Mga Katarongan Kon Nganong Kasaligan ang Bibliya
3. Nagkahiuyon
Handurawa pananglitan nga gihangyo ang 40 ka tawo nga lainlain ug gigikanan sa pagsulat ug libro, nga ang matag usa gipasulat ug usa ka seksiyon. Ang mga magsusulat nagpuyo sa nagkalainlaing nasod ug busa wala sila magkailhanay. Ang pipila kanila wala mahibalo kon unsay gipanulat sa uban. Sa imong hunahuna, magkahiuyon kaha ang ilang gipanulat diha sa libro?
INGON niana ang Bibliya. * Bisag gisulat sa mas lahi kaayo nga mga kahimtang kay sa gihubit sa ibabaw, kini nagkahiuyon gihapon.
Purpura ba o eskarlata ang kolor sa besti ni Jesus?
Talagsaong mga kahimtang.
Ang Bibliya gisulat ug kapin sa mga 1,600 ka tuig, gikan sa 1513 W.K.P. ngadto sa mga 98 K.P. Busa kadaghanan sa 40 ka magsusulat nagkinabuhi sa lainlaing siglo. Lainlain sila ug mga trabaho. Ang pipila mga mangingisda, ang uban mga magbalantay ug hayop ug dihay mga hari, ug usa kanila doktor.
Nagkahiuyon ang mensahe.
Usa lang ang dugokang tema sa mga magsusulat sa Bibliya: ang pagbindikar sa katungod sa Diyos sa pagmando sa katawhan ug ang katumanan sa iyang katuyoan pinaagi sa iyang langitnong Gingharian, nga usa ka tibuok kalibotang kagamhanan. Kana nga tema gihisgotan sa unang higayon diha sa Genesis, gidetalye sa sunod nga mga basahon, ug gitapos sa Pinadayag.—Tan-awa ang “Unsay Gihisgotan sa Bibliya?” sa panid 19.
Nagkauyon ang mga detalye.
Ang mga magsusulat sa Bibliya nagkauyon bisan sa gagmayng mga detalye, apan kasagaran kini wala tuyoa. Pananglitan, ang magsusulat sa Bibliya nga si Juan nag-asoy kanato nga sa dihang nangabot ang mga tawo aron sa pagpamati kang Jesus, si Felipe maoy gipangutana ni Jesus kon asa mopalit ug tinapay nga ipakaon sa mga tawo. (Juan 6:1-5) Sa asoy ni Lucas, siya miingon nga kini nahitabo duol sa siyudad sa Betsaida. Si Juan nakahisgot sa unang bahin sa iyang basahon nga taga-Betsaida si Felipe. (Lucas 9:10; Juan 1:44) Siyempre si Felipe ang pangutan-on ni Jesus kay taga-didto man siya. Ang mga detalye nagkauyon, apan kini wala tuyoa. *
Nagkahiuyon bisag may mga kalainan.
Dunay mga kalainan ang pipila ka asoy, apan dili ba madahom nato kini? Ingnon ta nga usa ka grupo sa mga tawo nakasaksi ug usa ka krimen. Kon magkaparehas ang tanang pulong ug mga detalye nga isulti sa matag usa, dili ba magduda ka nga gisabotan nang daan ang ilang gisulti? Siyempre ang testimonya sa matag usa medyo molahi depende sa iyang panglantaw. Ingon usab niini ang mga magsusulat sa Bibliya.
Palandonga ang usa ka pananglitan. Purpura (morado) ba ang kolor sa besti ni Jesus sa adlaw nga namatay siya, sumala sa giasoy ni Marcos ug Juan? (Marcos 15:17; Juan 19:2) O eskarlata (hayag nga pula) ba, sumala sa giingon ni Mateo? (Mateo 27:28) Mahimong husto kining duha, kay ang purpura may pagkapula man. Depende sa lugar nga gibarogan sa nagtan-aw, ang kolor sa besti medyo molahi tungod sa palibot ug sa kahayag nga maigo diha niini. *
Ang mga magsusulat sa Bibliya nagkahiuyon, nga nagpakita lamang nga kasaligan ang ilang gipanulat.
^ par. 4 Ang Bibliya gilangkoban ug 66 ka basahon, nga ang unang basahon niini mao ang Genesis ug ang kataposan mao ang Pinadayag.
^ par. 7 Alang sa uban pang pananglitan sa panagkauyon nga sama niini, tan-awa ang mga panid 16-17 sa brosyur nga Usa ka Basahon Alang sa Tanang Tawo, nga gipatik sa mga Saksi ni Jehova.
^ par. 9 Alang sa dugang impormasyon, tan-awa ang kapitulo 7 nga nag-ulohang “Ang Bibliya ba Nagsupak sa Iyang Kaugalingon?” sa librong Ang Bibliya—Pulong sa Diyos o sa Tawo? nga gipatik sa mga Saksi ni Jehova.