AN Biblia nakompleto han siyahan nga siglo C.E. An Trinidad nagin opisyal nga katutdoan han 325 C.E.—sobra duha ka siglo katapos makompleto an Biblia—ha usa nga konsilyo ha syudad han Nicaea ha Asia Minor, nga Iznik, Turkey na yana. Sumala ha New Catholic Encyclopedia, an doktrina nga nagtikang ha Konsilyo han Nicaea amo an siyahan nga opisyal nga esplikasyon ha katutdoan han Kristiano, upod na an esplikasyon mahitungod han Dios ngan han Kristo. Pero kay ano nga sadang pa tagan hin esplikasyon an mahitungod ha Dios ngan ha Kristo nga maiha na man nga kompleto an Biblia? Diri ba klaro an ginsisiring han Biblia mahitungod hini?

DIOS BA HI JESUS?

Han nagin magmarando hi Constantino ha bug-os nga Imperyo han Roma, an nag-aangkon nga mga Kristiano diri nagkakauruyon mahitungod ha relasyon han Dios ngan han Kristo. Dios ba hi Jesus? O ginlarang hiya han Dios? Basi masulbad ini, iginpatawag ni Constantino ha Nicaea an mga lider han Singbahan, diri basi hibaroan an kamatuoran, kondi basi diri magkabahin-bahin an iya imperyo may kalabotan ha relihiyon.

Ginhangyo ni Constantino an mga obispo, nga bangin ginatos an kadamu, nga magkaurosa, kondi napakyas hiya. Salit nagsuhestyon hiya ha konsilyo nga karawaton an diri matin-aw nga ideya nga hi Jesus “kapariho ha kahimtang” (homoousios) han Amay. Ini nga termino, nga tikang ha Griego nga pilosopiya ngan diri mababasa ha Biblia, an nagin basihan han doktrina han Trinidad nga ha urhi igin-api ha mga doktrina han Singbahan. Ha pagkamatuod, ha ikatarapos la han ika-upat ka siglo nabug-os an doktrina han Trinidad, upod na hito an ikatulo nga bahin han uusa nga Dios, an espiritu santo.

KAY ANO NGA KINAHANGLAN MO ITO HIBAROAN?

Hi Jesus nagsiring nga “an totoo nga mga magsiringba magsisingba ha Amay uyon ha . . . kamatuoran.” (Juan 4:23) Ito nga kamatuoran nakarekord ha Biblia. (Juan 17:17) Nagtututdo ba an Biblia nga an Amay, Anak, ngan espiritu santo amo an tulo nga persona ha uusa nga Dios?

 Siyahan, an Biblia waray mag-unabi han pulong nga “Trinidad.” Ikaduha, hi Jesus waray mag-angkon nga katupong niya an Dios. Lugod, ginsingba niya an Dios. (Lucas 22:41-44) Ikatulo, an relasyon ni Jesus ha iya mga sumurunod. Bisan han ginbanhaw hiya ngan sumaka ha langit, gintawag niya an iya mga sumurunod nga “akon kabugtoan.” (Mateo 28:10) Kabugtoan ba hira han Dios nga Makagarahum-ha-ngatanan? Syempre diri! Kondi pinaagi han ira pagtoo ha Kristo—suhag nga anak han Dios—hira liwat nagin anak han uusa nga Amay. (Galacia 3:26) Itanding an pipira nga teksto ha ginsisiring han kredo nga ginhimo han Konsilyo han Nicaea.

An ginsisiring han Kredo han Niseno:

“Natoo kami . . . ha uusa nga Ginoo hi Jesu-Kristo . . . nga pariho ha kahimtang han Amay, Dios han Dios, Kahayag han Kahayag, an Dios mismo han Dios mismo.”

An ginsisiring han Biblia:

• “An Amay durodaku ha akon [Jesus].”—Juan 14:28. a

• “Ako [Jesus] masaka ngadto ha akon Amay, ngan ha iyo Amay, ngan ha akon Dios, ngan ha iyo Dios.”—Juan 20:17.

• “Ha aton uusa la an Dios, nga Amay.”—1 Korinto 8:6.

• “Pagdayawon an Dios ngan Amay han aton Ginoo Jesu-Kristo.”—1 Pedro 1:3.

• “An Amen [Jesus], . . . an tinikangan han mga binuhat han Dios, nagsisiring hini nga mga butang.”—Pahayag 3:14. b