Samu 59:1-17
Kuli mukwa-kusongwela miaso. Mwaso wa kwimba ni “Kanda Unongesa.” Mwaso wa Ndawichi. Mikatame. Muze Saulu atumine atu jenyi ajikinyine zuwo lia Ndawichi hanga amushihe.
59 Zambi yami, ngulamwine kama kuli akwa-kole jami.Ngufunge kama kuli waze akulimika ni yami.
2 Ngulamwine kama kuli atu api.Ngulamwine kama kuli yingulungulu.
3 Ayo kanangujikinyina hanga angushihe.Yehova, malunga yitakame kanangukatukila,chipwe ngwe chalingile chuma chipi hanji kuvulumuna.
4 Chipwe ngwe chalingile chuma chipi, nihindu ayo kanalilulieka ni kuzomboka hanga angulukukile.
Tweya kama ungukwase, tala kama yize anangulinga.
5 Mumu yena Yehova, Zambi ya tujita, uli Zambi ya Izalele.
Tweya kama utale yize akwa-mavungu analingi.
Kanda uvwila keke atu waze akukunjika akwo ni kwalinga upi. (Mana ndambu)
6 Ayo kakuhiluka ufuku weswe.Kakupwoza ngwe tuwa ni kwendangana mu mbonge.
7 Panjika yuma yize ayo anambe.Mivumbo yo yambuka ngwe tutana.Ayo kakulihula ngwo: “Iya unatwivwa?”
8 Alioze, yena Yehova mukaaseha.Mukalelesa mavungu eswe.
9 Yena uli tachi jami, kuli yena mungushimbwila.Mumu Zambi kali uchinyino wami.
10 Zambi yoze wakungusolwela zango lize kulishi kuhwa meza hanga angukwase.Zambi mangwecha hanga ngumone unongeso wa akwa-kole jami.
11 Kanda waashiha haliapwila, kuchina atu jami mavulama.
Amwange ni tachi je hanga alitokele.Yehova, amwese kama lamba. Yena uli lukepwe wetu.
12 Ayo amone lamba mumu lia kuzo yo.Amone lamba mumu lia kuvulumuna ni maliji jo.Amone lamba mumu lia shingo ni mahuza waze akuhanjika.
13 Anongese mumu lia ufwatulo we.Akuwise achine kupwako nawa,hanga anyingike ngwo, yena uli Zambi yoze wakuyula mu Izalele ni hashi heswe. (Mana ndambu)
14 Eche ahiluke chingoloshi.Apwoze ngwe tuwa, endangane mu mbonge.
15 Endangane ni kufupa yize malia.Kanda akuta chipwe kuwana chihela cha kupombela.
16 Alioze, yami mungukemba hakutwala ku tachi je.Chimene mungukahanjika ni chiseke ha zango lie lize kulishi kuhwa.
Mumu yena uli uchinyino wami,Chihela chize munguhasa kuchinyina muze mungumona lamba.
17 Yena uli tachi jami, mungukwimbila miaso ya uhaliso.Mumu Zambi iye uchinyino wami, Zambi yoze wakungusolwela zango lize kulishi kuhwa.
