Ang Pagtuo sa Usa ka Pamilya Nasulayan

SI India, usa ka matahom nga nuybe-anyos nga batang babaye nga taga-Wisconsin, T.B.A., nakasinatig daghang sakit. Gani, nakaagi na siya ug tulo ka dagkong operasyon ug di-maihap nga ginagmayng mga operasyon. “Sulod sa unom ka tuig,” matod pa sa iyang inahan nga si Lori, “ang kinabuhi ni India halos gigugol sa pag-adto sa mga lawak pang-emerhensiya, pag-estar sa ospital, ug pagduaw sa doktor.”

Kining tanan nagsugod sa dihang 18 pa ka bulan si India. Nagsugod siya sa pagpakitag talagsaong mga simtomas, nga naglakip sa pagsigeg kalibang, taas nga hilanat, pagdako sa tiyan, ug abnormal nga pag-ubos sa timbang. Sakit usab ang iyang tiyan. Kada gabii sulod sa duha ka tuig, ang gamayng bata nga si India subsob nga makamata ug motiyabaw, modanguyngoy, ug usahay mosiyagit pa gani sa tumang kasakit.

Samtang ang mga doktor naningkamot sa pagtino kon unsay diperensiya, si India padayong nag-antos sa hilabihan. “Ang among anak dili na gayod makakaon,” matod pa ni Lori. “Sulod sa kapin sa usa ka tuig,” midugang si Mark, ang amahan ni India, “among nakita ang among gamayng bata nga mihigos ug wala mi mahibalo kon unsaon pagtabang kaniya. Nahinumdom ko usa ka gabii niana nga mibati ko nga wala gayoy mahimo samtang si Lori ug ako nag-estorya bahin sa paglubong kang India, nga niadtong tungora gituohan namo nga dili kalikayan.”

Sa ngadtongadto, natino nga si India dunay ulcerative colitis​—usa ka sakit nga moatake sa hapin sa dakong tinai. Siya usab adunay primary sclerosing cholangitis, nga makaapektar sa mga agianan sa apdo diha sa atay. Matambalan kining mga sakita. Apan, kinahanglan ang operasyon, ug para sa ulcerative colitis, gikinahanglan ang pagtambal pinaagig medisina. Ang maong mga kahimtang nanginahanglan ug kanunay nga pagbantay ug pag-atiman panahon sa pagpahiuli sa lawas.

Kapin na karon sa pito ka tuig sukad sa unang pagsakit ni India. Tungod sa pag-atiman sa mainampingong mga doktor, siya hapit nang maulian. Ingong mga Saksi ni Jehova, si Mark ug Lori mibati nga ang ilang pagtuo sa Pulong sa Diyos​—ilabina  sa giingon niini bahin sa sakit, kamatayon, ug sa paglaom sa pagkabanhaw sa umaabot​—nakatabang kanila sa paglahutay. Nakatabang usab kini kang India. “Si India kanunayng prangkang maghisgot bahin sa pagkabanhaw nga gihubit diha sa Bibliya,” matod ni Lori. “Tinuod gayod kini alang kaniya.”

Usa ka higayon sa dihang si India diha sa lawak-dulaanan sa ospital, nakahibalag siya ug batang babaye kansang igsoong babaye dunay leukemia. Gisaysay ni Lori kon unsay sunod nga nahitabo: “Ang maong batang babaye miingon kang India nga nahadlok siya nga basig mamatay ang iyang igsoon. Dayon gisultian siya ni India kon unsa ang kamatayon sumala sa Bibliya ug nga siya wala mahadlok nga mamatay. Pagkasunod adlaw ang inahan sa maong batang babaye miduol kanako nga daghag pangutana. Nahingangha siya nga si India makasulti sa prangka ug maisogon nga paagi bahin sa maong mga butang.”

Nakaplagan ni Mark ug Lori nga ang mga pag-ampo sa mga isigkamagtutuo maoy usa ka dakong tabang. “Kaniadto,” matod ni Mark, “sa dihang ingnon nako ang mga tawo nga iapil nako sila sa pag-ampo o sa dihang moampo ako uban kanila, kanunay kong manghinaot nga makahimo pa unta kog dugang alang kanila. Karon akong naamgohan kon unsa ka hinungdanon ang maong mga pag-ampo uban kanila ug alang kanila. Ang pag-ampo mao ang labing hinungdanong butang nga mahimo alang kanamo sa panahon sa among kalisdanan. Pagkamahigugmaong kapunongan sa mga igsoon ang among nabatonan!”

Gibati usab ni Mark nga ang sakit ni India nakatabang kanila sa pagsusi sa ilang mga prioridad. “Ang among panglantaw sa materyal nga mga butang nausab gayod,” matod niya. “Morag wala gayod kiniy bili sa dihang masakit ang imong anak! Ang labing maayong mga butang sa kinabuhi kaniadto​—ug karon​—mao ang among relasyon uban kang Jehova nga Diyos ug sa among mahigugmaong kapunongan sa mga igsoon.”

Si Mark ug Lori maingon man si India ug ang iyang mga igsoon nagpaabot sa panahon nga gitagna sa manalagna nga si Isaias sa dihang “walay pumoluyo nga moingon: ‘Ako masakiton.’”​—Isaias 33:24; Pinadayag 21:4.

[Hulagway sa panid 22]

India Erickson

[Hulagway sa panid 23]

San Diego Children’s Hospital

[Hulagway sa panid 23]

Si India uban sa iyang pamilya