ERNST * ki dan son 70 an an montan i dir: “Deplizanpli mon lasante i anpes mwan fer sa ki mon anvi fer.” Eski ou’n deza santi koumsa? Si laz pe antre e ou santi ki ou pe ganny problenm lasante e ou lafors pe diminyen, ou kapab konpran sa ki ganny dekrir dan Eklezyast sapit 12. Dan verse 1, lavyeyes i ganny apele konman “bann zour difisil.” Kantmenm sa, sa pa vedir tou in fini pour ou. Ou ankor kapab servi Zeova dan lazwa e annan en lavi satisfezan.

Frer ek ser aze, ou pa tousel pour fer fas avek ou bann leprev. Bann serviter Zeova aze dan letan Labib ti fer fas avek bann menm problenm. Par egzanp, Izaak, Zakob ek Aiya ti nepli vwar kler. (Zen. 27:1; 48:10; 1 Rwa. 14:4) Sara ti santi li epwize akoz lavyeyes. (Zen. 18:11, 12) Lerwa David “pa ti arive ganny sofe.” (1 Rwa. 1:1) Barzilai ki ti byen ris ti nepli ganny gou manze e ni menm apresye lanmizik. (2 Sam. 19:32-35) Abraam ek Naomi ti bezwen fer fas avek lanmor zot konzwen.—Zen. 23:1, 2; Rit 1:3, 12.

Kwa ki ti ed zot pour reste fidel avek Zeova e gard zot lazwa? Dan son vye zour, Abraam ti krwar dan bann promes Bondye e sa ti fer ki “son lafwa ti vin pli for.” (Rom. 4:19, 20) Nou osi nou bezwen en lafwa solid. Sa kalite lafwa pa depan lo nou laz, abilite oubyen sirkonstans. Par egzanp, menm ler Zakob ti tou fay fay, aveg e ti nepli kapab marse, i ti montre ki i ti annan en lafwa solid dan bann promes Bondye. (Zen. 48:1-4, 10; Ebr. 11:21) Ozordi, Ines ki annan 93 an i soufer avek en problenm misk, me kantmenm sa i dir: “Toulezour mon santi ki mon ganny rekonpanse avek Zeova. Toulezour mon mazin Paradi. Sa i donn mwan lespwar.” Pa sa i en bon leta lespri!

Nou ranforsi nou lafwa ler nou priye, etidye Parol Bondye e asiste bann renyon Kretyen. Profet Danyel ti en bon pti laz kan i ti priy trwa fwa par zour e i ti kontinyen etidye Parol Bondye. (Dan. 6:10; 9:2) Ann ki ti en vev aze “pa ti kit Tanp.” (Lik 2:36, 37) Ler ou asiste renyon kan i posib e partisip o tan ki ou kapab, sa pa zis ankouraz ou me osi bann ki dan lasistans. Pa bliye ki Zeova i touzour pran plezir dan ou bann lapriyer menm si ou pa kapab fer bokou.—Prov. 15:8.

Bokou zot serviter fidel ti a kontan vwar kler pour lir e annan ase lafors pour asiste renyon, me ou vwar li deplizanpli difisil, petet menm enposib. Alor, ki ou kapab fer? Servi byen sa ki ou annan a ou dispozisyon. Bokou ki pa kapab asiste renyon i ekout par telefonn. Inge ki annan 79 an pa tro vwar kler, me kantmenm sa i prepar renyon par servi bann piblikasyon ki en frer dan son kongregasyon i enprimen an gro karakter.

I kapab ki ou annan en keksoz ki lezot ti a kontan annan, sa i letan. Akoz ou pa servi ou letan pour ekout bann lanrezistreman odyo Labib, piblikasyon, diskour ek dram? Ou kapab osi pran linisyativ pour telefonn lezot frer ek ser pour partaz en kado spirityel e “ansanm benefisye lankourazman” kanmarad.—Rom. 1:11, 12.

Christa ki dan son 85 an an montan i dir: “I terib pour fer mwens konpare avek sa ki mon ti fer avan.” Alor, ki mannyer bann aze i kapab gard zot lazwa? Peter ki annan 75 an i dir: “Par annan en  pwennvi pozitif olye ki zis mazin lo sa ki ou nepli kapab fer kontant ou avek sa ki ou kapab fer.”

Eski ou kapab mazin bann loportinite ki ou ankor annan pour prese? Heidi pa kapab pres port an port parey avan. Dan son 80 an an montan i ti aprann servi konpiter pour ekri bann let. Lezot proklanmater aze i konmans koz lo Labib ler zot pe asiz lo en ban dan en park oubyen kot en bestop. Oubyen si ou reste dan en lenstitisyon pour bann aze, eski ou kapab fer li vin ou teritwar par pres avek bann dimoun ki travay e reste la?

Dan son vye zour, Lerwa David ti promot vre ladorasyon avek devouman. I ti donn larzan e organiz travay konstriksyon tanp. (1 Kron. 28:11–29:5) Pareyman, ler ou konnen ki pe arive konsernan travay Rwayonm ki pe ganny fer dan lemonn antye, fer sa ki ou kapab pour ede. Akoz ou pa siport bann pionye oubyen lezot proklanmater devoue dan ou kongregasyon par bann parol ankourazan, en pti kado oubyen en pti rafresisman? Ou kapab priy pour bann zenn ek bann fanmir, bann serviter a plen tan, bann ki malad e bann ki annan bann gro responsabilite.

Ser ek frer aze, nou Papa dan lesyel pa pou zanmen rezet ou. (Ps. 71:9) Ou ek ou servis i annan en gran valer. Zeova i kontan e apresye ou. Byento, menm si nou tou laz pou monte nou pa pou resanti okenn problenm lavyeyes. O kontrer, nou pou kontinyen servi Zeova nou Bondye ki kontan nou avek bokou lenerzi ek en lasante parfe pour leternite!