Emerhensiyang Pagtugpa!

SUMALA SA GIASOY NI CÉSAR MUÑOZ

Human matagamtam ang makalingaw nga bakasyon nga nagduaw sa akong pamilya sa siyudad sa Monterrey, Mexico, andam na akong mobalik sa sangang buhatan sa mga Saksi ni Jehova sa Mexico City, diin ako nakapribilehiyo sa pag-alagad. Dominggo kadto, Disyembre 1, 2002. Misakay ako sa Flight 190, ug kini milupad sa alas 7:00 sa gabii.

 HUMAN ang malinawong paglupad nga halos usa ka oras ug tunga, ang ayroplano misugod pagpaubos. Takulahaw lang, kini misakag kalit, ug kaming tanan nakurat sa sobrang kabanha gikan sa ubos. Dayon, ang senyor nga piloto mipahibalo nga ang mga pultahan sa mga ligid nga gamiton sa pagtugpa wala moabli. Kini miungot! Kay nangahadlok pag-ayo, ang ubang mga pasahero nanghilak. Ang uban nag-ampo ug kusog. Nabalaka ako kon unsay sunod nga mahitabo.

Gipahibalo kami sa senyor nga piloto nga siya kinahanglang may himoon aron maabli ang mga pultahan sa mga ligid nga gamiton sa pagtugpa. Busa samtang naglupad kami ibabaw sa Mexico City, iyang gipataas-gipaubos ug gipakilingkiling ang ayroplano sa halos usa ka oras. Mas kuyaw pa kadto kay sa tanang pagsakaysakay nga akong nasinati diha sa mga dapit sa kalingawan. Dili gayod kadto makalingaw! Dayon ang senyor nga piloto mipahibalo: “Gikasubo namo ang pagpahibalo kaninyo nga ang mga pultahan wala gayod maabli. Ang atong himoon na lamang mao ang emerhensiyang pagtugpa bisag walay mga ligid.” Nagtinan-away na lang kami nga mahadlokon, nga naghunahunang mangamatay na kaming tanan.

Gihatag ang mga instruksiyon bahin sa emerhensiyang pagtugpa. Among gihubo ang among mga sapatos, gitangtang ang bisan unsa nga makasamad, ug milingkod sumala sa ilang gisugyot nga posisyon. Naghunahuna ako nga seguradong mahagsa kami diha sa runway! Niadtong tungora, nag-ampo ako kang Jehova nga Diyos ug gibati ko ang hilabihan nga pagkakalmado.​—Filipos 4:​6, 7.

Kanunay na akong makadungog nga kon hapit nang mamatay ang usa ka tawo, mamalik ang iyang mga panumdoman bahin sa mga butang nga iya untang gihimo sa iyang pagkinabuhi. Nasubo ako nga wala ako makig-estorya bahin sa Gingharian sa babaye nga diha sa akong tupad ug misaad nga kon hatagan pa akog laing higayon, pahimuslan na gayod nako kanunay ang tanang kahigayonan sa pagpamatuod. Daklit ko usab nga gipamalandong ang akong pag-alagad kang Jehova.

Sa dihang ang ayroplano misugod sa pagpaubos, akong nakita ang mga trak sa bombero, mga ambulansiya, ug daghang tawo nga naandam na. Dayon nabati namo ang kusog kaayong pag-uyog sa dihang nahidapat na ang tiyan sa ayroplano diha sa runway. Samtang kusog nga midailos ang ayroplano, mituasik ang mga aligato tungod sa pagkabag-id sa metal diha sa semento. Gipasiritan dayon ug daghang tubig ang ayroplano sa mga trak sa bombero nga diha sa masigkakilid sa runway aron kini mabugnawan.

Sa kataposan, human ang makapakitbi-sa-atay nga mga gutlo, ang ayroplano mihunong. Kaming tanan namalakpak sa tumang kalipay ug nahupayan nga ang piloto malamposong nakadumala sa maong emerhensiya. Dayon kami giingnan nga mogawas dayon sa ayroplano. Nagdalidali kami sa pag-adto sa mga gawasanan ug midailos sa habog nga mga dailosanan ngadto sa luwas nga kasagbotan tali sa mga runway.

Sa nagbarog ako sa luwas nga gilay-on ug nagpangurog human ang maong kasinatian, akong gisud-ong ang naguba nga ayroplano nga naghirig ug maayo diha sa runway. Maayo na lang, pipila ra ka pasahero ang nasamdan, ug dili ra kaayo grabe. Diha sa mga ambulansiya sa duol, ang uban giatiman sa mga mananambal tungod sa ilang grabeng kahadlok.

Plano unta nako nga makaabot sa balay sa mga alas 9:00 sa gabii, apan miabot ako nga upat ka oras nga ulahi. Bisan pa sa mga panghitabo, ako mapasalamaton nga nabuhi! Kining maong kasinatian nakapahinuklog kanako. Ako kinahanglang moila sa pagkawalay-kasegurohan sa kinabuhi. Mobati kang walay mahimo sa pagkaamgo nga mahimong mawad-an ka sa imong kinabuhi ug sa tanang butang sulod lamang sa pipila ka gutlo. Sa mga panahong ang usa magduhaduha kon siya mabuhi pa, basin ulahi na kaayo ang pagtul-id sa iyang pagkinabuhi o pagdugang ug maayong mga buhat diha sa iyang talaan uban sa Diyos. Karon akong gipabilhan pag-ayo ang kahigayonan sa paggamit sa akong kinabuhi sa maalamong paagi ug sa paghimo sa matag adlaw nga mahinungdanon diha sa pag-alagad sa akong Diyos, si Jehova.​—Salmo 90:12.