Samu 21:1-13
Kuli mukwa-kusongwela miaso. Mwaso wa Ndawichi.
21 Yehova, mwanangana kanawahilila mumu hiwamutakamisa.Kanawahilila chinji mumu lia yitanga ye ya ulamwino.
2 Wamwaha yuma yeswe yize azangile,kuwamuminyine chuma nichimwe chize echile. (Mana ndambu)
3 Wamuwahisa chinji.Wasa chipangula cha oru yipema ku mutwe wenyi.
4 Iye kakwita mwono, yiumwaha mwono,mwono wa miaka yinji, wa mutolo, uze ushi songo.
5 Yitanga ye ya ulamwino yakumuhalisa.
Wakumulemesa ni kumuchichimieka.
6 Wakumuwahisa ku miaka ya mutolo.Kakuwahilila ha kupwa kumeso je.
7 Mwanangana kakujikijila muli Yehova.Iye kechi keza kakokoloka mumu lia zango lize kulishi kuhwa lia Chitunda.
8 Kwoko lia Zambi mulikakwata akwa-kole jenyi eswe.Kwoko lienyi lia utata mulikakwata eswe waze akumuvwila kole.
9 Ha shimbu lize hanatesa iye makaanongesa ni kahia.
Yehova makaanongesa mu ufwatulo wenyi.
10 Mukakuwisa minyachi yo yeswe.Mukashiha ana jo eswe.
11 Katesa kukulinga upi,alioze kechi kahasa.
12 Muze mukaamika uta we wa manana,mukaahanga.
13 Yehova, katuka hanga usolole tachi je.
Mutukakwimbila miaso ya uhaliso mumu lia ndundo je.
