔ ni owo shi lɛ.*
171 Hã minaabu ayi kɛteke nɔ kɛ yijiemɔ,+Ejaakɛ otsɔɔ mi otaomɔ nii lɛ.
172 Hã mililɛi alá owiemɔ lɛ he lala,+Ejaakɛ okitãi lɛ fɛɛ ja.
173 Hã onine aye abua mi oya,+Ejaakɛ mikpɛ mli akɛ maye ofamɔi lɛ anɔ.+
174 Ao Yehowa, miishwe oyiwalaheremɔ lɛ,Ni minyaa omla lɛ he waa.+
175 Hã mahi* wala mli koni majie oyi;+Oyiŋkpɛi* lɛ aye abua mi.
176 Midu gbɛ tamɔ gwantɛŋ ni elaaje.+ Taomɔ otsulɔ,Ejaakɛ mihiɛ kpako okitãi lɛ anɔ.+
Shishigbɛ Niŋmaa
^ Loo “Mɛi ni yeɔ anɔkwa.”
^ Hebri sht. ŋm., “Ao, miná ni migbɛi lɛ ma shi shiŋŋ.”
^ Loo “okojomɔi.”
^ Loo “Kojomɔi.”
^ Loo “Makase ofamɔi lɛ.”
^ Loo “okojomɔi.”
^ Loo “misusuma.”
^ Hebri sht. ŋm., “Koklomɔ.”
^ Loo “Otsulɔ kaseɔ otaomɔ nii lɛ.”
^ Loo “Misusuma kãa.”
^ Hebri sht. ŋm., “Hã manu ofamɔi lɛ agbɛ lɛ.”
^ Loo “Koni makase onaakpɛɛ nitsumɔi lɛ.”
^ Loo “hãaa misusuma anyɛ awɔ.”
^ Loo “okojomɔi.”
^ Loo “kaahã mihiɛ shwie shi.”
^ Shishitsɔɔmɔi komɛi kɛɔ akɛ, “Ejaakɛ ohã mitsui ená ekãa.”
^ Loo “Hã manyiɛ.”
^ Loo “sɛɛnamɔi anɔ.”
^ Loo “Ye nɔ ni okɛɛ.”
^ Shishitsɔɔmɔi komɛi kɛɔ akɛ, “shi ni owo mɛi ni sheɔ bo gbeyei lɛ.”
^ Loo “okojomɔi.”
^ Loo “yɛ nɔ ni okɛɛ lɛ naa.”
^ Loo “okojomɔ.”
^ Loo “miimɛ oyiŋkpɛɛ lɛ.”
^ Loo “he ko ni da.”
^ Loo “makase otaomɔ nii lɛ.”
^ Loo “Kaimɔ shi ni owo otsulɔ lɛ.”
^ Loo “Nɔ ni hã mimɛ lɛ.”
^ Loo “kojomɔi.”
^ Loo “Yɛ shĩa fɛɛ shĩa ni miyahiɔ mli akɛ gbɔ lɛ.”
^ Loo “mitsui fɛɛ miitao ohiɛ gbɛ.”
^ Loo “yɛ nɔ ni okɛɛ lɛ naa.”
^ Loo “okojomɔi.”
^ Loo “no mli lɛ, jeee gbɛ mijeɔ mifeɔ esha.”
^ Loo “Oji mɔ kpakpa.”
^ Hebri sht. ŋm., “nuuu nii ahe, tamɔ fɔ.”
^ Loo “mimɛɔ owiemɔ lɛ.”
^ Loo “okojomɔi.”
^ Loo “Yɛ nɔ ni okɛɛ.”
^ Shishitsɔɔmɔi komɛi kɛɔ akɛ, “Ejaakɛ amɛmaleɔ kɛfeɔ mi efɔŋ.”
^ Loo “makase omlai lɛ.”
^ Loo “Misusuma shweɔ.”
^ Loo “mimɛɔ owiemɔ lɛ.”
^ Loo “Okojomɔi.”
^ Ni ji, edebɔɔ nibii lɛ fɛɛ.
^ Hebri sht. ŋm., “mli lɛɛ waa diɛŋtsɛ.”
^ Loo “Mikaseɔ.”
^ Loo “mikaseɔ okaimɔi lɛ.”
^ Loo “okojomɔi.”
^ Loo “minanegbɛ.”
^ Loo “okojomɔi.”
^ Hebri sht. ŋm., “midaaŋ afɔlei.”
^ Loo “okojomɔi.”
^ Loo “Misusuma kã midɛŋ be fɛɛ be.”
^ Loo “migboshinii.”
^ Loo “mimɛɔ owiemɔ lɛ.”
^ Loo “yɛ owiemɔ lɛ naa.”
^ Loo “tsɔ hiɛshishwiemɔ.”
^ Dadefei ji dade nibii ni asere lɛ amli muji ni baa nɔ ni asere lɛ hiɛ.
^ Hebri sht. ŋm., “miheloo.”
^ Loo “okojomɔi.”
^ Loo “kɛ nɔ ni okɛɛ.”
^ Loo “mibuɔ mla fɛɛ mla ni jɛɔ odɛŋ.”
^ Loo “misusuma yeɔ.”
^ Hebri sht. ŋm., “ni mitsui suɔ.”
^ Loo “ahã minajifaamɔi amɔ shi.”
^ Hebri sht. ŋm., “Kpɔ̃.”
^ Loo “Tse ohiɛ ohã otsulɔ; Hã ohiɛ akpɛ otsulɔ nɔ.”
^ Loo “okojomɔi.”
^ Loo “Mihiɛdɔɔ lɛ yeɔ mi.”
^ Loo “Owiemɔ lɛ, atsuu he jogbaŋŋ.”
^ Loo “maŋkɛ hima.”
^ Loo “mimɛɔ owiemɔi lɛ.”
^ Loo “Koni makase owiemɔ lɛ.”
^ Loo “hiɛgbejianii.”
^ Loo “Wiemɔ ohã mi.”
^ Loo “yɛ nɔ ni okɛɛ lɛ naa.”
^ Loo “okojomɔi.”
^ Loo “okojomɔi.”
^ Loo “Amɛ lɛ, nɔ ko nɔ ko hãaa amɛnane atɔ̃tɔ.”
^ Loo “Misusuma yeɔ.”
^ Loo “yɛ nɔ ni okɛɛ lɛ naa.”
^ Loo “misusuma ahi.”
^ Loo “Okojomɔi.”
