Mga Pakiana Tikang ha mga Magbarasa

Mga Pakiana Tikang ha mga Magbarasa

Mga Pakiana Tikang ha mga Magbarasa

Tungod kay hi Hadi Salomon han kadaan nga Israel nagin diri matinumanon ha Dios han lagas na hiya, makakasiring ba kita nga diri hiya babanhawon?—1 Hadi 11:3-9.

Bisan kon gin-uunabi han Biblia an ngaran han pipira nga magtinumanon nga kalalakin-an ngan kababayin-an nga waray ruhaduha babanhawon, diri ito espisipiko nga nagkukomento mahitungod han dadangatan may kalabotan ha pagkabanhaw han tagsa nga indibiduwal nga ginngangaranan hito. (Hebreo 11:1-40) Kondi, may kalabotan kan Salomon, may makukuha kita nga ideya mahitungod han paghukom han Dios kon itatanding naton an nahitabo ha iya han namatay hiya ngan an nahitabo ha pipira nga mga matinumanon han namatay hira.

An Kasuratan naghihisgot hin duha la nga posibilidad para ha mga patay—an temporaryo nga diri pag-eksister ngan an waray kataposan nga kamatayon. Adton ginhukman nga diri takos han pagkabanhaw iglalabog ha “Gehenna,” o “linaw nga kalayo.” (Mateo 5:22NW; Markos 9:47, 48NW; Pahayag 20:14) Upod hini an siyahan nga tawhanon nga mag-asawa, hira Adan ngan Eva, an traydor nga hi Judas Iskariote, ngan adton nagkamatay han nagpadapat an Dios hin paghukom ha ira, sugad han katawohan ha panahon ni Noe ngan han mga umurukoy han Sodoma ngan Gomorra. a Ha kamatayon, adton bibendisyonan hin pagkabanhaw nahingangadto ha komon nga lubnganan han katawohan—an Sheol, o Hades. Mahitungod han ira tidaraon, an Biblia nasiring: “Ihinatag han dagat an mga minatay nga nakada hito; ngan ihinatag han kamatayon ngan Hades an mga minatay nga nakada ha ira: ngan ginhukman an tagsa-tagsa ha ira sumala ha ira mga buhat.”—Pahayag 20:13.

An matinumanon nga mga tawo nga ginhihisgotan ha Hebreo kapitulo 11, aadto ha Sheol, o Hades, naghuhulat han pagkabanhaw. Upod hini amo an maunungon nga mga surugoon han Dios nga hira Abraham, Moises, ngan David. Yana tagda kon ano an ginsiring han Biblia mahitungod ha ira may kalabotan ha ira kamatay. Hi Jehova nagsiring kan Abraham: “Ikaw mapakadto ha imo mga ginikanan ha kamurayawan; ikaw iglulubong ha maopay nga katigurang.” (Genesis 15:15) Hi Jehova nagsiring kan Moises: “Kitaa, makaturog ka upod han imo mga amay.” (Deuteronomio 31:16) May kalabotan ha amay ni Salomon nga hi David, an Biblia nasiring: “Hi David kinmaturog kaupod han iya mga amay, ngan iginlubong didto ha bungto ni David.” (1 Hadi 2:10) Salit, an mga pulong nga ‘pagkaturog kaupod han iya mga amay’ usa pa nga paagi han pagsiring nga an tawo nahingadto ha Sheol.

Ano an nahitabo kan Salomon han hiya namatay? An Biblia binaton: “An panahon nga kan Salomon iginhadi ha bug-os nga Israel dida ha Jerusalem kap-atan ka tuig. Ngan hi Salomon kinmaturog kaupod han iya mga amay, ngan iginlubong didto ha bungto ni David nga iya amay.” (1 Hadi 11:42, 43) Salit, baga hin makatadunganon an pagsiring nga hi Salomon aadto ha Sheol, o Hades, nga tikang didto hiya babanhawon.

Ini nga konklusyon nagpapasabot nga an posibilidad nga mabanhaw abrido ha iba nga mahitungod ha ira an Kasuratan espisipiko nga nasiring, ‘hira kinmaturog kaupod han ira mga amay.’ Ha pagkamatuod, damu han mga hadi nga sumunod kan Salomon an gin-uunabi ha sugad nga paagi, bisan kon diri hira matinumanon. Makatadunganon ini, tungod kay “may pagkabanhaw han mga minatay han mga magtadong ngan diri man magtadong.” (Buhat 24:15) Siyempre, dida la naton masisiguro kon hin-o an ginbendisyonan hin pagkabahaw kon banhawon na an “aadto ha mga lubnganan.” (Juan 5:28, 29) Salit, imbes nga maghatag hin sigurado nga baton mahitungod han pagkabanhaw han bisan hin-o nga partikular nga inbididuwal ha naglabay, naghuhulat kita ngan nasarig han hingpit nga desisyon ni Jehova.

[Footnote]

a Kitaa an pahina 30-1 han Hunyo 1, 1988 nga gowa han The Watchtower.