Mga Leksiyon Gikan sa Rekord sa Pagkatawo ni Jesus

MINILYONG tawo ang mahinam sa mga panghitabo bahin sa pagkatawo ni Jesus. Makita kini diha sa daghang gidispley nga mga Belen ug sa mga pasundayag sa pagkatawo ni Jesus nga ginahimo sa tibuok kalibotan inigka-Pasko. Bisan tuod makapahinam, ang mga hitabo bahin sa pagkatawo ni Jesus wala irekord diha sa Bibliya aron sa paglingaw sa mga tawo. Hinunoa, kini nahimong bahin sa tibuok Kasulatan nga gidasig sa Diyos aron sa pagtudlo ug sa pagtul-id.—2 Timoteo 3:16.

Kon buot sa Diyos nga saulogon sa mga Kristohanon ang pagkatawo ni Jesus, nan ang Bibliya naghatag unta sa eksaktong petsa niini. Naghatag ba ug petsa ang Bibliya? Human maghisgot nga si Jesus natawo sa dihang ang mga magbalantay nagtukaw didto sa sibsibanan sa gawas nga nagbantay sa ilang mga karnero, ang ika-19ng siglo nga eskolar sa Bibliya nga si Albert Barnes naghinapos: “Pinasukad niini dayag nga ang atong Manunubos natawo sa wala pa ang ika-25 sa Disyembre . . . Tingtugnaw sa maong panahon, ilabina sa kabungtoran ug kabukiran duol sa Betlehem. Ang Diyos wala magpahibalo sa petsa sa pagkatawo [ni Jesus]. . . . Ni hinungdanon pa nga mahibaloan ang petsa; kay kon hinungdanon pa, tipigan unta sa Diyos ang rekord niini.”

Sa kasukwahi, ang upat ka magsusulat sa Ebanghelyo tin-aw nga nagpahibalo kanato sa adlaw sa pagkamatay ni Jesus. Nahitabo kadto sa adlaw sa Paskuwa, nga gisaulog sa ika-14 sa Hudiyohanong bulan sa Nisan, sa tingpamulak. Dugang pa, espesipikong nagsugo si Jesus sa iyang mga sumusunod sa pagsaulog sa  maong adlaw aron sa paghandom kaniya. (Lucas 22:19) Sa pagkatinuod, ang Bibliya wala magsugo nga saulogon ang adlawng-natawhan ni Jesus, ni ang adlawng-natawhan ni bisan kinsang tawo. Ikasubo, ang mga kasungian bahin sa petsa sa pagkatawo ni Jesus basin makalubog sa mas hinungdanong mga panghitabo niadtong panahona.

Mga Ginikanan nga Gipili sa Diyos

Taliwala sa libolibong pamilya sa Israel, unsang matanga sa mga ginikanan ang gipili sa Diyos nga maoy magmatuto sa iyang Anak? Gipalabi ba Niya ang pagkailado ug pagkaadunahan? Wala. Sa kasukwahi, gipabilhan ni Jehova ang espirituwal nga mga hiyas sa mga ginikanan. Susiha ang awit sa pagdayeg ni Maria, nga narekord sa Lucas 1:46-55, nga iyang giawit human siya sultihi sa iyang pribilehiyo nga mahimong inahan sa Mesiyas. Lakip sa ubang mga butang, siya miingon: “Pagapadakoon sa akong kalag si Jehova . . . kay iyang gilantaw ang ubos nga kahimtang sa iyang ulipong babaye.” Mapaubsanon niyang giisip ang iyang kaugalingon ingong usa nga ‘ubos ug kahimtang,’ usa ka ulipong babaye ni Jehova. Labawng hinungdanon, ang maanindot nga mga pulong sa pagdayeg diha sa awit ni Maria nagbutyag nga siya maoy espirituwal nga tawo nga may igong kahibalo sa Kasulatan. Bisan tuod makasasala nga kaliwat ni Adan, siya gipili nga angayan nga mahimong yutan-ong inahan sa Anak sa Diyos.

Komosta ang bana ni Maria, nga nahimong amaama ni Jesus? Mahibalong mamanday si Jose. Tungod sa iyang pagkaandam nga maghago, siya nakatagana sa mga panginahanglan sa usa ka pamilya nga sa ulahi midako nga may lima ka anak nga lalaki ug labing menos duha ka anak nga babaye. (Mateo 13:55, 56) Dili adunahan si Jose. Sa dihang miabot ang panahon nga ipresentar na ni Maria ang iyang panganay nga anak lalaki sa templo sa Diyos, lagmit nahigawad gayod si Jose nga siya dili makaarang sa pagtanyag sa halad nga usa ka karnero. Isip kapuli, kinahanglang pahimuslan nila ang tagana alang sa mga kabos. Maylabot sa inahan sa usa ka bag-ong mahimugso nga anak lalaki, ang balaod sa Diyos nag-ingon: “Kon siya dili makaarang sa usa ka karnero, nan siya magdala ug duha ka tukmo o duha ka piso sa salampati, ang usa ingong halad-nga-sinunog ug ang usa ingong halad-sa-sala, ug ang saserdote maghimog pagtabon-sa-sala alang kaniya, ug mamahinlo siya.”—Levitico 12:8; Lucas 2:22-24.

Ang Bibliya nag-ingon nga si Jose “matarong.” (Mateo 1:19) Pananglitan, wala siya makigsekso sa iyang ulay nga asawa hangtod nga natawo si Jesus. Tungod niini nalikayan ang bisan unsang kalibog kon kinsay tinuod nga Amahan ni Jesus. Alang sa usa ka bag-ong kinasal, dili sayon nga dili makigdulog samtang magpuyo diha sa usa ra ka balay. Nagpakita lamang kadto nga gipabilhan gayod nila ang pribilehiyo isip gipiling mga ginikanan sa pagmatuto sa Anak sa Diyos.—Mateo 1:24, 25.

Sama kang Maria, si Jose maoy usa ka espirituwal nga tawo. Kada tuig moundang siya sa pagtrabaho ug mopanaw uban sa iyang pamilya sulod sa tulo ka adlaw gikan sa Nasaret padulong sa Jerusalem aron motambong sa tinuig nga pista sa Paskuwa. (Lucas 2:41) Lagmit gibansay usab ni Jose ang batan-ong si Jesus sa senemanang kostumbre nga makig-ambit sa pagsimba diha sa sinagoga sa ilang lugar, diin ang Pulong sa Diyos gibasa ug gisaysay. (Lucas 2:51; 4:16) Sa ingon, walay duhaduha nga napili sa Diyos ang angay nga yutan-ong inahan ug amaama alang sa iyang Anak.

Dakong Panalangin Alang sa Ubos nga mga Magbalantay

Bisan pag naglisod ang iyang asawa, nga niadto siyam na ka bulan nga mabdos, si Jose mipanaw ngadto sa siyudad sa iyang mga katigulangan aron magparehistro, agig pagsugot sa mando ni Cesar. Pag-abot sa magtiayon sa Betlehem, wala silay nakitang kasak-an diha sa naghuot nga siyudad. Tungod  sa mga kahimtang napugos sila sa paggamit sa kuwadra, diin si Jesus natawo ug gipahiluna diha sa pasungan. Aron palig-onon ang ilang pagtuo, gikompirmar ni Jehova ngadto sa mapaubsanong mga ginikanan nga ang maong pagkatawo maoy kabubut-on gayod sa Diyos. Nagpadala ba siya ug delegasyon sa iladong mga ansiyano gikan sa Betlehem aron palig-onon ang magtiayon? Wala. Hinunoa, si Jehova nga Diyos nagbutyag niini ngadto sa kugihang mga magbalantay nga nagtukaw didto sa sibsibanan sa gawas nga nagbantay sa ilang mga panon.

Nagpakita kanila ang manulonda sa Diyos ug giingnan sila nga moadto sa Betlehem, diin ilang makaplagan ang bag-ong natawong Mesiyas nga ‘naghigda sa usa ka pasungan.’ Nakurat o naulaw ba ang ubos nga mga lalaki sa pagkadungog nila nga ang bag-ong natawong Mesiyas atua sa kuwadra? Wala gayod! Sa walay langan, gibiyaan nila ang ilang mga panon ug miadto sa Betlehem. Sa pagkakaplag nila kang Jesus, giasoy nila kang Jose ug Maria ang gisulti sa manulonda sa Diyos. Nakapalig-on gayod kadto sa pagtuo sa magtiayon nga ang tanan napahigayon diay sumala sa katuyoan sa Diyos. Sa ilang bahin, ‘ang mga magbalantay namauli, nga naghimaya ug nagdayeg sa Diyos tungod sa tanang butang nga ilang nadungog ug nakita.’ (Lucas 2:8-20) Oo, pinaagi sa pagbutyag sa pagkatawo ni Jesus ngadto sa mahinadlokon sa Diyos nga mga magbalantay, si Jehova naghimog maayong pagpili.

Sumala sa nahisgotan, atong nakat-onan kon unsang matanga sa mga hiyas ang angay natong ugmaron aron matagamtam ang pag-uyon ni Jehova. Dili kinahanglang kab-oton nato ang pagkailado o pagkaadunahan. Hinunoa, sama kang Jose, Maria, ug sa mga magbalantay, kita angayng mosugot sa Diyos ug magpamatuod sa atong gugma kaniya pinaagi sa pag-una sa espirituwal nga mga intereses inay kay sa materyal nga mga butang. Sa pagkatinuod, adunay maayong mga leksiyon nga atong makat-onan pinaagi sa pagpamalandong sa rekord sa mga panghitabo sa pagkatawo ni Jesus.

[Hulagway sa panid 7]

Unsay gipakita sa pagtanyag ni Maria ug duha ka salampati?

[Hulagway sa panid 7]

Ang Diyos mipalabi sa pagbutyag sa pagkatawo ni Jesus ngadto sa pipila ka ubos nga mga magbalantay