PRINSIPYO HA BIBLIA: “Isul-ot niyo an gugma, kay ini an hingpit nga bugkos han pagkaurosa.”—Colosas 3:14.

MGA KAPULSANAN: An gugma nga agsob unabihon ha Biblia diri an romantiko nga gugma. Lugod, gugma ito nga basado ha prinsipyo ngan makikita dida hito an mga kalidad sugad han kalooy, pagpasaylo, pagpaubos, pagkamaunungon, pagkabuotan, pagkamalumo, ngan pagkapasensyoso. (Mika 6:8; Colosas 3:12, 13) Diri pariho ha romantiko nga pagkaruyag nga kasagaran napapas, an gugma padayon nga nagtitikahilarom.

Hi Brenda nga haros 30 ka tuig na nga inasaw-an, nagsiring: “Mas hilarom gud an gugma han maiha na nga mag-asawa kon itanding ha gugma han bag-o nga kasal.”

Hi Sam nga sobra 12 ka tuig na nga inasaw-an, nagsiring: “Kami nga mag-asawa pirme nalilipay—napapausa pa ngani—kon mationan-o kaepektibo ngan kasimple an mga sagdon ha Biblia! Kon susundon mo ito, magigin okey an ngatanan. Kondi bisan kon karuyag ko nga pirme ito sundon, may mga panahon nga diri ko ito nahihimo. Nahitatabo ito kon sobra ako ka sensitibo, kon an akon la kalugaringon an akon ginhuhunahuna, o kon kapoy ako. Hito nga mga panahon, nag-aampo ako kan Jehova nga buligan ako nga mawara inin negatibo nga mga pagbati. Katapos, ginhahangkopan ko an akon asawa, ngan nagigin okey na an ngatanan!”

Hi Jesu-Kristo nagsiring nga “an kinaadman napapamatud-an nga matadong pinaagi han mga buhat hito.” (Mateo 11:19) Oo, mababasa ha Biblia an pangirilal-an han tinuod nga kinaadman. Epektibo an mga katutdoan ngan mga prinsipyo hito. Diri ito nadadaan. Aplikado ito ha ngatanan nga kultura ngan nasyonalidad. Ngan makikita dida hito an hilarom nga pagsabot ha mga butang nga natural ha tawo tungod kay an gintitikangan hito amo an aton Maglalarang, hi Jehova nga Dios. Syempre, mapapamatud-an la nga epektibo ito kon iaaplikar ito. Salit gin-aaghat kita han Biblia nga ‘tilawan ngan kitaon nga hi Jehova maopay.’ (Salmo 34:8) Bubuhaton mo ba ito?