A’ YE TO ƝƐƐ NA!

Diinan ani marifakɛlɛ min be kɛra Ikrɛni jamana na: Bibulu be mun lo fɔ?

A LAMƐN KAAN NIN NA

Lakalita dɔw lajɛ minw kɛra kɔsa la. U b’a yira diinan kuntigibaba dɔw be min miiri marifakɛlɛ koo la min be kɛra Ikrɛni:

“Tuma min na Irisi jamana wulila Ikrɛni jamana kama, cɛmɔgɔba Kirill min ye Irisi ka ɔritodɔksi diinan kuntigi ye, ale ma foyi fɔ min b’a yira ko o koo bɛnnin tɛ. . . . A ka legilizidenw tora ka Ikrɛni jamana mɔgɔw tɔgɔ jugu fɔ ani Poutine basigira o kan k’a fɔ ko joo be ale fɛ ka wuli Ikrɛni jamana kama.”—EUobserver, saan 2022, marisikalo tile 7.
“Cɛmɔgɔba Kirill . . . y’a yira ka gwɛ ko a sɔnnin be a ma ko Irisi jamana ka Ikrɛni kɛlɛ. A y’a fɔ k’o kɛlɛ kuun ye ka wuli jurumukɛlaw kama.”—AP News, saan 2022, marisikalo tile 8.
“Épiphane fɔlɔ min be Kiyɛvu dugu la, ale lo ye Ikrɛni jamana ka ɔritodɔksi diinan kuntigi ye. Tɛnɛlon, a ye a ka legilizidenw duga walisa ‘u ka Irisi sɔrɔdasiw kɛlɛ’ . . . [A] y’a fɔ fana ko ka Irisi sɔrɔdasiw faga, o tɛ jurumu ye.”—Jerusalem Post, saan 2022, marisikalo tile 16.
“Anw [Ikrɛni ka legiliziw ni diinanw jɛnkulu (UCCRO)] be Ikrɛni sɔrɔdasiw ani an lafasabagaw bɛɛ dɛmɛ. An be u duga ani ka delili kɛ u ye sabu u be Ikrɛni lafasara a juguw ma.”—UCCRO a ka kumalaseta, saan 2022, feburukalo tile 24.

E be mun miiri o koo la? Diinan minw b’a fɔ k’u be tugu Yezu Krista kɔ, yala u ka ɲi k’u ka diinandenw lasun u ka taga kɛlɛ la wa? Bibulu be mun lo fɔ?

Tarikikow be min fɔ diinan ni marifakɛlɛw koo la

Tarikikow b’a yira ko tuma caaman na, diinanw ye u ɲɛɛ tugu kɛlɛw kan, u y’a yira ko o daganin lo wala u yɛrɛ ye mɔgɔw jija o la, u kɛtɔ k’a fɔ ko u b’o kɛra walisa ka hɛɛrɛ sigi le. Kabi saan caaman, Jehova Seerew be diinanw ka filankafoya bɔra kɛnɛ kan. An ka misali dɔw lajɛ minw be sɔrɔ an ka gafew kɔnɔ.

Barokun dɔ bɔra Réveillez-vous ! kɔnɔ min kuun ko: “Les croisades : une “illusion tragique.” O barokun b’a yira ko katoliki legilizi min be Ɔrɔmu, ale kɛra sababu ye mɔgɔ caaman fagara Ala ani Krista tɔgɔ la.
Barokun wɛrɛ b’a yira ko diinanw ma se ka siyakɛlɛw ani fagariw bali.—“L’Église catholique en Afrique.”
Barokun nunu b’a yira ko kɛlɛ caaman na, katolikiw, ɔritodɔksiw ani protɛstanw ye dɛmɛ don kɛlɛkɛ jɛnkulu fila bɛɛ la: “La Religion est-elle Responsable ?”, “Le rôle de la Religion dans les guerres” ani “La Religion Prend Parti.”

Yala kerecɛn diinanw ka ɲi ka dɛmɛ don kɛlɛkow la wa?

Yezu ye mɔgɔw kalan min na: “I k’i mɔgɔɲɔgɔn kanu i n’a fɔ i yɛrɛ.” (Matiyo 22:39). “Aw ka aw juguw kanu.”—Matiyo 5:44-47.

Miiri k’a filɛ: Yezu ye cii di ko an ka ɲɔgɔn kanu. Yala diinan dɔ be se k’a fɔ ko ale b’o cii labato ani o wagati kelen na a b’a ka diinandenw jija u ka mɔgɔw faga kɛlɛ la wa? Walisa k’o ɲiningali jaabili sɔrɔ, barokun nunu lajɛ: “Les vrais chrétiens et la guerre” ani “Est-il possible d’aimer ses ennemis ?”

Yezu ye mɔgɔw kalan min na: “Ne ka masaya te diɲɛ nin ta ye. Ni ne ka masaya tun ye diɲɛ ta ye, ne kɔmɔgɔw tun bena kɛlɛ kɛ ne kosɔn, janko zuwifuw kana ne minɛ, nga ne ka masaya te diɲɛ nin ta ye.” (Zan 18:36). “Mɔgɔ minw be kɛlɛ kɛ ni murujan ye, murujan le bena u faga fana.”—Matiyo 26:47-52.

Miiri k’a filɛ: Ni kerecɛnw tun man ɲi ka kɛlɛ kɛ walisa ka Yezu yɛrɛ latanga, yala u ka ɲi ka kɛlɛkɛminanw ta kuun wɛrɛ kosɔn wa? Walisa k’a lɔn kerecɛn fɔlɔw tugura Yezu ka ɲɛyirali kɔ ani u y’a ka kalanw labato kantigiya la cogo min na, barokun nin lajɛ: “Peut-on concilier guerre et christianisme ?”

Diinan minw be mɔgɔw jija kɛlɛ la, mun lo bena olu sɔrɔ?

Diinan minw b’a fɔ ko u ye Yezu ka lasigidenw ye k’a sɔrɔ u t’a ka kalanw sira tagama, Bibulu b’a yira ko Ala tɛ sɔn o diinanw ma.—Matiyo 7:21-23; Titi 1:16.

Yirali ka kitabu b’a fɔ ko Ala b’a jati ko “mɔgɔ minw bɛɛ fagara dugukolo kan,” olu joli hakɛ b’o diinanw kan (Yirali 18:21, 24). Mun na do? Walisa k’o faamu, barokun nin lajɛ: “Qu’est-ce que Babylone la Grande?”
Yiri jugu min deenw man ɲi, ale be “tigɛ k’a fili tasuma na.” O cogo kelen na, Yezu y’a yira ko Ala tɛ sɔn diinan minw ma, u bɛɛ bena halaki u ka kɛwale juguw kosɔn (Matiyo 7:15-20). Walisa k’a lɔn o diinanw bena halaki cogo min na, barokun nin lajɛ: “La fin de la fausse religion est proche !”

Jehova Seerew be dan na

Yezu ye ci di a ka kalandenw ma ko u kana u seen don politikikow ni kɛlɛkow la. I ko Jehova Seere tɔɔw, Jehova Seere minw be Irisi ani Ikrɛni jamana na, olu be o cikan labato. O kama, an tɛ dɛmɛ don wala k’an seen don Irisi ni Ikrɛni ka kɛlɛ wala kɛlɛ si la. An cɛsirinin lo minkɛ ka Bibulu ka kalanw sira tagama, mɔgɔw b’an kɛlɛ yɔrɔ dɔw la (Zan 15:19, 20; 2 Timote 3:12). Misali la, Irisi faamanw ye Jehova Seere caaman don kaso la ani k’u dɔw tɔɔrɔ yɛrɛ. U ye an ka batoli kɛyɔrɔw bɔsi an na. Kunnafoni wɛrɛw lajɛ www.jw-russia.org kan.

Miniti naani videwo nin filɛ: Les Témoins de Jéhovah d’Irkoutsk restent fidèles malgré des perquisitions brutales. Jehova Seere minw be Irisi jamana na, o videwo b’a yira u b’olu tɔɔrɔla cogo min na u ka limaniya kosɔn.
Bɛɛ b’a lɔn ko Jehova Seerew t’u seen don politikikow ni kɛlɛkow la. Soviyetiki mara la ani Naziw ka kuntigiya wagati la Alemaɲi, Jehova Seerew m’u seen don politikikow ni kɛlɛkow la kɔrɔbɔlibaw bɛɛ n’a ta. Videwo nin filɛ walisa k’a lɔn u lɔra kelen kan cogo min na: Fermes face à l’opposition.

An ka lannako dɔ ye ko loon dɔ kɛlɛw bena ban.N’i b’a fɛ k’an ka lannako wɛrɛw lɔn, an ka site web lajɛ (Ezayi 2:4; Zeremi 29:11). N’i be kunnafoni wɛrɛw fɛ, kanbɔ an ma.

Fotow bɔyɔrɔw, k’a ta numanbolo ka taga kinibolo: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images

a Diinan 15 lo be Ikrɛni ka legiliziw ni diinanw jɛnkulu (UCCRO) kɔnɔ. O diinanw kunbabaw ye ɔritodɔksiw, Grɛki katolikiw, Ɔrɔmu katolikiw, protɛstanw, evanzilisiw, Yahutu diinanw ani silamɛw ye.

Découvrez aussi…

BIBULU KA KALAN JƆNJƆNW

Ala ka Masaya ye mun lo ye?

Yezu ka cidenyabaara la, a ye mɔgɔw kalan Ala ka Masaya koo la ka tɛmɛ barokun tɔɔw bɛɛ kan. Kabi saan caaman, a ka kalandenw ye delili kɛ k’o Masaya ka na.

A’ YE TO ƝƐƐ NA!