Hira Moises ngan Aaron kumadto ha Paraon basi isumat an mensahe han Dios: ‘Kon diri mo palakton an akon katawohan, magpapadara ako hin nangangagat nga mga langaw ha Ehipto.’ Damu hinduro nga langaw an sinulod ha balay han mga Ehiptohanon, riko man o pobre. An bug-os nga tuna napuno hin langaw. Pero waray langaw ha Gosen, diin naukoy an mga Israelita. Tikang hinin ikaupat nga peste, an mga Ehiptohanon la an naapektohan. An Paraon naghangyo: ‘Pakimalooy kan Jehova nga paiwason ini nga mga langaw. Mahimo na lumakat an imo katawohan.’ Pero han ginpaiwas ni Jehova an mga langaw, nagbag-o an hunahuna han Paraon. Mahibabaro pa gud ba hin leksyon an Paraon?

Hi Jehova nagsiring: ‘Kon diri palakton han Paraon an akon katawohan, magkakasakit ngan magkakamatay an mga hayop han mga Ehiptohanon.’ Kinabuwasan, nagtikang magkamatay an mga hayop. Pero waray magkamatay an mga hayop han mga Israelita. Bisan pa hito, waray la gihap mamati an Paraon.

Katapos ginsugo ni Jehova hi Moises nga bumalik ha Paraon ngan magsabrag hin agbon tipaigbaw. An agbon nagin tapotapo ngan iginpalid ngadto ha ngatanan nga Ehiptohanon. Tungod hito, nagkaada hira maul-ol nga mga hubag pati an ira mga hayop. Bisan pa hito, waray la gihap palakta han Paraon an mga Israelita.

Ginpabalik ni Jehova hi Moises ngadto ha Paraon basi isumat an Iya mensahe: ‘Diri mo la ba gihapon palalakton an akon katawohan?  Buwas, mauran hin yelo ha tuna.’ Kinabuwasan, nagpauran hi Jehova hin yelo, nga may upod nga dalugdog ngan kalayo. Ito an pinakamakusog nga bagyo ha Ehipto. Ngatanan nga kahoy ngan mga tanom nadaot, pero waray maapektohi an Gosen. An Paraon nagsiring: ‘Pakimalooy kan Jehova nga paundangon ini! Tapos puydi na kamo lumakat.’ Pero pag-undang han bagyo, nagbag-o an hunahuna han Paraon.

Katapos hi Moises nagsiring: ‘Kakaunon yana han mga duron an bisan ano nga tanom nga waray madaot han bagyo.’ Ginkaon han minilyon nga duron an ngatanan nga nahibilin ha kaumhan ngan ha mga kahoy. An Paraon nanginyupo: ‘Pakimalooy kan Jehova nga paiwason ini nga mga duron.’ Pero bisan han ginpaiwas na ito ni Jehova, waray la gihap mamati an Paraon.

Hi Jehova nagsugo kan Moises: ‘Unata an imo kamot tipakadto ha langit.’ Nagsirom dayon an kalangitan. Ha sulod hin tulo ka adlaw, an mga Ehiptohanon waray nakikita nga bisan ano o bisan hin-o. Pero mahayag ha lugar han mga Israelita.

An Paraon nagsiring kan Moises: ‘Ikaw ngan an imo katawohan mahimo na lumakat. Ibilin la niyo an iyo mga hayop.’ Hi Moises nagsiring: ‘Kinahanglan namon dad-on an amon mga hayop basi ihalad ito ha amon Dios.’ Nasina gud an Paraon. Hiya nagsinggit: ‘Iwas! Kon makita ko ikaw utro, papatayon ko ikaw.’