Samu 25:1-22
Mwaso wa Ndawichi.
א [Alefe]
25 Yehova, kuli yena nakuchinyina.
ב [Bete]
2 Zambi yami, muli yena nakujikijila.Kanda wecha hanga akwa-kole angukolese sonyi.
Kanda wecha akwa-kole jami awahilile mumu lia lamba liami.
ג [Guimele]
3 Waze akujikijila muli yena kechi kevwa sonyi.Makevwa sonyi kali waze akulinga yuma yipi chakuhona chitela.
ד [Dalete]
4 Yehova, ngulweze kama ni kungulongesa majila je.ה [He]
5 Ngwendese mu umwenemwene we ni kungulongesawo.Mumu yena uli Zambi ya ulamwino wami.
ו [Vau]
Muli yena nakushimbwila matangwa eswe.
ז [Zaine]
6 Yehova, ewuluka kama keke ni zango lie lize kulishi kuhwa,Lize wakusolola matangwa eswe.
ח [Hete]
7 Yehova, kanda wiwuluka kama shili ya ukweze wami.
Ngwiwuluke kama kulita ni zango lie lize kulishi kuhwa,Mumu lia upeme we.
ט [Tete]
8 Yehova mupema, kali mukwa-ululi.
Kashika akusongwela yivulumunyi mu jila yize atamba kwenda.
י [Yode]
9 Kakusongwela yimbovu mu jila yalita ni kwalongesa majila jenyi.כ [Kafe]
10 Yehova kakusolola zango lize kulishi kuhwa ni ushishiko kuli waze akufunga usendo wenyi ni utowezo wenyi.ל [Lamede]
11 Yehova, konekena kama shili yami mumu lia jina lie,Chipwe ngwe yili yinene.
מ [Meme]
12 Mutu muka wakuvumbika Yehova?
Iye mamusongwela mu jila yize atamba kwendela.
נ [Nune]
13 Iye makapwa ni yuma yipema.Ana jenyi makahinga chifuchi.
ס [Sameque]
14 Yehova kakulikata ni waze akumuvwila woma.Iye kakwanyingikisa usendo wenyi.
ע [Aine]
15 Meso jami kakulihulikila kuli Yehova.Mumu iye matusula molu jami mu muheto.
פ [Pe]
16 Teulula kama meso je kuli yami, nguvwile kama keke.Mumu nguli ukawami, ngunanenganyana.
צ [Tsade]
17 Yikola mu mbunge yami yoka naye.Nguhuzulule kama ku yinyengo yami.
ר [Reshe]
18 Tala kama ha yikola ni lamba liami.Konekena kama shili yami yeswe.
19 Tala kama chize akwa-kole jami ali anji,Ni chize akunguvwila kole.
ש [Chime]
20 Funga kama mwono wami, ngulamwine.
Kanda wecha hanga anguvwise sonyi, mumu nakujikijila muli yena.
ת [Tau]
21 Ushishiko ni ungunu ungufunge,Mumu muli yena nakujikijila.
22 Zambi yami, pulwila kama A-Izalele ku lamba lio lieswe.
