Jon 9:1-41
9 Taem hem i stap wokbaot i go, hem i luk wan man we taem hem i bon, hem i blaen.
2 Nao ol disaepol blong hem oli askem se: “Rabae, ?sin blong hu i mekem man ya i blaen taem hem i bon? ?Sin blong hem no sin blong papa mo mama blong hem?”
3 Jisas i ansa se: “I no from sin blong hem mo i no from sin blong papa mo mama blong hem. Be samting ya i kamaot blong ol man oli luk ol wok blong God.
4 Taem i delaet yet, yumi mas mekem ol wok blong Man we i sanem mi mi kam. Taem tudak i kam, man i no moa save wok.
5 Mi mi laet blong wol taem mi stap yet long wol.”
6 Taem hem i talem ol tok ya finis, hem i spet long graon mo i mekem smol sofmad long hem, mo i putum long ae blong man ya.
7 Nao i talem long hem se: “Yu go wasem ae blong yu long wota blong Saeloam” (Mining blong nem ya se “Sanem i Go”). Ale man ya i go wasem ae blong hem, mo taem hem i kambak, hem i save lukluk.
8 Nao ol man raonabaot long hem mo olgeta we fastaem oli luk hem i stap asaskem mane, oli talem se: “?I no man ya we i stap sidaon oltaem mo i stap askem mane long ol man?”
9 Samfala oli talem se: “Hem ya.” Sam narafala oli talem se: “Nogat, be i luk olsem hem.” Be man ya i stap gohed blong talem se: “Mi ya nao.”
10 Nao oli askem long hem se: “?Be ae blong yu i kam gud olsem wanem?
11 Hem i ansa se: “Man ya we nem blong hem Jisas, hem i mekem sofmad, i putum long ae blong mi, mo i talem long mi se: ‘Yu go wasem ae blong yu long Saeloam.’ Ale mi go wasem ae blong mi nao mi save lukluk.”
12 Nao oli askem long hem se: “?Wehem man ya?” Hem i talem se: “Mi no save.”
13 Nao oli tekem man ya we fastaem hem i blaen, i go long ol Farisi.
14 Be dei ya we Jisas i mekem sofmad ya mo i mekem ae blong man ya i kam gud, hem i Sabat dei.
15 Mo ol Farisi tu oli stap askem long hem se ae blong hem i kam gud olsem wanem. Hem i talem long olgeta se: “Hem i putum sofmad long ae blong mi, mo mi go wasem nao mi save lukluk.”
16 Nao sam Farisi oli talem se: “Man ya i no kamaot long God, from we hem i no folem loa blong Sabat dei.” Be sam narafala oli talem se: “Wan man we i stap mekem sin, i no save mekem merikel olsem.” Ale samting ya i mekem olgeta oli seraot.
17 Nao oli talem bakegen long blaenman ya se: “Yu traem talem se hem i wanem kaen man, from we hem i mekem ae blong yu i kam gud bakegen.” Ale man ya i talem se: “Hem i wan profet.”
18 Be ol man Jiu oli no bilif se man ya fastaem hem i blaen, mo naoia hem i save lukluk. Ale oli singaot papa mo mama blong hem i kam.
19 Mo oli askem long tufala se: “?Hemia boe blong yutufala? Hem i talem se taem hem i bon, hem i blaen finis. ?Be naoia olsem wanem hem i save lukluk?”
20 Papa mo mama blong hem i talem se: “Mitufala i save se hem i boe blong mitufala, mo taem hem i bon, hem i blaen.
21 Be mitufala i no save wanem i mekem we naoia hem i save luk ol samting, mo mitufala i no save hu i mekem ae blong hem i kam gud. Yufala i askem long hem. Hem i bigman finis. Hem nomo i mas talemaot long yufala.”
22 Papa mo mama blong hem, tufala i tok olsem from we tufala i fraet long ol man Jiu.* Olgeta ya oli agri finis se sipos wan man i talemaot se Jisas i Kraes, bambae oli sakemaot hem long sinagog.
23 Hemia nao from wanem papa mo mama blong hem i talem se: “Hem i bigman finis. Yufala i askem long hem.”
24 Nao oli singaot man ya i kam namba tu taem, mo oli talem long hem se: “Yu mas leftemap nem blong God. Mifala i save se man ya i man blong mekem sin.”
25 Nao hem i ansa se: “Mi mi no save sipos man ya i man blong mekem sin, no nogat. Be mi save wan samting nomo. Fastaem mi mi blaen, be naoia mi lukluk.”
26 Nao oli askem long hem se: “?Hem i mekem wanem long yu? ?Mo olsem wanem hem i mekem ae blong yu i kam gud?”
27 Nao hem i ansa se: “Mi mi talem long yufala finis, be yufala i no lesin. ?From wanem yufala i wantem harem stori ya bakegen? ?Yufala tu i wantem kam disaepol blong hem?”
28 Nao oli tok nogud long hem, oli se: “Yu nao yu disaepol blong man ya, be mifala i disaepol blong Moses.
29 Mifala i save se God i toktok long Moses, be man ya, mifala i no save se hem i kamaot wea.”
30 Be man ya i talem se: “!Man! Hemia wan samting ya we man ya i mekem ae blong mi i kam gud, be yufala i no save weples hem i kamaot long hem.
31 Yumi save se God i no lesin long ol man we oli stap mekem sin. Be sipos wan man i fraet gud long God mo i mekem samting we hem i wantem, bambae God i lesin long hem.
32 Stat bifo i kam, yumi neva harem se wan man i mekem ae blong man we i blaen taem i bon, i kam gud olsem.
33 Sipos man ya i no kamaot long God, bambae hem i no save mekem wan samting nating.”
34 Nao oli talem long hem se: “!Man, yu ya, sin i fulap long yu finis taem yu bon! ?Afta yu wantem tijim mifala?” !Nao oli sakem hem i go afsaed!
35 Jisas i harem we oli sakemaot man ya, nao taem hem i faenem hem, hem i askem long hem se: “?Yu yu bilif long Pikinini blong man?”*
36 Man ya i ansa se: “?Masta, man ya hem i hu? Yu talem, olsem bae mi save bilif long hem.”
37 Ale Jisas i talem long hem se: “Yu yu luk hem finis. Mo hem nao i stap toktok wetem yu naoia.”
38 Nao man ya i talem se: “Masta, mi mi bilif long hem.” Nao hem i bodaon* long hem.
39 Nao Jisas i talem se: “Mi mi kam long wol ya blong God i save jajem ol man, nao olgeta we oli no save lukluk, oli save lukluk, mo olgeta we oli save lukluk oli kam blaen.”
40 Sam Farisi we oli stap long ples ya, oli harem ol tok ya, nao oli askem se: “?Olsem wanem? ?Mifala tu i blaen?”
41 Jisas i talem long olgeta se: “Sipos yufala i blaen, bambae yufala i no gat sin. Be yufala i talem se: ‘Mifala i lukluk.’ Taswe sin blong yufala i stap nomo.”
