An nahitabo ha Jerico nakaabot ha iba nga mga nasud ha Canaan. An mga hadi hito nagdesisyon nga mag-urosa ha pakig-away ha mga Israelita. Pero iba an ginbuhat han mga Gibeonita. Nagsul-ot hira hin daan ngan gisi-gisi nga bado ngan kumadto kan Josue ngan nagsiring: ‘Tikang kami ha hirayo nga lugar. Hinbatian namon an mahitungod kan Jehova ngan an ngatanan nga iya ginbuhat para ha iyo didto ha Ehipto ngan ha Moab. Pagsaad nga diri niyo kami susulungon, ngan magigin surugoon niyo kami.’

Tumuod ha ira hi Josue ngan nagsaad nga diri hira susulungon. Pero paglabay hin tulo ka adlaw, hinbaroan niya nga diri hira tikang ha hirayo nga lugar. Tikang hira ha Canaan. Hi Josue nagpakiana ha ira: ‘Kay ano nga nagbuwa kamo ha amon?’ Hira binaton: ‘Nahadlok kami! Maaram kami nga hi Jehova nga iyo Dios nakikig-away para ha iyo. Nakikimalooy kami, ayaw kami pataya.’ Gintuman ni Josue an iya saad ngan waray hira pataya.

Waray pag-iha, an Gibeon ginsulong hin lima nga hadi han Canaan ngan han ira kasundalohan. Hi Josue ngan an iya kasundalohan  nagmartsa ha bug-os nga gab-i basi buligan an mga Gibeonita. An away nagtikang han maagahon han sunod nga adlaw. An mga sundalo han Canaan pumalagiw ha iba-iba nga direksyon. Pero bisan diin hira kumadto, ginpapauranan hira ni Jehova hin dagku nga yelo. Tapos, hi Josue naghangyo kan Jehova nga diri matunod an adlaw. Kay ano nga naghangyo hiya hito nga waray pa man nahitabo hadto nga sugad hito? Kay hi Josue nasarig kan Jehova. An adlaw waray matunod tubtob nga napirde han mga Israelita an mga hadi han Canaan ngan an ira kasundalohan.