Samu 72:1-20
Hakutwala kuli Solomone.
72 Zambi yami, longesa kama mwanangana yiyulo ni upatwilo we.Longesa kama mwana wa mwanangana ululi we.
2 Iye ayule atu je ni ululi,Apatwile yiswale ni ululi.
3 Milundu yinehe sambukila kuli atu je.Mindundena yinehe ululi.
4 Iye akalile akwa-kuhona hakachi ka atu.Alamwine ana ja yiswale.Anongese waze akwamwesa lamba.
5 Ayo makuwayila ndo muze tangwa ni kakwejimuyinunga ni kupwako,Ndo ku miaka yeswe.
6 Iye makapwa ngwe vula yoze wakunokena ha mwambu wa kuteta.Ngwe vula munji yoze wakuulisa hashi.
7 Ha matangwa ja mwanangana wacho, mukwa-ululi makapwa ngwe mwambu wa wisu.Mukukapwa sambukila yinji ngwe chize kakweji akununga mu malilu.
8 Wanangana wenyi muukatanda sali limwe lia kalunga-lwiji ndo sali likwo lia kalunga-lwiji.Chize ku lwiji ndo ku masongo a hashi.
9 Atu waze atwama mu puya kumakafulamana kumeso jenyi.Akwa-kole jenyi makalesa fufuta.
10 Mianangana a ku Tashi ni a ku tungu makafweta lijimu.
Mianangana a ku Shipa ni Sepa makaneha yawana.
11 Mianangana eswe makafulamana kumeso jenyi.Mavungu eswe makamukalakalila.
12 Iye makakwasa chiswale yoze unete ukwaso.Makakwasa nawa mukwa-kuhona yoze keshi ni mutu yoze mamukwasa.
13 Makevwila keke chiswale ni mukwa-kuhona.Makalamwina mwono wa yiswale.
14 Iye makaalamwina ku lamba ni ku upupilo.Manyinga jo makapwa alemu chinji kuli iye.
15 Mwanangana atwame miaka yinji, atambule oru ya ku Shipa.
Atu alembe hakutwala kuli iye mashimbu eswe.Amuwahise tangwa lieswe lia muundu.
16 Hashi muhakapwa kulia chinji ni ku milunduneko mukukasoka mbuto yinji.
Mbuto ya mwanangana muyikasoka ngwe ku Lebano.Mu mambonge atu makoka ngwe mwambu.
17 Jina lienyi linunge ku miaka yeswe.Lufuma wenyi anunge ngwe tangwa.
Atu aawahise kupalikila muli mwanangana.Atu eswe amuvuluke ngwo, kawaha.
18 Yehova Zambi ya Izalele afumane.Iye wika wakulinga yuma yakukomwesa.
19 Jina lienyi alifumanyise ku miaka yeswe.Uhenya wenyi uzalise hashi heswe.
Amene, amene!
20 Hano he hanasulila kulemba cha Ndawichi mwana wa Yese.
