Isaias 54:1-17
54 “Kumurahaw kang may kaugmahan, ika na babaying baog na dai nag-aki!+
Maggaya-gaya ka asin kumurahaw sa kaugmahan,+ ika na dai nakamati nin kulog nin pangangaki,+Huli ta an mga aking lalaki* kan saro na binayaan mas dakul paKisa sa mga aking lalaki kan babaying may agom,”*+ an sabi ni Jehova.
2 “Pahiwasa an tolda mo.+
Padakulaa an mga telang pantolda kan saimong mamuraway na tabernakulo.
Sige sana, palabaa an mga pisi mong pantolda,Asin pasariga an mga taldok mong pantolda.+
3 Huli ta magigin mahiwas an saimong mga sagkudan patuo asin pawala.
Magigin sadiri kan saimong mga gikan an mga nasyon,Asin iistaran ninda an mga tiwangwang na siyudad.+
4 Dai ka matakot,+ huling dai ka mapapasupog;+Asin dai ka masupog, huling dai ka masusudya.
Huling malilingawan mo an saimong kasusupgan kan ika hoben pa,Asin an kawaran nin onra huli kan saimong pagigin babaying balo dai mo na magigirumduman pa.”
5 “Huli ta an saimong Pinakanangungurog na Kaggibo+ iyo an garo agom* mo,+Jehova na pamayo nin mga hukbo an saiyang pangaran,Asin an Banal na Diyos kan Israel iyo an saimong Paratubos.+
Aapudon siyang Diyos kan bilog na daga.+
6 Huling inapod ka ni Jehova na garo baga saro kang binayaan na agom na babayi asin nagmumundo nin grabe,*+Siring sa sarong agom na babaying pinakasalan kan siya hoben pa asin isinikwal pagkatapos,” an sabi kan saimong Diyos.
7 “Sa kadikit na panahon binayaan taka,Pero sa dakulang pagkahirak titipunon taka giraray.+
8 Sa baha nin kaanggutan itinago ko sa saimo an sakong lalawgon nin kadikit na panahon,+Pero sa daing katapusan na maimbod na pagkamuot mahihirak ako sa saimo,”+ an sabi kan saimong Paratubos,+ si Jehova.
9 “Para sa sakuya, kapareho ini kan mga aldaw ni Noe.+
Kun paanong isinumpa kong an katubigan ni Noe dai na sa giraray malantop sa daga,+Isinusumpa ko man na dai na ako maaanggot sa saimo asin dai taka na sasawayon.+
10 Huli ta an mga bukid puwedeng mahaliAsin an mga bulod puwedeng matanyog,Pero an sakong maimbod na pagkamuot dai hahalion sa saimo,+Asin an sakong tipan nin katuninungan dai matatanyog,”+ an sabi ni Jehova, an Saro na may pagkahirak sa saimo.+
11 “O babaying nagsasakit,+ sinasalpok nin bagyo, mayong nagraranga,+Inaasintada ko an saimong mga gapo gamit an matagas na pansementoAsin ilinalatag ko an saimong pundasyon na gibo sa mga sapiro.+
12 Gigibuhon kong gibo sa mga rubi an mga tore kan saimong pader,Gibo sa nagkikilyab-kilyab* na mga gapo an saimong mga trangkahan,Asin gibo sa mamahalon na mga gapo an gabos mong sagkudan.
13 Asin an gabos mong aking lalaki* tutukduan ni Jehova,+Asin an katuninungan kan saimong mga aking lalaki* magigin abunda.+
14 Marigon kang maeestablisar sa katanusan.+Mararayo ka sa pang-aapi,+Mayo kang kakatakutan asin mayong dahilan na matakot ka nin grabe,Huling dai iyan marani sa saimo.+
15 Kun may siisay man na umatake sa saimo,Bako ako an nagbuot kaiyan.
An siisay man na minasalakay sa saimo matutumba nin huli sa saimo.”+
16 “Uya! Ako mismo an naglalang sa panday,Na naghahayop kan kalayo sa baga,Asin an saiyang pagpanday nakakahaman nin sarong armas.
Ako man mismo an naglalang kan tawong mapanglaglag tanganing manglaglag.+
17 Mayong armas na ginibo laban sa saimo an magigin mapanggana,+Asin kokondenaron mo an arin man na dila na mataram laban sa saimo sa panahon nin paghusgar.
Ini an pamana sa* mga lingkod ni Jehova,Asin an katanusan ninda hali sa sakuya,” an sabi ni Jehova.+
