Bann pwen enteresan dan let pour Tit, Filemon ek bann Ebre
Parol Zeova i vivan
Bann pwen enteresan dan let pour Tit, Filemon ek bann Ebre
EN PE letan apre ki i ti’n ganny large dan prizon Ronm, lannen 61 N.L., zapot Pol ti vizit zil Kret. Vi ki Pol ti’n remarke ki sa kongregasyon lo zil Kret ti bezwen fortifye zot relasyon avek Zeova, i ti demann Tit pour reste avek zot. Plitar, petet kan i ti Masedwann, Pol ti ekrir en let Tit pour gid li dan son bann responsabilite e pour montre ki i ti’n ganny lotorite avek zapot Pol pour fer sa travay.
Pli boner, en pti pe letan avan ki i ti’n ganny large dan prizon lannen 61 N.L., Pol ti ekrir en let Filemon, en frer Kretyen ki ti reste Kolos. I ti pe personnelman fer rapel avek en zanmi.
Anviron lannen 61 N.L., Pol ti osi ekrir en let pour bann Kretyen Ebre an Zide. Sa let ti montre ki lansennyman bann Kretyen ti pli siperyer ki sistenm Zwif. Tou le trwa let i ranpli avek bann bon konsey pour nou.—Ebr. 4:12.
RESTE FOR SPIRITYELMAN
Apre ki i ti’n donn gidans pour “etabli bann ansyen dan sak lavil,” Pol ti konsey Tit pour kontinyen “reprimann [bann ki rebel] severman, pour ki zot lafwa i a vin for.” I ti reprimann tou bann ki ti dan bann kongregasyon lo zil Kret “pour abandonn [zot] move lavi . . . pour viv en lavi rezonnab.”—Tit 1:5, 10-13; 2:12.
Pol ti donn bann frer lo zil Kret ankor konsey pour ed zot kapab reste for spirityelman. I ti ansenny Tit pour “evite fer bann diskisyon bet . . . ek lager konsernan Lalwa.”—Tit 3:9.
Larepons pour bann kestyon lo Labib:
1:15—Ki mannyer “tou i pir pour sa ki pir limenm,” me “pour sa ki enpir, pour sa ki pa krwar laverite napa nanryen ki pir”? Pour nou arive konpran sa, nou bezwen konpran ki Pol ti oule dir par sa mo “tou.” I pa ti pe koz lo keksoz ki Parol Bondye i direkteman kondannen, me plito i ti pe koz dan bann domenn kot en Kretyen i kapab fer son prop desizyon baze lo son konsyans. Pour en dimoun ki son fason panse i an armoni avek bann standar Bondye, sa bann tel keksoz i pir. Me i tou lekontrer avek en dimoun ki napa en bon rezonnman e ki son konsyans i enpir oubyen pouri. *
3:5—Ki mannyer bann Kretyen swazir in ganny ‘sove’ kan zot ‘in lav zot par Sent Espri ki donn zot en nouvo nesans’? Zot in ganny ‘sove’ e zot ‘in lav zot par Sent Espri’ dan sa sans ki Bondye in lav oubyen pirifye zot avek disan Zezi, gras a sakrifis Zezi. ‘Sent Espri in donn zot en nouvo nesans’ akoz zot in vin “en kreasyon nouvo” konman bann garson spirityel Bondye.—2 Kor. 5:17.
Leson pour nou:
1:10-13; 2:15. Bann sirveyan i bezwen demontre kouraz kan zot pe koriz bann keksoz mal dan kongregasyon.
2:3-5. Parey dan premye syek, bann ser Kretyen ki matir ozordi i “devre konport zot konman dimoun ki pe viv en lavi sen. Zot pa devre kolport zaksyon ki fer ditor, ni vin lesklav labwason. Sirtou zot devre donn bon konsey.” Dan sa fason, zot kapab personnelman donn bon konsey “bann zenn madanm” dan kongregasyon.
3:8, 14. Kan nou gard nou lespri fikse “pour fer bann bonn aksyon,” sa i “bon e itil” akoz i ed nou prodwi fri dan servis Bondye e gard nou separe avek sa move lemonn.
LANKOURAZMAN “O NON LANMOUR”
Filemon ti ganny felisite akoz i ti en legzanp pour demontre “lanmour ek lafwa.” Lefet ki i ti en sours lankourazman pour bann frer ek ser Kretyen, sa ti donn Pol en “gran lazwa ek lankourazman.”—Filem. 4, 5, 7.
Pour kit en legzanp pour tou bann sirveyan, Pol ti regle en problenm ase delika konsernan Onezim. Olye donn lord i ti donn lankourazman “o non lanmour.” I ti dir Filemon: “Mon annan en gran konfyans, letan mon pe ekri sa, ki ou pou . . . menm . . . fer bokou plis ki sa.”—Filem. 8, 9, 21.
Larepons pour bann kestyon lo Labib
10, 11, 18—Ki mannyer Onezim “pa ti itil” oparavan me aprezan i ti’n vin “itil”? Onezim ki pa ti anvi servi konman lesklav, ti sove kot lakour Filemon, Kolos e i ti al Ronm. I tre probab ki Onezim ti osi vole kot son met pour kouver depans son vwayaz, ki ti anviron 1,400 kilomet. Vreman Onezim pa ti itil pour Filemon. Parkont, an Ronm, Pol ti ed Onezim pour vin en Kretyen. La ki i ti’n vin en Kretyen, sa lesklav ki “pa ti itil” oparavan ti’n vin “itil.”
15, 16—Akoz Pol pa ti demann Filemon pour donn Onezim son liberte? Pol ti determinen pour kontinyen seryezman avek son misyon pour ‘pres lo Rwayonm Bondye e ansenny konsernan nou Senyer Zezi-Kri.’ Alors, i ti swazir pour pa mel dan bann zafer sosyal, tel parey bann keksoz ki annan pour fer avek lesklavaz.—Akt 28:31.
Leson pour nou:
2. Filemon ti fer son lakaz disponib pour fer renyon kongregasyon. I en privilez kan renyon predikasyon i ganny fer kot nou lakour.—Rom. 16:5; Kol. 4:15.
4-7. Nou bezwen pran linisyativ pour felisit nou bann frer ek ser Kretyen ki en legzanp pour demontre lafwa ek lanmour.
15, 16. Menm si i annan bann levennman ki pa favorab ki arive dan nou lavi, nou pa devret les sa fer nou akable avek lenkyetid. Sa i kapab anmenn en bon rezilta, zis parey dan ka Onezim.
21. Pol ti espekte ki Filemon i pardonn Onezim. Nou osi nou devret pare pour pardonn en frer ki’n kapab ofans nou.—Mat. 6:14.
“AVANSE POUR ARIV DAN EN MATIRITE”
Pour prouve ki lafwa dan sakrifis Zezi i pli siperyer ki fer sa ki Lalwa i ordonnen, Pol ti fer resorti ki Fondater larelizyon Kretyen i pli siperyer, ensi ki son drwa konman pret, son sakrifis ek sa nouvo lalyans. (Ebr. 3:1-3; 7:1-3, 22; 8:6; 9:11-14, 25, 26) Sirman, sa konnesans ti’n bezwen kapab ed bann Kretyen Ebre pour fer fas avek persekisyon sorti kot bann Zwif ki ti pe fer zot soufer. Pol ti ankouraz son bann frer ek ser Kretyen Ebre pour “avanse pour ariv dan en matirite.”—Ebr. 6:1.
Akoz lafwa i enportan pour en Kretyen? Pol ti ekrir: “San lafwa personn pa kapab fer plezir Bondye.” I ti ankouraz bann Ebre: “Avek determinasyon annou fer sa lakours ki i’n propoz nou” e fer li dan lafwa.—Ebr. 11:6; 12:1.
Larepons pour bann kestyon lo Labib:
2:14, 15—Eski sa pouvwar ki Satan i annan pour “donn lanmor” i endike ki i kapab koz lanmor nenport ki dimoun? Non, i pa posib. Parkont, depi o konmansman ler Satan ti rebele dan zarden Edenn, son bann mansonz ti fer Adan komet pese e apre sa, Adan in pas pese ek lanmor avek tou dimoun. (Rom. 5:12) An plis ki sa, Satan ek bann ki pe fer son lavolonte lo later, in persekit bann serviter Bondye menm ziska lanmor parey zot ti fer avek Zezi. Me sa pa vedir ki Satan i annan pouvwar pour touy nenport dimoun ki i oule. Si i ti kapab fer sa, i ti pou’n san dout fini elimin tou bann adorater Zeova depi byen lontan. Zeova i protez son pep konman en group e i pa permet ki Satan i ekstermin zot. Menm si Zeova i permet ki serten parmi nou i mor anba bann latak ki Satan i lanse lo nou, nou kapab annan konfyans ki Bondye pou repar okenn domaz ki ganny anmennen lo nou.
4:9-11—Ki mannyer nou “antre dan sa repo [Bondye]”? Alafen sa sis zour kreasyon, Bondye ti repoze avek tou son travay. I ti konfidan ki son plan pour later ek limanite pou ganny akonpli. (Zen. 1:28; 2:2, 3) Nou “antre dan sa repo” kan nou aret rod fason pour zistifye nou prop lekor e aksepte provizyon ki sorti kot Bondye pour nou delivrans. Kan nou demontre lafwa dan Zeova e obeir son Garson olye pourswiv bann lentere egois, nou rezwir bann benediksyon ki anmenn soulazman ek repo dan nou lavi tou le zour.—Mat. 11:28-30.
9:16—Konsernan sa nouvo lalyans, lekel sa imen “ki’n fer sa testaman” oubyen lalyans? Zeova i loter sa nouvo lalyans, parkont Zezi i “sa [enn] ki’n fer sa testaman” oubyen lalyans. Zezi i Medyater sa lalyans. Par son lanmor in ofer en sakrifis ki ti neseser e ki’n fer sa lalyans annan valer.—Lik 22:20; Ebr. 9:15.
11:10, 13-16—Ki sa “lavil” ki Abraam ti pe espere? Sa pa ti en vre lavil, me plito i en lavil senbolik. Abraam ti pe esper “Zerizalenm ki dan lesyel,” ki enkli Zezi Kri ek sa 144,000 ki pou dirize ansanm avek li. Dan zot laglwar dan lesyel sa bann ki pou dirize avek Zezi i osi ganny dekrir konman sa “lavil sent, Nouvel-Zerizalenm.” (Ebr. 12:22; Rev. 14:1; 21:2) Abraam ti pe espere pour viv anba dominasyon Rwayonm Bondye.
12:2 (NW)—Ki sa “lazwa ki [Zezi] i merite” ki ti fer li “sibir lanmor lo en poto martir”? I ti sa lazwa pour vwar sa ki i ti pou akonpli atraver son minister. Sa i enkli sanktifye non Zeova, zistifye drwa Bondye pour dirize e ofer son lavi konman en sakrifis pour sov limanite dan lanmor. Zezi ti osi pe espere pour ganny sa rekonpans pour dirize konman Lerwa e servi konman Gran Pret pour anmenn byenfe pour limanite.
13:20—Akoz sa nouvo lalyans i ganny vwar konman “eternel”? I annan trwa rezon: (1) I pa pou zanmen ganny ranplase, (2) sa ki i pou akonpli pou permanan e (3) ‘lezot mouton’ pou kontinyen benefisye avek laranzman sa nouvo lalyans apre Armagedon.—Zan 10:16.
Leson pour nou:
5:14. Nou devret etidye seryezman Parol Bondye, Labib e aplik sa ki nou aprann ladan. Napa okenn lezot fason ki nou kapab “konn fer diferans ant sa ki byen ek sa ki mal.”—1 Kor. 2:10.
6:17-19. Si nou lespwar i solidman baze lo promes Bondye, sa pou ed nou pour pa aret mars dan sa semen laverite.
12:3, 4. Dan plas ‘dekouraze e dezespere’ akoz bann pti leprev oubyen lopozisyon ki nou kapab rankontre, nou devret fer progre pour vin matir e devlop nou abilite pour andir bann leprev. Nou devret determinen pour reziste, menm ‘ziska ki nou les zot vers nou disan,’ setadir menm ziska lanmor.—Ebr. 10:36-39.
12:13-15. Nou pa devret les en “rasin anmer,” oubyen nenport ki dan kongregasyon ki vwar defo avek lafason ki keksoz i ganny fer, anpes nou ‘fer bann semen drwat pour nou lipye.’
12:26-28. Sa ‘bann keksoz ki’n ganny fer’ par zonm e non pa par Bondye, setadir tou sa ki dan sa lemonn ki nou pe viv ladan, enkli sa move “lesyel,” pou ganny sekwe e i pou disparet. Kan sa pou arive, zis sa “ki solid [ki pou] reste,” setadir sa Rwayonm ek bann ki siport li. Pa i enportan ki nou pres avek devouman lo sa Rwayonm e viv annakor avek son bann prensip!
13:7, 17. Si nou kontinyen ekout sa konsey pour obeir e soumet avek bann sirveyan dan kongregasyon, sa pou ed nou pour annan en leta lespri kot nou korpere avek zot.
[Not anba lo paz]