Usa sa mga tribo nga nagpuyo sa yuta sa Canaan sa wala pa mag-okupar niini ang mga Israelinhon. (Gen 13:3-7; 34:30; Ex 3:​8, 17) Wala sila hisgoti sa talaan sa 70 ka banay human sa Lunop, nga nagngalan sa “mga banay sa Canaanhon.” (Gen 10:15-18) Ang ilang katigulangan wala mahibaloi.

Ang mga Perizihanon maoy usa sa mga tribo kansang yuta gisaad sa Diyos ngadto sa binhi ni Abraham. (Gen 15:18-21; Neh 9:​7, 8) Sa panahon nga gisakop sa mga Israelinhon ang Yutang Saad, ang mga Perizihanon nagpuyo sa bukirong rehiyon sa Canaan. (Jos 11:3) Sa dihang ang tribo ni Juda mibalhin ngadto sa gipahat niini nga teritoryo, kini nagpildi sa mga Perizihanon ug sa mga Canaanhon didto sa Bezek, nga mopatim-awng anaa sa K sa Jerusalem. (Huk 1:​4, 5; Jos 24:11) Human ang yuta sa Canaan mabahin sa mga Israelinhon, ang pipila ka Perizihanon nagpabilin sa teritoryo sa Epraim ug Manases.​—Jos 17:15-18.

Ang mga Perizihanon maoy usa sa pito ka daghag molupyo ug gamhanang mga nasod nga sublisubling gimando ni Jehova sa Israel nga puohon inigsulod nila sa Yutang Saad. Walay pakigsaad o alyansa sa kaminyoon nga himoon uban kanila, ni hatagan sila ug pabor. (Ex 23:​23, 24; 33:2; 34:11-13; Deu 7:1-3; Jos 3:10) Apan ang mga Israelinhon napakyas sa pagpuo kanila, ug ingon sa gitagna, ang mga Perizihanon nahimong lit-ag sa Israel.​—Deu 7:4; 20:​17, 18; Huk 3:​5, 6.

Sa panahon ni Solomon, ang pipila ka nahibiling mga Perizihanon gipaapil sa pinugos nga trabaho. (1Ha 9:​20, 21; 2Cr 8:​7, 8) Nakaplagan ni Esdras nga ang mga Hudiyo nga mibalik gikan sa pagkadestiyero sa Babilonya nakig-alyansa sa kaminyoon uban kanila. Apan, tungod sa iyang tambag ilang gipapahawa ang ilang langyawng mga asawa. (Esd 9:​1, 2; 10:​11, 12, 44) Ang mga Perizihanon wala na hisgoti sa ulahing kasaysayan sa Bibliya.