AN PROBLEMA

Kon nasisina an imo dos anyos nga anak, hiya nagsusurosinggit, nagbuburobundak, ngan nagkikisikisi. Bangin makagpakiana ka: ‘Normal ba an akon anak? May-ada ba ako nahimo nga sayop salit ginbubusyo hiya? Mawawara ba ini nga iya pagbinusyo?’

May-ada ka pa mahihimo ha pagbag-o han batasan han imo dos anyos nga anak. Kondi, aton anay tagdon kon ano an hinungdan hini.

AN HINUNGDAN

An gutiay nga bata diri pa maaram magkontrol han iya emosyon. Salit usahay, ginbubusyo hiya. Kondi diri la ito an hinungdan.

Hunahunaa an mga pagbag-o nga nahitabo han mag-dos anyos na an bata. Tikang ha takna han iya katawo, iginhahatag han iya mga kag-anak an ngatanan nga iya ginkikinahanglan. Pananglitan, kon magtangis hiya, nalilisang hira basi panginanoon hiya. ‘Masakit ba an bata? Nagugutom ba? Nanginginahanglan hin atensyon? Kinahanglan liwanan hin lampin?’ Ginbubuhat han mga kag-anak an ngatanan para ha iya. Ngan husto gud ito tungod kay bug-os nga nakadepende hiya ha ira.

Kondi han mag-dos anyos na an bata, nakikita niya nga diri na nalilisang an iya mga kag-anak ha pag-ataman ha iya. Ngani, imbes nga hira an masunod han iya karuyag, hiya na an ginpapasunod han ira karuyag. Salit an bata baga hin naprotesta—bangin pinaagi ha pagbusyo.

Kondi paglabay han panahon, nakakarawat na han bata nga an iya mga kag-anak an iya magturutdo, diri paraataman la. Ngan bangin masabtan la niya nga kinahanglan niya ‘magin masinugtanon ha [iya] mga kag-anak.’ (Colosas 3:20) Pero ha pagkayana, mahimo sarihan han bata an pasensya han iya mga kag-anak pinaagi ha pirme pagbinusyo.

 AN IMO MAHIMO BUHATON

Magin masinabuton. An imo anak waray pa buot. Tungod kay diri pa nakakakontrol han iya emosyon, bangin sobra hiya magreak kon nasisina. Sabota an iya sitwasyon.—Prinsipyo ha Biblia: 1 Corinto 13:11.

Magpabilin nga kalmado. Kon ginbubusyo an imo anak, diri maopay nga masina ka. Tubtob nga posible, balewaraya an iya pagbinusyo ngan ayaw pagpadára. An paghinumdom kon kay ano nga ginbubusyo hiya mabulig ha imo nga magpabilin nga kalmado.—Prinsipyo ha Biblia: Proberbios 19:11.

Ayaw pagpadára. Kon magpadára ka ha karuyag han imo anak, bangin busyuhon na liwat hiya kon may-ada na liwat hiya iba nga karuyag. Magin kalmado ngan ipakita ha imo anak nga titindogan mo an imo ginyakan.—Prinsipyo ha Biblia: Mateo 5:37.

Magin mapailubon. Ayaw hunahunaa nga mawawara la dayon an pagbinusyo han imo anak, labi na kon nakikita niya nga napadára ka han iya pagbinusyo. Kondi kon diri ka napadára ngan gintitindogan mo an imo ginyakan, posible nga magtikawara la an iya pagbinusyo. Ngan ha urhi, diri na hiya magbubusyo. An Biblia nasiring: “An gugma nagpapasensya.”—1 Corinto 13:4.

Sarihi liwat an masunod:

• Kon busyuhon an imo anak, kugosa hiya (kon posible) ngan pugngi ha pagkisikisi nga diri nasasakitan. Ayaw hiya pagguliati. Pasagdi la hiya tubtob nga kumalma. Ha urhi, maaabat niya nga waray epekto an iya pagbinusyo.

• Pagpili hin lugar ha iyo balay diin mahimo mo ibutang an imo anak kon magbusyo hiya. Sumati hiya nga makakagowa la hiya kon kalmado na hiya, katapos bayai hiya didto.

• Kon busyuhon an imo anak nga may damu nga tawo, dad-a hiya ha dapit nga waray iba nga tawo. Ayaw pagpadára ha iya tungod la kay nag-ieskandalo hiya. Kay kon magpadára ka, huhunahunaon niya nga makukuha niya an iya karuyag kon magbusyo hiya.