Jon 5:1-47
5 Afta long samting ya, i gat wan lafet blong ol man Jiu, nao Jisas i go long Jerusalem.
2 Nao long Jerusalem, klosap long Get blong Sipsip, i gat wan pul blong wota we long lanwis Hibru, oli singaot se Betsata. I gat ples blong wokbaot raon long pul ya, mo plante pos oli stanap raon long hem.
3 Mo plante plante sikman wetem olgeta we oli blaen, mo olgeta we leg blong olgeta i nogud, mo olgeta we oli handikap, oli stap slip long ples ya.
4 *—
5 Mo i gat wan man we i stap long ples ya we hem i sik toti eit yia finis.
6 Jisas i luk man ya i stap ledaon, mo hem i save we hem i sik longtaem finis, nao hem i askem long hem se: “?Yu yu wantem kam gud bakegen?”
7 Man ya i ansa se: “Masta, i no gat man blong karem mi mi godaon long wota ya taem i muvmuv. Taem mi stap traem blong godaon yet, ol narafala oli kam bitim mi oli go fastaem.”
8 Nao Jisas i talem long hem se: “!Yu stanap! Yu karem mat* blong yu mo yu wokbaot.”
9 Wantaem nomo, man ya i kam gud bakegen, mo hem i karem mat* blong hem, mo i wokbaot.
Samting ya i hapen long Sabat dei.
10 Nao ol man Jiu oli stap talem long man ya se: “Hemia Sabat dei ya, mo folem Loa, i no stret blong yu karem mat* blong yu.”
11 Be hem i talem se: “Man ya we i mekem mi mi kam gud, hem i talem long mi se: ‘Yu karem mat* blong yu, mo yu wokbaot.’”
12 Nao oli askem long hem se: “?Hu man ya we i talem long yu se: ‘Yu karem mat mo yu wokbaot’?”
13 Be man ya i no save se hu ya i mekem hem i kam gud bakegen, from we i gat plante plante man i stap long ples ya, mo Jisas i lus long medel blong olgeta.
14 Be biaen, Jisas i faenem man ya long haos tempol, mo i talem long hem se: “Yu luk, yu yu kam gud bakegen finis. Yu no mas mekem sin bakegen, sipos no narafala trabol bambae i kam kasem yu we i nogud moa.”
15 Nao man ya i go talem long ol man Jiu se Jisas nao i mekem hem i kam gud bakegen.
16 Jisas i stap mekem ol samting ya long Sabat dei, taswe ol man Jiu oli stap mekem i nogud long hem.
17 Be hem i talem long olgeta se: “Papa blong mi i stap wok yet kam kasem naoia, mo mi tu mi stap wok.”
18 Tok ya i mekem tingting blong ol man Jiu i strong moa blong kilim hem i ded, from we naoia, hem i no brekem loa blong Sabat nomo, be hem i talem tu se God i stret Papa blong hem, hem i mekem hem i sem mak nomo wetem God.
19 Nao Jisas i talem long olgeta se: “Tru mi talem long yufala, Pikinini i no save mekem wan samting long tingting blong hem nomo, be hem i mekem ol samting we hem i luk Papa blong hem i stap mekem. Samting we Papa i mekem, Pikinini tu i mekem sem mak.
20 Papa i laekem Pikinini tumas, mo hem i soemaot olgeta samting long hem we hem i stap mekem. Mo bambae hem i soemaot long hem ol wok we oli bigwan moa long hemia, blong yufala i save sapraes long olgeta.
21 Olsem we Papa i mekem ol dedman oli girap, oli laef bakegen, ale long sem fasin, Pikinini i save mekem eni man we hem i wantem, i laef bakegen.
22 Papa i no jajem man, be hem i putum wok ya blong jajem man long Pikinini,
23 blong olgeta man oli save ona long Pikinini, long sem fasin we oli ona long Papa. Man we i no ona long Pikinini, hem i no ona long Papa we i sanem hem i kam.
24 Tru mi talem long yufala, man we i harem tok blong mi, mo i bilif long Man we i sanem mi mi kam, hem i gat laef we i no save finis. Mo hem i no kasem jajmen, be hem i aot finis long ded, i kam long laef.
25 “Tru mi talem long yufala, i gat taem i stap kam, yes hem i naoia, we ol dedman bambae oli harem voes blong Pikinini blong God, mo olgeta we oli bin obei bambae oli laef.
26 Papa hem i gat paoa blong givim laef.* Mo long sem fasin, hem i givim paoa long Pikinini tu blong hem i save givim laef.
27 Mo hem i givim raet long hem blong i jajem ol man, from we hem i Pikinini blong man.*
28 Yufala i no mas sapraes long samting ya, i gat taem i stap kam we olgeta man we oli stap long beregraon* bambae oli harem voes blong hem,
29 nao oli kamaot. Olgeta we oli mekem ol gudfala samting, oli girap blong kasem laef, be olgeta we oli mekem ol rabis samting, oli girap blong kasem jajmen.
30 Mi mi no save mekem wan samting long tingting blong mi nomo. Mi mi jajem man folem samting we Papa i talem. Mi mi jajem man long stret fasin, from we mi mi no mekem samting we mi nomo mi wantem, be mi mekem samting we Papa we i sanem mi mi kam, hem i wantem.
31 “Sipos mi wan nomo mi witnes blong mi, tok blong mi i no tru.
32 Be i gat wan narafala man we i witnes blong mi, mo mi save se tok we hem i talem blong tokbaot mi, hem i tru.
33 Yufala i sanem sam man oli go luk Jon, mo hem i talemaot trutok.
34 Be mi mi no nidim man blong i witnes long saed blong mi, be mi mi talem ol samting ya blong yufala i save stap laef.
35 Man ya i olsem wan laet we i laet gud mo i saen. Mo blong smoltaem, yufala i wantem glad long laet blong hem.
36 Be mi mi gat wan narafala witnes we tok blong hem i strong moa long tok blong Jon. Witnes ya, hemia ol wok we Papa blong mi i givim long mi blong mi mekem. Ol wok ya we mi stap mekem, oli witnes se Papa blong mi i sanem mi mi kam.
37 Mo Papa we i sanem mi mi kam, hem tu i talemaot mi. Be neva yufala i harem voes blong hem mo neva yufala i luk fes blong hem,
38 mo yufala i no bilif long mi we hem i sanem mi mi kam, taswe tok blong hem i no stap long hat blong yufala.
39 “Yufala i stap lukluk gud long ol tok blong Baebol, from we yufala i ting se bambae oli save mekem yufala i kasem laef we i no save finis. Be ol tok ya nao oli stap talemaot mi.
40 Yufala i no wantem kam long mi blong yufala i kasem laef.
41 Mi mi no wantem we ol man oli leftemap mi,
42 be yufala i defren. Mi mi save gud we yufala i no lavem God.
43 Mi mi kam long nem blong Papa blong mi, be yufala i no glad long mi. Be sipos wan narafala man i kam long nem blong hem nomo, bambae yufala i glad long hem.
44 Yufala i stap leftemap ol narafala man, mo yufala i wantem we olgeta oli leftemap yufala. Be yufala i no traem blong mekem wan samting we bambae God ya we hem nomo i God, i leftemap yufala from. ?Nao olsem wanem yufala i save bilif?
45 Yufala i no mas ting se mi bambae mi talemaot ol rong blong yufala long Papa. I gat wan i stap we hem i talem se yufala i rong. Hemia Moses we yufala i stap putum tingting blong yufala i strong long hem.
46 Sipos yufala i bilif long Moses, bambae yufala i bilif long mi from we ol tok we hem i raetem, oli tokbaot mi.
47 Be sipos yufala i no bilif long ol tok we hem i raetem, ?bambae yufala i bilif long ol tok blong mi olsem wanem?”
Ol futnot
^ Vas ya i no stap long sam olfala hanraet, mo i klia se hem i no kamaot long God.
^ NT: “bed.”
^ NT: “bed.”
^ NT: “bed.”
^ NT: “bed.”
^ NT: “hem i gat presen blong laef insaed long hem.”
^ Yu luk Diksonari.
^ NT: “beregraon blong ol man we God i tingbaot olgeta.”
