“Gipriso Tungod sa Ilang Pagtuo”

TINAMPO SA MAGSUSULAT SA PAGMATA! SA POLANDIA

ANG mga pulong Arbeit Macht Frei (Ang Trabaho Makahatag ug Kagawasan) hangtod karon makita diha sa puthawng ganghaan sa kampong konsentrasyon sa Auschwitz sa habagatang Polandia, mga 60 kilometros gikan sa utlanan sa Czechoslovakia. a Apan, kanang mga pulonga sukwahi sa tinuod nga nahitabo sa kadaghanan sa mga tawong misulod sa maong ganghaan sa mga 1940 ug 1945. Niadtong mga tuiga, kapin sa usa ka milyon nga nabilanggo sa Auschwitz nangamatay sa kamot sa mga Nazi. Apan, dihay mga indibiduwal sa usa ka grupo  nga hatagan unta ug kagawasan sa bisan unsang panahon.

Unsa may kinahanglang himoon niining mga tawhana aron sila buhian gikan sa prisohan? Ang bisan kinsa nga piniriso nga usa sa mga Saksi ni Jehova ug mopirma ug papeles nga nag-ingon nga siya dili na mag-Saksi buhian. Unsay gihukom sa kadaghanan? Ang historyano nga si István Deák miingon nga ang mga Saksi “kaamgid sa unang mga Kristohanon kinsa mipili nga makunis-kunis sa leyon kay sa magtanyag ug gamayng halad diha sa halaran sa emperador sa Roma.” Ang maong baroganan takos gayod nga hinumdoman, ug kini gihinumdoman.

Sulod sa duha ka bulan, nga nagsugod sa Septiyembre 21, 2004, ang kinadak-ang hall sa Auschwitz-Birkenau State Museum nagpasundayag ug eksibit nga gipahinungod sa mga Saksi lamang. Ang eksibit dunay haom nga tema nga “Gipriso Tungod sa Ilang Pagtuo—Mga Saksi ni Jehova ug ang Rehimeng Nazi.” Kini dunay 27 ka displey nga naglarawan sa hugot nga determinasyon sa mga Saksi sa pagpabiling neyutral ingong mga Kristohanon sa panahon sa mga Nazi.

Daghang bisita natandog sa kopya sa usa ka sulat gikan sa prisohan nga gipadala ni Deliana Rademakers nga taga-Netherlands. Nagsulat sa iyang pamilya, siya miingon: “Isaad ko nga tumanon ko ang kabubut-on ni Jehova. . . . Magmaisogon kamo. Si Jehova nagauban kanato.” Sa 1942, si Deliana gipadala ngadto sa Auschwitz, diin wala abtig tulo ka semana siya namatay.

Tanan-tanan duolan sa 400 ka Saksi ang nabalhog sa Auschwitz. Tulo sa nakalabang-buhi presente sa pagbukas sa eksibit, diin ilang giasoy ang ilang naagoman sa prisohan ug gitubag ang mga pangutana sa mga magsusulat. Sila nagpakita ug mao gihapong kalig-on nga nakatabang kanila sa pagpabiling-buhi sa malisod nga mga kahimtang sa kampo.

Diha sa iyang librong Imprisoned for Their Faith—Jehovah’s Witnesses in Auschwitz Concentration Camp, ang tigdukiduki nga si Teresa Wontor-Cichy sa State Museum misulat: “Ang baroganan niining gamayng grupo nakahatag ug maayong impluwensiya sa ubang mga piniriso, ug ang ilang hugot nga pagdumili sa pagkompromiso nakapalig-on sa uban sa pagtuo nga ilalom sa tanang kahimtang ang mga tawo makapabiling matinumanon sa mga prinsipyo nga ilang gilabanan.”

Ang tinuod mao, ang pagkapriso ug kamatayon dili butang bag-o sa mga sumusunod ni Jesu-Kristo, kinsa gidakop ug gipatay tungod sa iyang pagtuo. (Lucas 22:54; 23:32, 33) Ang apostol ni Jesus nga si Santiago gipatay usab. Si apostol Pedro gibalhog sa bilanggoan, ug si apostol Pablo gibunalan ug gibilanggo sa daghang higayon.—Buhat 12:2, 5; 16:22-25; 2 Corinto 11:23.

Sa susama, ang mga Saksi ni Jehova sa Uropa naghatag ug maayo kaayong panig-ingnan sa pagtuo sa Diyos sa katuigan sa 1930 ug 1940. Dalayegon kaayo nga ang pagtuo niining mga tawhana gipasidunggan sa Auschwitz.

[Footnote]

[Hulagway sa panid 10]

Tulo sa nakalabang-buhi sa prisohan sa Auschwitz nga naghawid sa karatula sa eksibit

[Mga hulagway sa panid 11]

Si Deliana Rademakers, ug ang sulat nga iyang gisulat diha sa prisohan

[Credit Line]

Inset photos: Zdjęcie: Archiwum Państwowego Muzeum Auschwitz-Birkenau

[Picture Credit Line sa panid 10]

Tower: Dzięki uprzejmości Państwowego Muzeum Auschwitz-Birkenau