Samu 83:1-18
Mwaso. Mwaso wa Asafwe.
83 Zambi yami, kanda uhola kuluu.Kanda ulihulika, chipwe kulihumikiza, yena Zambi yami.
2 Mumu akwa-kole je kanakukatukila.Waze akukuvwila kole kanalimika ni yena.
3 Ayo kakutela miheto atu je.Kakutwama punga waze yena wakuchichimieka.
4 Ayo kakwamba ngwo: “Tuyenu hanga tunongese vungu lio.Hanga jina lia Izalele ahone kulivuluka nawa.”
5 Ayo kakulitesa yize malinga.Hakolesa usendo hanga alimike ni yena:
6 A-Endome, A-Ishemali, A-Moape, A-Hekare,
7 A-Gepale, A-Amone, A-Amaleke,A-Filistea hamuwika ni atu a ku Teru.
8 A-Ashure yalichinga hamwe no.Ayo kakuhana ukwaso kuli ana ja Lote. (Mana ndambu)
9 Linga kuli ayo yize walingile kuli Mindiane,Sisera ni Jabini ku lwiji Kishone.
10 Ayo yaanongesa ku Endore.Yapwa ngwe pinga ja kukuwa ha mbuto.
11 Linga kuli miata jo yize walingile kuli Orepe ni Zepe.Linga kuli alemu jo yize walingile kuli Zeba ni Zalumuna.
12 Mumu kamba ngwo: “Tuhingenu chifuchi chize Zambi atwama.”
13 Zambi yami, apwise ngwe yitemo yumu yize yakuhehuka ni fuji.Ngwe yiswaswa yize yakuhehuka ni fuji.
14 Ngwe chizechene kahia kakwocha yambu,ngwe chizechene kahia kakulekwoka ha milundu,
15 ahange ni kakundukundu.Evwise woma ni chijimbi.
16 Yehova, akolese sonyi jinjiHanga ayo ahalise jina lie.
17 Akolese sonyi ni kwevwisa woma ku miaka yeswe.Akolese sonyi hanga ahone kupwako nawa.
18 Atu eswe anyingike ngwo, jina lie Yehova.Yena wika uli Chitunda helu lia hashi heswe.
