Kon sa Unsang Paagi Gihasi ang mga Biktima

Si Monika bag-o lang natapos sa pagtungha sa dihang siya nagsugod pagtrabaho ingong gibansay nga klerk sa legal nga propesyon. Gidahom ni Monika nga hapsay ra ang iyang pagsugod ug trabaho.

Si Horst maoy usa ka medikal nga doktor nga nag-edad ug 35 anyos. Siya may asawa ug mga anak, ug lagmit kaayong mahimo siyang inila ug makadawat ug dakong suweldo.

Si Monika ug Horst nahimong mga biktima sa pagpanghasi.

ANG mga kaso ni Monika ug Horst nagtudlo kanato ug bililhong leksiyon: Dili daling matag-an kon kinsay hasion diha sa trabahoan. Sa pagkatinuod, si bisan kinsa diha sa bisan unsang trabaho may purohan nga hasion. Nan, sa unsang paagi mapanalipdan nimo ang imong kaugalingon? Ang usa ka paagi mao ang pagkat-on kon unsaon sa pagpakigdait diha sa trabahoan, bisan uban sa lisod ikasinabot nga mga isigkatrabahante.

 Pakigsinabtanay sa mga Isigkatrabahante

Alang sa daghan, ang pagbaton ug trabaho nagkinahanglan ug pakigsinabtanay sa usa ka grupo sa mga isigkatrabahante ug pagtabang sa maong grupo sa paglihok sa hapsay nga paagi ingong usa ka yunit. Kon ang mga magkauban sa trabaho magkasinabot, maayo ang dagan sa trabaho. Kay kon dili, ang trabaho madaot ug magkadako ang risgo nga hasion.

Unsay makabalda sa hapsay nga pag-obra sa usa ka grupo sa mga trabahante? Ang usa ka hinungdan mao ang kanunayng pag-ilis-ilis ug trabahante. Sa maong situwasyon, lisod maporma ang panaghigalaay. Gawas pa, ang bag-ong mga kauban sa trabaho wala masinati sa rutina, nga makapahinay sa pagtrabaho sa tanan. Kon magkadaghan ang trabaho, ang grupo lagmit nga makasinati ug kanunayng kapit-os.

Dugang pa, kon ang usa ka grupo walay klarong mga tumong, dili kaayo sila magkahiusa. Pananglitan, ingon tingali niini ang kahimtang kon ang walay pagsalig nga amo mogugol ug mas daghang panahon sa pagdepensa sa iyang posisyon inay kay sa pagdumala sa trabaho. Basin sulayan gani niya ang paghupot ug gahom pinaagi sa pagpaaway sa mga trabahante. Nga nagpasamot pa sa kahimtang, basin dili klaro ang pagkaorganisar sa grupo nga ang pipila ka trabahante wala makasabot kon asa magsugod ang ilang responsibilidad ug kon asa kini matapos. Pananglitan, ang mga panagbangi motungha sa dihang ang duha ka empleyado parehong maghunahuna nga sila adunay responsibilidad sa pagdugang sa ilang pirma diha sa mga resibo.

Sa maong situwasyon, malisod ang pagpakigsulti ug ang kasilo sagad nga dili mahupay. Ang kasina makadaot sa atmospera sa trabahoan, ug ang mga magkauban sa trabaho mag-indigay sa usag usa aron makuha ang pabor sa amo. Ang ginagmayng mga dili-pagsinabtanay giisip ingong grabeng mga insulto. Sa diwa, ang gagmayng mga problema nahimong dagkong mga problema. Niining maong mga kahimtang, lagmit mahitabo ang pagpanghasi.

Ang Pagpili sa Biktima

Sulod sa usa ka yugto, ang usa ka empleyado pilion tingali nga mahimong biktima sa pagpanghasi. Unsang matanga sa tawo ang lagmit nga trataron niining paagiha? Lagmit sa usa nga nalahi. Pananglitan, mahimong biktima ang bugtong lalaki nga nagtrabaho diha sa trabahoan nga halos puro babaye ang trabahante o ang usa ka babaye nga nagtrabaho diha sa trabahoan nga daghag lalaki. Ang usa ka tawong may pagsalig sa kaugalingon mahimong isipon nga agresibo, samtang ang usa ka tawong hilomon mahimong isipon ingong malimbongon. Ang lagmit nga mabiktima mahimong lahi usab sa diwa nga siya mas tigulang o mas bata kay sa uban o mas kuwalipikado sa maong trabaho.

Bisan kinsa man ang biktima, ang mga kauban sa trabaho “mahimong bastos ug mapangahason ngadto sa ilang napiling biktima ug busa mobati ug kahupayan sa ilang kaugalingong kahigwaos,” nagtaho ang medikal nga magasing mta sa Alemanya. Ang mga paningkamot sa biktima sa pagsulbad sa situwasyon dili kaayo molampos ug makapasamot pa gani sa kahimtang. Samtang ang pagpanghulga mahimong mas subsob ug makanunayon, ang biktima mas mobating sinalikway. Niining tungora, ang biktima sa pagpanghasi lagmit nga dili makasagubang sa situwasyon nga mag-inusara.

Siyempre, ang trabahoan mao gayoy dapit diin lagmit maltratahon ang mga tawo. Apan daghan ang mahinumdom sa panahon sa dihang ang mga magkauban sa trabaho mas andam nga motabang sa usag usa. Ang organisadong pagpanghasi talagsa rang mahitabo. Apan latas sa katuigan sumala sa usa ka doktor, adunay “kaylap nga pagkahanaw sa panaghiusa ug pagkawalay ulaw.” Ang mga tawo karon menos nag pagtagad sa mga prinsipyo bahin sa pagpakigbahin sa dayag nga paggubatay diha sa trabahoan.

Busa, ang tanang empleyado angayng maikag sa mga tubag sa mga pangutana: Masanta ba ang pagpanghasi? Sa unsang paagi makab-ot ang pakigdait diha sa trabahoan?

[Hulagway sa panid 6]

Ang tumong sa pagpanghasi mao ang paghimo sa biktima niini nga sinalikway