Usa ka Diyos nga Andam Mopasaylo
Pakigsuod sa Diyos
Usa ka Diyos nga Andam Mopasaylo
“OH Jehova, [ikaw] maayo ug andam sa pagpasaylo.” (Salmo 86:5) Ang maong makapahupayng mga pulong sa Bibliya nagpasalig kanato nga si Jehova mapinasayloon. Ang usa ka panghitabo sa kinabuhi ni apostol Pedro nagpakita nga si Jehova mopasaylo nga “madagayaon gayod.”—Isaias 55:7.
Usa si Pedro sa kinasuorang higala ni Jesus. Apan sa kataposang gabii sa kinabuhi ni Jesus sa yuta, si Pedro nadaog sa iyang kahadlok sa tawo ug nakahimog grabeng sala. Diha sa hawanan sa balay diin ilegal nga gihusay si Jesus, dili lang makausa kondili makatulo ka higayon nga gilimod ni Pedro si Jesus. Human niana, si Jesus “milingi ug mitan-aw kang Pedro.” (Lucas 22:55-61) Mahanduraw ba nimo ang iyang gibati sa dihang si Jesus mitan-aw kaniya? Sa pagkaamgo sa kaseryoso sa iyang sala, si Pedro “nahugno ug mihilak.” (Marcos 14:72) Ang mahinulsolong apostol lagmit nagduhaduha kon mapasaylo pa siya sa Diyos tungod sa iyang gihimo.
Human sa iyang pagkabanhaw, si Jesus nakigsulti kang Pedro ug sa walay duhaduha si Pedro napasaylo na. Si Jesus wala mosulti kaniyag sakit, ni misaway kaniya. Hinuon, siya nangutana kang Pedro: “Gihigugma mo ba ako?” Si Pedro mitubag: “Oo, Ginoo, nahibalo ka nga gimahal ko ikaw.” Giingnan siya ni Jesus: “Pakan-a ang akong mga nating karnero.” Si Jesus nangutana kaniya sa ikaduhang higayon, ug mao gihapon ang tubag ni Pedro, apan lagmit mas puwersado na ang iyang tingog. Si Jesus miingon: “Bantayi ang akong gagmayng mga karnero.” Dayon gisubli ni Jesus sa ikatulong higayon ang mao gihapong pangutana: “Gimahal mo ba ako?” Niining higayona si “Pedro naguol” ug miingon: “Ginoo, nahibalo ka sa tanang butang; nasayod ka nga gimahal ko ikaw.” Si Jesus mitubag: “Pakan-a ang akong gagmayng mga karnero.”—Juan 21:15-17.
Nganong nangutana pa man niana si Jesus nga nahibalo na man siya sa tubag? Si Jesus makabasa sa kasingkasing, busa nahibalo siya nga gimahal siya ni Pedro. (Marcos 2:8) Pinaagi sa pagsukna sa maong mga pangutana, gihatagan ni Jesus si Pedro ug kahigayonan sa pagpahayag sa iyang gugma sa tulo ka higayon. Ang mga pulong ni Jesus: “Pakan-a ang akong mga nating karnero. . . . Bantayi ang akong gagmayng mga karnero. . . . Pakan-a ang akong gagmayng mga karnero,” nagpalig-on sa mahinulsolong apostol nga si Jesus misalig gihapon kaniya. Kon buot hunahunaon, gipiyal ni Jesus kang Pedro ang iyang labing bililhong kabtangan—ang iyang samag-karnerong mga sumusunod. (Juan 10:14, 15) Sa walay duhaduha, nahupayan gayod si Pedro sa pagkahibalo nga siya giisip gihapon ni Jesus nga kasaligan.
Tin-aw nga gipasaylo ni Jesus ang mahinulsolong apostol. Sanglit hingpit man nga nadayag diha kang Jesus ang mga hiyas ug pamaagi sa iyang Amahan, ikaingon nato nga gipasaylo usab ni Jehova si Pedro. (Juan 5:19) Si Jehova dili gayod magpanuko sa pagpasaylo, ug siya usa ka maluluy-ong Diyos nga “andam sa pagpasaylo” niadtong mahinulsolon. Dili ba makapahupay gayod kini?