Mga Batan-on Nangutana . . .

Nganong Ganahan man Kong Makigsuod sa Kuwestiyonableng mga Tawo?

“Nahibalo ko nga dili ko angayng makigsuod niya, apan gipasagdan nako kini. Dili ko makatuo nga dunay lalaki nga makagusto nako.”​—Nancy. *

“Mag-inusara ko nga moadto sa skating rink, dayon nakig-uban ko sa mga tawong akong ‘nahigala’ didto. Wala magdugay, nahimo nang imoral ang akong paagi sa pagkinabuhi.”​—Dan.

SI Nancy ug Dan lig-on ug espirituwalidad sa sinugdanan. Si Nancy gimatuto diha sa usa ka mahinadlokon-sa-Diyos nga pamilya ug nagsugod sa pagpaambit sa iyang pagtuo ngadto sa uban sa edad nga nuybe anyos. Si Dan misulod sa bug-os-panahong ministeryo sa tin-edyer pa siya. Bisan pa niana, ang ilang espirituwalidad naluya. Ngano? Tungod kay nakig-uban sila sa kuwestiyonableng mga tawo.

Ikaw ba wala damha nga nasuod sa usa ka tawo nga nahibalo ka gayod nga dili maayo ug impluwensiya kanimo? Tingali imo siyang klasmet nga pareho nimog mga interes​—o basin kaatbang nga sekso nga imong naibgan.

Lagmit nahinumdom ka sa tambag sa Bibliya: “Ang daotang pakig-uban makadaot sa mapuslanong pamatasan.” (1 Corinto 15:33) Apan ang tanang tawo ba nga wala magsimba kang Jehova maisip nga daotang kauban? Komosta kon sila maayo ug dalayegon pa gani ug mga hiyas? Komosta usab kon siya isigkamagtutuo apan dili maayong panig-ingnan ingong Kristohanon? Sa dili pa tubagon kining mga pangutanaha, atong tagdon kon sa unsang paagi ug nganong motungha kini nga tinguha sa pagpakigsuod sa kuwestiyonableng mga tawo.

Unsay mga Hinungdan Niini nga Tinguha sa Pagpakigsuod?

Sanglit ang tanang tawo gilalang sumala sa dagway sa Diyos, atong madahom nga ang ubang wala magsimba kang Jehova magpasundayag usab ug maayong mga kinaiya. Tungod niini, ang ubang tawo talahoron ug buotan bisag wala sila magsimba sa matuod nga Diyos. Angay ba gayod nga imo silang likayan tungod lang kay wala silay hibangkaagan sa mga kamatuoran sa Bibliya? Dili gayod. Sa dihang ang Bibliya nagtambag kanato sa ‘pagbuhat ug maayo ngadto sa tanan,’ kini naglakip sa mga tawong dili parehas nimo ug Kristohanong pagtuo. (Galacia 6:10) Busa ang pag-amping sa pagpili kon kinsay imong suoron wala magpasabot nga mogawi ka nga morag labaw ka kay sa uban. (Proverbio 8:13; Galacia 6:3) Kini nga panggawi makahatag ug dili maayong impresyon sa imong Kristohanong pagtuo.

Ugaling lang, labaw pa ang gihimo sa ubang Kristohanong mga batan-on; sila nakigsuod sa mga tawong dili kaayo interesado o wala gayoy interes sa espirituwal nga mga butang. Si Dan, nga  gihisgotan sa sinugdanan, nahimong batid nga tig-roller skate. Ang mga tawong iyang kauban kanunay diha sa skating rink sa ilang lugar dili mga Kristohanon. Sa ngadtongadto, si Dan miduyog sa iyang bag-ong “mga higala” sa imoral nga mga buhat ug nagtilaw-tilaw ug lainlaing droga. Kay nakaamgo nga ang iyang paagi sa kinabuhi dili na subay sa Kristohanong pagkinabuhi, gitalikdan ni Dan ang iyang ministeryo ug mihunong pagtambong sa mga tigom sa kongregasyon. Milabay una ang daghang tuig ayha pa siya nakabaton ug kaisog sa pagbag-o ug pagbalik sa matuod nga pagsimba.

Si Melanie nasuod sa usa ka isigkamagtutuo nga luya ug espirituwalidad. “Giingnan ako nga nagkinahanglan siya ug pagdasig, busa gibarkada nako siya,” matod ni Melanie. Tinuod, ang Bibliya nagdasig sa mga Kristohanon sa ‘pagbulig sa mga maluya.’ (1 Tesalonica 5:14) Apan si Melanie nagsugod sa pagkuyogkuyog sa iyang bag-ong higala diha sa mga bar, ug sa ngadtongadto kini nga pagpakig-uban nagpatumpawak kaniya sa daotang buhat.

Ang Papel sa Pamilya

Ang kahimtang diha sa panimalay makaimpluwensiya kanimo sa pagpili kon kinsay imong gustong suoron. Natingala si Michelle kon nganong morag maibog siya sa mga lalaki nga dili-mahigalaon ug dili-mabination. Iyang nahunahuna nga kining mga lalakiha makapahinumdom kaniya sa iyang amahan, kinsa wala gayod niya masuod ug morag wala gayoy panahon alang kaniya. Nagtuo siya nga naanad na kaayo siya sa pagtinguha sa pag-uyon ug atensiyon sa usa ka tawo nga lisod maduol mao nga siya makagusto nga wala tuyoa sa tawong sama nianag kinaiya.

Sa kasukwahi, ang usa ka batan-ong gimatuto sa Kristohanong mga ginikanan tingali gusto kaayong mahibalo bahin sa pagkinabuhi sa ubang tawo, ug nagtuo nga sobra ra ka mapanalipdanon kaniya ang iyang mga ginikanan. Kon tinuod man ugaling kini o dili, ang pagpakigbarkada ba sa ‘mga higalang kalibotanon’ mao ang tubag? (Santiago 4:4) Tagda ang nahitabo kang Bill.

Bisag bata pa siya nga gitudloan sa iyang inahan bahin sa Kasulatan, si Bill wala magpahinungod sa iyang kinabuhi kang Jehova, kay nagtuo nga kini makawala sa iyang kagawasan. Kay gusto man siyang masayod kon sama sa unsa ang kinabuhi sa dili tinuod nga Kristohanon, nagsugod siya sa pagpakig-uban sa usa ka grupo nga nagpatumpawak kaniya sa kinabuhi nga puno sa droga, kapintasan, ug krimen. Tungod sa pagpadagan ug kusog sa sakyanan kay gigukod sa polis, siya nasamdan ug nakoma sa pipila ka bulan. Abi sa mga doktor ug dili na siya mabuhi. Maayo na  lang, naulian si Bill. Apan siya nabuta ug nabaldado. Nakakat-on siya ug leksiyon gikan sa iyang pait nga kasinatian ug siya karon usa na ka dedikadong Kristohanon. Apan naamgohan usab ni Bill nga ang pagkat-on ug leksiyon sa malisod nga paagi mahimong pagaantoson sa tibuok kinabuhi.

Ubang mga Impluwensiya

Usahay ang mga paagi sa kalingawan makaimpluwensiya sa hunahuna sa batan-on sa kon unsay maayong higala. Pananglitan, naandan na diha sa mga libro, programa sa telebisyon, sine, ug mga music video ang paghulagway sa bida nga morag isog ug estrikto sa primero apan mahibaloan sa ulahi nga buotan diay. Ang ideyang gihatag mao nga ang mga tawong morag way-pagbati ug makikaugalingon, sa pagkatinuod, mahunahunaon ug mahingawaon diay. Dugang pa, ang ideya nga buot nilang ipadayag nga ang usa ka maayong higala, nga sagad kaatbang nga sekso, mao lang ang gikinahanglan aron mogawas kining maayong mga hiyas. Tinuod, popular kaayo kining klaseha sa mga sugilanon. Apan, sa imong hunahuna unsa ka subsob nga natinuod kining romantikong mga ilusyon diha sa tinuod nga kinabuhi? Ikasubo, ang ubang mga batan-on nalimbongan nianang makadaot nga mga ilusyon ug nakighigala​—naminyo pa gani—sa usa ka hakog, mapintas nga tawo ug dayon nagpaabot sa walay kapuslanan nga ang maong tawo “magbag-o” ug mahimong mahunahunaong indibiduwal.

Tagda ang usa pa ka rason kon nganong ang uban ganahang makigsuod sa kuwestiyonableng mga tawo: Sila nagtuo nga sila dili guwapa ug busa modawat na lang kang bisan kinsa nga morag maibog kanila. Si Nancy, nga gihisgotan sa sinugdanan, nasayod sa giingon sa Bibliya bahin sa pagminyo ‘diha lamang sa Ginoo.’ (1 Corinto 7:39) Ugaling lang, siya nagtuo gayod nga dili siya guwapa busa nalipay siya sa dihang ang iyang kauban sa trabaho nga dili sama niyag tinuohan naibog kaniya. Nagsugod siya sa pagpakigdeyt sa maong lalaki ug diriyot siya nga makahimo ug seksuwal nga imoralidad.

Sumala sa gipakita sa maong mga kasinatian, daghan ang rason kon nganong ang usa ka batan-ong Kristohanon ganahang makigsuod sa mga tawong dili maayo ug impluwensiya​—ug morag daghan usab ang mga rason aron ipakamatarong ang pagpakigsuod kanila. Bisan pa niana, kining mga matanga sa pagpakighigala makapaguol gayod, ug makadaot pa gani. Ngano?

Ang Epekto sa Panaghigalaay

Sa pagkatinuod, ikaw mahisama sa imong mga higala. Niining paagiha, dakog epekto ug impluwensiya kanato ang mga tawong kanunay natong ikauban. Gipakita sa Proverbio 13:20 nga kini nga epekto mahimong makaayo o makadaot: “Siya nga nagalakaw uban sa mga tawong maalamon mahimong maalamon, apan siya nga may pakiglabot sa mga hungog mahisugamak sa kadaot.” Ang suod nga managhigala, nga nahisama sa duha ka tawo nga nagsakay sa usa ra ka sakyanan, mopaingon sa usa ra ka direksiyon ug mosangko sa usa ra ka destinasyon. Busa pangutan-a ang imong kaugalingon: ‘Ang dalan ba nga giagian sa akong higala mopaingon sa destinasyon nga gusto nakong adtoan? Maagak ba ako niini paingon sa akong espirituwal nga mga tumong ug mga tinguha?

Tinuod, malisod ang paghimog matinud-anong pagtimbangtimbang. Mahimong malangkit niini ang kusganong mga pagbati. Apan, ang pagbati ba kasaligang giya sa pagpilig mga higala? Tingali nakadungog ka na niining kanunayng gibalikbalik nga tambag, “Sunda ang imong kasingkasing.” Apan ang Proverbio 28:26 nag-ingon: “Siya nga nagasalig sa iyang kaugalingong kasingkasing maoy hungog.” Ngano? Tungod kay “ang kasingkasing labaw nga malimbongon kay sa bisan unsa pa ug desperado.” (Jeremias 17:9; Numeros 15:39) Ang pagkamalimbongon maoy pagkadili-maunongon o pagkabakakon o pagkamalipoton. Mosalig ka ba sa usa ka tawong ilado nga limbongan ug traydor? Ang atong mahulagwayong kasingkasing malipoton. Busa, ang usa ka relasyon dili segurado nga mahimong maayo tungod lang kay mibati ka nga husto kini.

Ang labing kasaligang giya mao ang Pulong sa Diyos. Dili sama sa imong dili-hingpit nga kasingkasing, ang mga prinsipyo sa Bibliya dili gayod magbudhi kanimo o makapahigawad kanimo. Sa unsang paagi ang mga prinsipyo sa Bibliya makatabang kanimo sa pagtino kon ang usa ka tawo mahimo bang maayong higala kanimo? Ug sa unsang paagi imong malikayan ang sayop nga pagpili ug tawo nga mahimo nimong tibuok-kinabuhi nga higala​—usa ka kapikas sa kaminyoon? Kining mga pangutanaha pagatubagon sa umaabot nga artikulo.

[Footnote]

[Hulagway sa panid 20]

Ang media makaimpluwensiya sa atong ideya sa kon unsay maayong higala